28,000 കോടി പ്രതീക്ഷിച്ച 2ജി സ്‌പെക്‌ട്രം ലേലത്തില്‍ ആദ്യ ദിനം നേടാനായത്‌ 9,200 കോടി മാത്രം. മൊബൈല്‍ ഫോണിലെ രണ്ടാം തലമുറയ്‌ക്കായുള്ള ഈ ലേലത്തിലെ അഖിലേന്ത്യാ സ്‌പെക്‌ട്രത്തിന്‌ ആരും മുന്നോട്ട്‌ വന്നില്ല. കേരളത്തില്‍ ആകെ വിറ്റു പോയത്‌ ഒറ്റ ബ്ലോക്കു മാത്രം. ദേശീയതലത്തില്‍ 176 ബ്ലോക്കുകളില്‍ ആകെ 98 എണ്ണം മാത്രമാണ്‌ വില്‍ക്കാനായത്‌.  രാജ്യം കണ്ട ഏറ്റവും വലിയ അഴിമതിയിലൂടെ കുപ്രസിദ്ധി നേടിയ 2 ജി സ്‌പെക്‌ട്രത്തിന്റെ ലേലമാണ്‌ നടന്നത്‌. മുന്‍ ടെലികോം വകുപ്പ്‌ മന്ത്രി എ. രാജയുടെ കാലത്ത്‌ 2 ജി സ്‌പെക്‌ട്രം ഇടപാടില്‍ പൊതു ഖജനാവിന്‌ 1.76 കോടി രൂപയുടെ നഷ്‌ടം സംഭവിച്ചുവെന്ന്‌ സി.എ.ജി. കുറ്റപ്പെടുത്തിയിരുന്നു. തുടര്‍ന്ന്‌ സുപ്രീം കോടതി ഇടപെട്ട്‌ എട്ടു കമ്പനികളുടെ ലൈസന്‍സുകള്‍ റദ്ദാക്കിയിരുന്നു. ലൈസന്‍സുകള്‍ റദ്ദാക്കപ്പെട്ടതുവഴി സര്‍ക്കാറിന്റെ കൈവശം വന്ന 2-ജി സ്‌പെക്ട്രമാണ് ഇപ്പോള്‍ ലേലം ചെയ്യുന്നത്. ലൈസന്‍സുകള്‍ക്കൊപ്പം സൗജന്യ സ്‌പെക്ട്രം എന്ന രീതിയാണ് രാജ അവലംബിച്ചിരുന്നത്.