ഒരിടവേളയ്ക്ക് ശേഷം തിരുവനന്തപുരം ജില്ലയില്‍ ക്വട്ടേഷന്‍ സംഘം വളരുകയാണ്. തെളിവുകള്‍ അവശേഷിപ്പിക്കാതെ മുഖംമൂടി സംഘം നടത്തിയ കൊലപാതകത്തില്‍ നടുങ്ങിയിരിക്കുകയാണ് മടവൂര്‍. കൈലപാതകികള്‍ സഞ്ചരിച്ച കാര്‍ പകല്‍ പ്രദേശത്ത് കറങ്ങിയെന്നാണ് വിവരം.

കിളിമാനൂര്‍ മടവൂരില്‍ നാടന്‍ പാട്ടുകലാകാരനെ വെട്ടിക്കൊലപ്പെടുത്തിയ സംഭവം ശക്തമായി ആസൂത്രണംചെയ്തു നടപ്പാക്കിയതെന്നാണ് പോലീസിന് ലഭിച്ച സൂചന. പ്രാഥമികാന്വേഷണത്തില്‍ പോലീസിന് യാതൊരു തെളിവും കിട്ടിയിട്ടില്ല. വെട്ടേറ്റ് ചികിത്സയില്‍ കഴിയുന്ന കുട്ടന്റെ മൊഴിയുടെ അടിസ്ഥാനത്തിലാണ് ഇപ്പോള്‍ അന്വേഷണം തുടങ്ങിയിട്ടുള്ളത്. മുന്‍പ് കൊച്ചിയിലും ഖത്തറിലും റേഡിയോജോക്കിയായി നോക്കിയിരുന്ന മടവൂര്‍ പടിഞ്ഞാറ്റേല ആശാഭവനില്‍ രാജേഷ് (35) ആണ് കൊല്ലപ്പെട്ടത്.

ചുവന്നകാറില്‍ നാലുപേരടങ്ങുന്ന സംഘമാണ് എത്തിയത്. മൂന്നുപേരാണ് പുറത്തിറങ്ങി ആക്രമണം നടത്തിയത്. ഒരാള്‍ കാര്‍ സ്റ്റാര്‍ട്ടാക്കി നിര്‍ത്തി അതിനുള്ളിലിരിക്കുകയുമായിരുന്നുവെന്നാണ് പോലീസിന് ലഭിച്ചിട്ടുള്ള മൊഴി. ഇതിന്റെ അടിസ്ഥാനത്തിലാണ് ഇപ്പോള്‍ അന്വേഷണം നടത്തുന്നത്. അക്രമികള്‍ മുഖംമൂടിധരിച്ചിരുന്നതായും വിവരം ലഭിച്ചിട്ടുണ്ട്. ആശുപത്രിയിലേക്ക് കൊണ്ടുപോകുംവഴി രാജേഷിന്റെ മരണമൊഴി പോലീസിന് ലഭിച്ചതായി സൂചനയുണ്ട്. എന്നാല്‍ ഇക്കാര്യം പോലീസ് സ്ഥിരീകരിച്ചിട്ടില്ല.

രാജേഷിന്റെ നീക്കങ്ങള്‍ നിരീക്ഷിച്ചിരുന്ന സംഘമാണ് ആക്രമണം നടത്തിയതെന്നു വ്യക്തമാണ്. രാജേഷും കുട്ടനും റെക്കോഡിങ് സ്റ്റുഡിയോയില്‍ എത്തിയതുള്‍ പ്പെടെയുള്ള കാര്യങ്ങള്‍ നിരീക്ഷിച്ചാണ് ആക്രമണം നടത്തിയിട്ടുള്ളത്. രാജേഷിനെ മാത്രമാണ് സംഘം ലക്ഷ്യമിട്ടതെന്നും ശ്രദ്ധേയമാണ്. വെട്ടേറ്റ് പുറത്തേക്കോടിയ കുട്ടനെ അക്രമികള്‍ പിന്തുടരാന്‍ ശ്രമിച്ചില്ല. അതുകൊണ്ടുതന്നെ കൊലപാതകത്തിനുപിന്നില്‍ വ്യക്തിപരമായ പകയാണെന്ന് പോലീസ് അനുമാനിക്കുന്നു.

