അരിയും ഗോതമ്പും മണ്ണെണ്ണയുമൊക്കെ വാങ്ങുന്നതിനൊപ്പം റേഷന്‍ കടയിലൂടെ ഇനി ബാങ്ക് അക്കൗണ്ടും തുറക്കാം, പണം നിക്ഷേപിക്കാം, പണം പിന്‍വലിക്കാം... ഇരുപത് ബാങ്കിംഗ് സേവനങ്ങള്‍ റേഷന്‍ കടകളിലും ലഭ്യമാക്കാന്‍ സര്‍ക്കാരും കനറാ ബാങ്ക് അധികൃതരുമായുള്ള ചര്‍ച്ചയില്‍ ധാരണയായി.
റേഷന്‍ കടകളില്‍ സ്ഥാപിക്കുന്ന ഇപോസ് മെഷീനിലൂടെയാണിത്. എ.ടി.എമ്മിനൊപ്പം 19 സേവനങ്ങള്‍ കൂടി റേഷന്‍ കടകള്‍ വഴി നല്‍കാമെന്ന് കനറാ ബാങ്ക് ഡെപ്യൂട്ടി ജനറല്‍ മാനേജര്‍ അറിയിച്ചു. വിശദമായ പദ്ധതി രേഖ ഉടന്‍ സര്‍ക്കാരിന് സമര്‍പ്പിക്കും.

അക്കൗണ്ട് തുടങ്ങല്‍, പണം നിക്ഷേപിക്കല്‍ (നിശ്ചിത തുക വരെ മാത്രം), പണം പിന്‍വലിക്കല്‍, ഇന്‍ഷ്വറന്‍സ് തുടങ്ങിയ സേവനങ്ങള്‍ക്കെല്ലാം ഇ പോസ് മെഷീന്‍ ഉപയോഗിക്കാം. ഇതിനായി ഒരു സോഫ്റ്റ്‌വെയര്‍ കൂടി ബാങ്ക് ഇന്‍സ്റ്റാള്‍ ചെയ്യും.

ബാങ്കിംഗ് പ്രവര്‍ത്തനങ്ങളില്‍ റേഷന്‍ കടകളിലെ ജീവനക്കാര്‍ക്ക് കനറാ ബാങ്ക് പരിശീലനം നല്‍കും. സേവനങ്ങള്‍ ഏകോപിപ്പിക്കാന്‍ ഓരോ മേഖലയിലും ജീവനക്കാരെ നിയമിക്കും. റേഷന്‍ വിതരണത്തെ ബാധിക്കാതിരിക്കാന്‍ ബാങ്കിംഗ് സേവനങ്ങള്‍ക്ക് നിശ്ചിത സമയം ഉണ്ടാകും.

പരീക്ഷണാടിസ്ഥാനത്തില്‍ ഒരു നഗരത്തിലെ റേഷന്‍ കടകളില്‍ ആദ്യം നടപ്പാക്കും. പദ്ധതി വിശദീകരിക്കാന്‍,മന്ത്രി 10ന് റേഷന്‍കട ഉടമകളെ ചര്‍ച്ചയ്ക്കു വിളിക്കും. ഒരു മാസം നൂറ് ഇടപാട് നടന്നാല്‍ 2,500 രൂപ റേഷന്‍ കടക്കാരന് ലഭിക്കും. 100 മുതല്‍ 200 വരെ ഇടപാട് നടന്നാല്‍ 5,000 രൂപയും. ഇടപാട് കൂടുന്നതനുസരിച്ച് കമ്മിഷനും വര്‍ദ്ധിക്കും. ആന്ധ്രയില്‍ വിജയിച്ച പദ്ധതിയാണ് റേഷന്‍ കട ബാങ്ക് '. അവിടെ ആന്ധ്രാ ബാങ്കാണ് പദ്ധതി നടപ്പാക്കുന്നത്. ലിങ്ക്വല്‍' കമ്പനിയാണ് ഇ പോസ് മെഷീന്‍ സ്ഥാപിച്ചത്. ഇവിടെയും ഇതേ കമ്പനിയുടെ മെഷീനുകളാണ്. 

ജനങ്ങള്‍ക്കും റേഷന്‍കടയുടമകള്‍ക്കും ഒരു പോലെ പ്രയോജനം ചെയ്യുന്ന പദ്ധതിയാണിത്.