കാസര്‍കോട്ട് കേന്ദ്ര സര്‍വകലാശാല കാമ്പസ് ഉദ്ഘാടനത്തില്‍ ശ്രദ്ധേയയായി തെരേസ് മരിയ. ഉപരാഷ്ട്രപതിയെ നേരിട്ട് കാണാന്‍ കൊതിച്ചെത്തിയ മരിയയ്ക്ക് ഹാളിനകത്തേക്ക് പ്രവേശനം കിട്ടാതെ വന്നതോടെ വലിയ നിരാശയായി. അവസാനം കിട്ടിയതോ വലിയ ഭാഗ്യവും. ചിറ്റാരിക്കാല്‍ കണ്ണിവയലിലെ അരിപ്പറമ്പില്‍ പ്രിന്‍സ് അഗസ്റ്റിന്റെയും ലിറ്റിയുടെയും മകള്‍ തെരേസ് മരിയയ്ക്കാണ് ആ ഭാഗ്യമുണ്ടായത്.

കനത്ത കരിമ്പൂച്ച സുരക്ഷയില്‍ ചടങ്ങഉകഴിഞ്ഞ് പുറത്തിറക്കിറങ്ങിയപ്പോള്‍ രണ്ടും കല്‍പിച്ച് നീട്ടിയൊരു വിളി. നായിഡു സാര്‍.... എന്ന വിളികേട്ട് ഉപരാഷ്ട്രപതി നിന്നു. പെണ്‍കുട്ടിയെ അടുത്തേക്ക് വിളിച്ചു. എന്താണ് വിളിച്ചതെന്ന് വെങ്കയ്യനായിഡു ചോദിച്ചപ്പോള്‍ കാര്യംപറഞ്ഞു. കാണാന്‍ മോഹിച്ച് വന്നതാണ്. വീട്ടില്‍ നിന്ന് വന്നപ്പോള്‍ തിരിച്ചറിയല്‍ കാര്‍ഡ് എടുത്തില്ല. അതുകൊണ്ട് ഹാളിനകത്തേക്ക് കയറാന്‍ പറ്റിയില്ല. ഒന്നു സംസാരിക്കാന്‍ കൊതിച്ച് വിളിച്ചുപോയതാണെന്നായി തെരേസ് മരിയ.

കാസര്‍കോട്ട് കേന്ദ്രസര്‍വകലാശാല കാമ്പസ് ഉദ്ഘാടനത്തിനുവന്നതായിരുന്നു ഉപരാഷ്ട്രപതി വെങ്കയ്യ നായിഡു. തിരിച്ചറിയല്‍ കാര്‍ഡില്ലാത്തതിനാല്‍ ഹാളിനകത്തേക്ക് പ്രവേശനം നിഷേധിക്കപ്പെടുകയായിരുന്നു തെരേസിന് എന്നാല്‍, ഹാളിനുപുറത്ത് കാത്തുനിന്ന് ചടങ്ങു തീര്‍ന്ന് വെങ്കയ്യ ഇറങ്ങുമ്പോള്‍ കാണാന്‍ കാത്തുനിന്നു അവള്‍. ചടങ്ങുതീര്‍ന്ന് ഉപരാഷ്ട്രപതി പുറത്തേക്ക് പോയത് തെരേസ് നിന്നതിന് അടുത്തുകൂടെ. അപ്പോഴാണ് രണ്ടുംകല്‍പിച്ച് നീട്ടിവിളിച്ചത്. കുട്ടിയുടെ വാക്കുകള്‍ കേട്ടപ്പോള്‍ രാഷ്ട്രപതിക്കും കൗതുകമായി. അടുത്തുവിളിച്ച് നിര്‍ത്തി വിശേഷങ്ങള്‍ തിരക്കി. പഠിക്കുന്ന സ്‌കൂളും മറ്റുകാര്യങ്ങളുമായി കുറച്ചുനേരം കുശലം.

കാണാന്‍ ഹാളിനകത്ത് കയറാന്‍ പറ്റിയില്ലെങ്കിലെന്താ. ഇപ്പോള്‍ എന്നോടൊപ്പം നിന്ന് സംസാരിക്കാന്‍ സ്‌പെഷ്യല്‍ ചാന്‍സ് കിട്ടിയില്ലേയെന്നുമായി വെങ്കയ്യ. എന്താകാനാണ് ആഗ്രഹമെന്ന ചോദ്യത്തിന് ഐ.എ.എസ്. നേടാനാണ് ഇഷ്ടമെന്നായി തെരേസ്. അതോടെ തലയില്‍ കൈവെച്ച് ഉപരാഷ്ട്രപതി അവളെ അനുഗ്രഹിച്ചു.

തെരേസ് ആ പാദങ്ങളില്‍ തൊട്ട് നമസ്‌കരിച്ചു. സാറിനൊപ്പം ഒരു ഫോട്ടോ എടുക്കട്ടെ എന്നായി തെരേസ്. സെല്‍ഫിയെടുക്കാന്‍ പ്രോട്ടോക്കോള്‍ തടസമുണെന്നും മറ്റാരെക്കൊണ്ടെങ്കിലും എടുപ്പിച്ചോളൂ, ഞാന്‍ നില്‍ക്കാമെന്നും പറഞ്ഞ് വെങ്കയ്യ അടുത്തുനിന്നു. ഇതിനിടെയാണ് പെണ്‍കുട്ടിയുടെ ഫോണ്‍ കാണാനില്ലെന്ന് മനസ്സിലായത്. തിരക്കിനിടയില്‍ വീണുപോയതായിരുന്നു.

ഇതോടെ പെണ്‍കുട്ടിയും സ്വല്‍പം പരിഭ്രമിച്ചു. ആശ്വസിപ്പിച്ച ഉപരാഷ്ട്രപതി കുട്ടിയുടെ ഫോണ്‍ കണ്ടുപിടിച്ചു കൊടുക്കാന്‍ ഉപരാഷ്ട്രപതി സുരക്ഷാ ഉദ്യോഗസ്ഥരോട് നിര്‍ദേശിച്ചു. അവര്‍ അത് തിരഞ്ഞ് കണ്ടുപിടിക്കുകയും ചെയ്തു. ഇതിനിടെ കൂടിയവരെല്ലാം ചിത്രം പകര്‍ത്തിയതോടെ തെരേസ് താരമായി. ഒപ്പം നിന്ന് പടമെടുക്കാനുള്ള കുട്ടിയുടെ ആഗ്രഹവും അങ്ങനെ സഫലീകരിച്ച് ചിരിച്ചുകൊണ്ട് വെങ്കയ്യ നടന്നുനീങ്ങി.