അട്ടപ്പാടിയില് ആള്ക്കൂട്ടം കൊലപ്പെടുത്തിയ മധുവിന്റെ അമ്മ മല്ലിയെ സി.പി.എം പ്രാദേശിക നേതാക്കള് തട്ടിക്കൊണ്ട് പോയെന്ന് ബി.ജെ.പി നേതാക്കള്, ബി.ജെ.പി നേതൃത്വത്തില് ഇന്ന് നടക്കുന്ന ചലോ ചലോ വരാപ്പുഴ മാര്ച്ചിന് പതാക കൈമാറേണ്ടത് മല്ലിയായിരുന്നു
അട്ടപ്പാടിയില് ആള്ക്കൂട്ടം കൊലപ്പെടുത്തിയ ആദിവാസി യുവാവ് മധുവിന്റെ അമ്മ മല്ലിയെ സി.പി.എം പ്രാദേശിക നേതാക്കള് തട്ടിക്കൊണ്ടു പോയതായി ബി.ജെ.പി. വരാപ്പുഴയില് ശ്രീജിത്ത് കസ്റ്റഡി മരണത്തിനിരയായ സംഭവം സി.ബി.ഐ. അന്വേഷിക്കണമെന്ന് ആവശ്യപ്പെട്ട് ബി.ജെ.പിയുടെ നേതൃത്വത്തില് ഇന്ന് വരാപ്പുഴയിലേക്ക് ജീവന്രക്ഷാ മാര്ച്ച് നടക്കാനിരിക്കെയാണ് നാടകീയ സംഭവങ്ങള് അരങ്ങേറിയത്.
മധുവിന്റെ അമ്മ മല്ലിയില്നിന്ന് ബി.ജെ.പി സംസ്ഥാന സെക്രട്ടറി എ.എന്. രാധാകൃഷ്ണന് പതാക ഏറ്റുവാങ്ങാനായിരുന്നു തീരുമാനം. ഇതനുസരിച്ച് രാവിലെ ഒമ്പതിന് മണ്ണാര്ക്കാടു നിന്നും 'ചലോ വരാപ്പുഴ മാര്ച്ച്' ആരംഭിക്കാനിരിക്കെയാണ് മല്ലിയെ പ്രാദേശിക സി പി എം നേതാക്കള് തട്ടിക്കൊണ്ടുപോയതെന്ന് ബിജെപി നേതാക്കള് ആരോപിക്കുന്നു.
പ്രശ്നം രൂക്ഷമായതോടെ മധുവിന്റെ കുഞ്ഞമ്മയില് നിന്ന് എ.എന് രാധാകൃഷ്ണന് 'ചലോ വരാപ്പുഴ മാര്ച്ച്' പതാക ഏറ്റുവാങ്ങുകയായിരുന്നു. മധുവിന്റെ കൊലപാതകത്തില് ബി.ജെ.പി രാഷ്ട്രീയ നാടകം കളിക്കാനുള്ള നീക്കം മനസിലാക്കിയാണ് സി.പി.എം തട്ടിക്കൊണ്ട് പോകല് നാടകം നടത്തിയതെന്ന് പ്രാദേശിക സി.പി.എം നേതാക്കള് ആരോപിക്കുന്നു. അതേസമയം മല്ലിയെ തട്ടിക്കൊണ്ട് പോയിട്ടില്ലെന്നും തല്ക്കാലത്തേക്ക് മാറ്റിനിര്ത്തുക മാത്രമാണ് ചെയ്തിട്ടുള്ളതെന്നും നാട്ടുകാരില് ചിലര് പറയുന്നു. ചെങ്ങന്നൂര് ഉപതെരഞ്ഞെടുപ്പിന്റെ പടിവാതില്ക്കല് എത്തിനില്ക്കെ ആള്ക്കൂട്ട കൊലപാതകവും കസ്റ്റഡിമരണവും കുത്തിപ്പൊക്കി സര്ക്കാരിനെതിരെ ജനവികാരം ഇളക്കിവിടാനാണ് ബി.ജെ.പി ശ്രമിക്കുന്നതെന്ന് സി.പി.എം ആരോപിക്കുന്നു.
മധുവിനെ ആള്ക്കൂട്ടം കൊന്ന സംഭവത്തില് സര്ക്കാര് ശക്തമായനിലപാടാണ് സ്വീകരിച്ചത്. മധുവിന്റെ വീട്ടിലടക്കം മുഖ്യമന്ത്രി പിണറായി വിജയന് സന്ദര്ശനം നടത്തിയിരുന്നു. കുടുംബത്തിന്റെ കാര്യങ്ങളിലും അന്വേഷണത്തിലും വീഴ്ചവരുത്തിയിട്ടില്ല. എന്നിട്ടും ബി.ജെ.പി സംഭവം വിവാദമാക്കാനാണ് ശ്രമിക്കുന്നത്. വരാപ്പുഴയിലെ ശ്രീജിത്തിന്റെ കസ്റ്റഡിമരണത്തില് കുറ്റക്കാരായ പൊലീസുകാര് റിമാന്ഡിലാണ്. റൂറല് എസ്.പി എ.വി ജോര്ജ്ജിനെ വരെ ചോദ്യം ചെയ്തു. കേരള ചരിത്രത്തില് അടുത്തകാലത്തെങ്ങും കസ്റ്റഡിമരണത്തില് പൊലീസുകാര്ക്കെതിരെ ഇത്രയും ശക്തമായ നടപടിയുണ്ടായിട്ടില്ല. ശ്രീജിത്തിന്റെ ഭാര്യയ്ക്ക് ജോലി നല്കുമെന്ന് സര്ക്കാര് പ്രഖ്യാപിച്ചു. കുടുംബത്തിന് 10 ലക്ഷം രൂപ ധനസഹായവും നല്കി. ഇതൊക്കെ പൊതുസമൂഹത്തിന് അറിയാവുന്ന കാര്യങ്ങളാണ്. അതൊക്കെ മറച്ച് വെച്ച് പുകമറ സൃഷ്ടിക്കാനാണ് ബി.ജെ.പി ശ്രമിക്കുന്നതെന്ന് വരാപ്പുഴയിലെ സി.പി.എം നേതാക്കള് പറയുന്നു.
https://www.facebook.com/Malayalivartha
