തുഷാര് ഇടഞ്ഞു; ബി.ജെ.പി ഒഴികെയുള്ള എന്.ഡി.എ പാര്ട്ടികളുടെ യോഗം വിളിക്കും
രാജ്യസഭാ തെരഞ്ഞെടുപ്പില് താന് എം.പി സ്ഥാനം ആവശ്യപ്പെട്ടെന്ന രീതിയില് ചില ബി.ജെ.പി നേതാക്കള് പ്രചരണം നടത്തിയെന്നും ഇത് തന്നെ വ്യക്തിപരമായി അപമാനിക്കാനായിരുന്നെന്നും സംസ്ഥാനത്തെ എന്.ഡി.എ കണ്വീനര് കൂടിയായ തുഷാര് വെള്ളാപള്ളി. അതിനാല് ബി.ജെ.പിയുമായി തല്ക്കാലം സഹകരിക്കില്ല. ബി.ജെ.പി ഒഴികെ എന്.ഡി.എയിലുള്ള പാര്ട്ടികളുടെ യോഗം വിളിക്കും. രാജ്യസഭാ സീറ്റ് കിട്ടുന്നതിനാണ് ചിലര് തന്റെ പേര് വലിച്ചിഴച്ചത് ഈ സമയത്ത് താന് ഇന്ത്യയില് ഇല്ലായിരുന്നെന്നും തുഷാര് വ്യക്തമാക്കി. ഘടകക്ഷികള് ബി.ജെ.പിയോട് പല ആവശ്യങ്ങളും ഉന്നയിച്ചിരുന്നു. അവ ചര്ച്ച ചെയ്ത് തീരുമാനം അറിയിച്ച ശേഷമേ ബി.ജെ.പിയുമായി സഹകരിക്കൂ എന്നും അദ്ദേഹം വാര്ത്താസമ്മേളനത്തില് അറിയിച്ചു.
14 ബോര്ഡ്, കോര്പ്പറേഷന് ബോര്ഡ് സ്ഥാനമല്ല ഞങ്ങള്ക്ക് പ്രധാനം. തന്നെ അപമാനിച്ചത് ആരാണെന്ന് അന്വേഷിച്ച് നടപടി സ്വീകരിക്കണം. അതിന് പരാതി നല്കുമെന്നും തുഷാര് പറഞ്ഞു. തനിക്കെതിരെ പ്രചരിച്ച വാര്ത്ത മാധ്യമസൃഷ്ടിയല്ല. ഘടകക്ഷികളുടെ ആവശ്യങ്ങള് ചര്ച്ച ചെയ്യുന്ന കാര്യം നീണ്ട് പോവുകയാണ്. അത് പറ്റില്ല. എന്.ഡി.എയുടെ കേരളത്തിലെ കണ്വീനറായ തന്നെ പല കാര്യങ്ങളും അറിയിക്കുന്നില്ലെന്നും തുഷാര് കുറ്റപ്പെടുത്തി. തല്ക്കാലം എന്.ഡി.എ വിട്ട് പോകില്ല. ഏത് മുന്നണികളുമായും സഹകരിക്കും. മഅ്ദനിയുമായി കൂട്ടുകൂടിയ എല്.ഡി.എഫിന് തങ്ങളുമായി സഹകരിക്കുന്നതിന് ബുദ്ധിമുട്ടുണ്ടാകില്ലെന്നും തുഷാര് പറഞ്ഞു.
https://www.facebook.com/Malayalivartha
