ഗുരുവിന്റെ മരണത്തില് മനംനൊന്ത് മൂന്നു സ്വാമികള് തീയില് ചാടി ആത്മഹത്യ ചെയ്തു
കര്ണാടകയിലെ ബിഡാറില് മൂന്നു സന്യാസിമാര് തീയില് ചാടി ആത്മഹത്യ ചെയ്തു. തിങ്കളാഴ്ച രാവിലെ ബിഡാറിലെ ചൗലി ഗ്രാമത്തിലെ മഠത്തില് വിറകുകള് കൊണ്ട് ചിതയൊരുക്കി മൂവരും അതിലേക്ക് എടുത്തു ചാടുകയായിരുന്നു. അഗ്നിശമന സേനാംഗങ്ങളും, പോലീസും സ്ഥലത്തെത്തിയതിന് ശേഷമാണ് മൂന്നുപേരുടേയും കത്തിക്കരിഞ്ഞ മൃതദേഹങ്ങള് പുറത്തെടുത്തത്. ജഗന്നാഥ സ്വാമി(30), ഈറ റെഡ്ഡി സ്വാമി(45), പ്രണവ് സ്വാമി(16) എന്നിവരാണ് മരിച്ചത്. ഗുരുവായ ഗണേശാനന്ദ സ്വാമിയുടെ മരണത്തില് മനംനൊന്താണ് സ്വാമിമാര് ആത്മഹത്യ ചെയ്തത്. ഇക്കഴിഞ്ഞ ഫെബ്രുവരി 28 നായിരുന്നു ഗണേശാനന്ദ സ്വാമികള് മരിച്ചത്.
ഇവരുടെ ആത്മഹത്യാ കുറിപ്പ് പോലീസിന് ലഭിച്ചിട്ടുണ്ട്. തങ്ങള്ക്ക് ഗുരുവിനെ പിരിഞ്ഞിരിക്കാന് കഴിയുന്നില്ലെന്നും, അദ്ദേഹത്തെ കാണാന് ഞങ്ങള് പോകുകയാണെന്നും കത്തില് പറയുന്നു.
മഠത്തിലെ ഭൂരിപക്ഷം പേരും ലിംഗായത്ത് സമുദായക്കാരാണ്. ഭൂമിയിടപാടുമായി ബന്ധപ്പെട്ട് കര്ണ്ണാടകത്തില് വിവാദങ്ങള് ഉണ്ടായപ്പോള് അതിനൊപ്പം ഈ ആശ്രമത്തിന്റെ പേരും വിവാദത്തിലകപ്പെട്ടിരുന്നു. അതിനിടയിലാണ് ഗുരുവായ ഗണേശാനന്ദ സ്വാമിയുടെ മരണം സംഭവിച്ചത്. ഉയര്ന്ന പോലീസ് ഉദ്യോഗസ്ഥര് സ്ഥലം സന്ദര്ശിച്ചു. അന്വേഷണം ആരംഭിച്ചിട്ടുണ്ട്.
https://www.facebook.com/Malayalivartha
