‘പ്ലസ് ടു സയൻസിന് നല്ല മാർക്ക് വാങ്ങിയതാണ്, അമ്മയെ അടുത്തവർഷം ഡിഗ്രിക്ക് ചേർക്കണം മിസ്സേ എന്ന് അവൾ പറഞ്ഞിരുന്നു. അപ്പനെയും സഹോദരനെയും നോക്കുന്ന കാര്യവും പറയും. പാർട് ടൈം ജോലി ചെയ്താണ് അവൾ പഠിക്കാനും മറ്റും പൈസ കണ്ടെത്തിയത്. ആ ജോലി കഴിഞ്ഞു നടന്നു വരുന്ന വഴിയാണ് ആ കാർ അവളെ ഇടിച്ചു തെറിപ്പിച്ചത്’’– അപകടത്തിൽ പരുക്കേറ്റ് ഇന്നലെ അന്തരിച്ച ജസ്‍ലിയ ജോൺസന്റെ (19) അധ്യാപിക മെറ്റിൽഡ കണ്ണീരിനിടയിലൂടെ പറഞ്ഞു. ജസ്‍ലിയയെ ഇടിച്ചു തെറിപ്പിച്ച വാഹനമോടിച്ചത് കോട്ടയം അതിരമ്പുഴ സ്വദേശി ജോർജ് തോമസിന്റെ മകൻ ഡോ. സിറിയക് ആണെന്ന് വ്യക്തമായി. ഇയാളെ കുറിച്ച് അന്വേഷിക്കുന്നുണ്ടെന്നും വൈകാതെ കസ്റ്റഡിയിലെടുക്കുമെന്നും അങ്കമാലി പൊലീസ് വ്യക്തമാക്കി. പ്രതിയെ അറസ്റ്റ് ചെയ്യാൻ വൈകുന്നതിൽ പൊലീസ് സ്റ്റേഷനു മുന്നിൽ യൂത്ത് കോൺഗ്രസ് ഉൾപ്പെടെ പ്രതിഷേധിച്ചു.