കൈകാലുകളിലാണ് ഏറ്റവും കൂടുതല്‍ വെട്ടേറ്റിട്ടുള്ളത്. കൈപ്പത്തി അറ്റുപോവുകയും കാലുകള്‍ ചിതറിപ്പോവുകയും ചെയ്തിരുന്നു. രക്ഷപ്പെട്ടാലും അംഗഭംഗം ഉറപ്പാക്കാനായിരുന്നു ഇതെന്നും വിലയിരുത്തപ്പെടുന്നു. അക്രമികളിലേക്ക് നയിക്കുന്ന ശക്തമായ തെളിവുകളൊന്നും പോലീസിന് സംഭവസ്ഥലത്തുനിന്നു കിട്ടിയിട്ടില്ല. അക്രമികള്‍ വന്ന കാര്‍ കണ്ടെത്താനുള്ള ശ്രമം ആരംഭിച്ചിട്ടുണ്ട്. ശാസ്ത്രീയമായ തെളിവുകളെ ആശ്രയിച്ച് കുറ്റവാളികളെ കണ്ടെത്താനുള്ള ശ്രമമാണ് പോലീസ് തുടങ്ങിയിട്ടുള്ളത്. ഫോറന്‌സിക് വിഭാഗവും വിരലടയാളവിഭാഗവും പോലീസ് നായയും തെളിവെടുപ്പിനെത്തി.

അക്രമം ആസൂത്രിതമാണെന്നു വ്യക്തമായതോടെ രാജേഷിന്റെ സംഘം പരിപാടിയവതരിപ്പിച്ച നാവായിക്കുളം മുല്ലനല്ലൂര്‍ ശ്രീകൃഷ്ണ ക്ഷേത്രത്തില്‍ അക്രമിസംഘം എത്തിയിരിക്കാനുള്ള സാധ്യതകള്‍ പോലീസ് അന്വേഷിക്കുന്നുണ്ട്. തുടര്‍ന്ന് മടവൂരിലേക്കുള്ള വഴിയിലെ സി.സി.ടി.വി. ക്യാമറകളിലെ ദൃശ്യങ്ങളും ശേഖരിക്കാനുള്ള ശ്രമത്തിലാണ് പോലീസ്. അക്രമികള്‍ രാജേഷിനെയും സംഘത്തിനെയും പിന്തുടര്‍ന്നിരുന്നില്ലെങ്കില്‍ ഇവര്‍ സ്റ്റുഡിയോയിലുണ്ടെന്നുള്ള വിവരം കൈമാറിയ ഒരാളുണ്ടാവുമെന്നും പോലീസ് കരുതുന്നു. ഇതിനായി മൊബൈല്‍ ടവറുകള്‍ കേന്ദ്രീകരിച്ചുള്ള വിവരങ്ങളും ശേഖരിക്കാന്‍ ആരംഭിച്ചിട്ടുണ്ട്. സ്റ്റുഡിയോക്കുള്ളില്‍ നിന്ന് രാജേഷിന്റെ മൊബൈല്‍ ഫോണ്‍ പോലീസിന് കിട്ടിയിട്ടുണ്ട്. ഇതില്‍ നിന്നുള്ള തെളിവുകളും ശേഖരിക്കാന്‍ നടപടി തുടങ്ങിയതായി പോലീസ് അറിയിച്ചു. ആറ്റിങ്ങല്‍ ഡിവൈ.എസ്.പി. പി.അനില്‍ കുമാറിന്റെ മേല്‍നോട്ടത്തില്‍ കിളിമാനൂര്‍ സി.ഐ. പ്രദീപ്കുമാറിന്റെ നേതൃത്വത്തിലുള്ള സംഘമാണ് അന്വേഷണം നടത്തുന്നത്.