മുൻ തമിഴ്നാട് മുഖ്യമന്ത്രി കരുണാനിധിക്ക് പ്രധാനമന്ത്രി നരേന്ദ്രമോദി അന്തിമോപചാരം അർപ്പിച്ചു ; ചെന്നൈ രാജാജി ഹാളില് രാഷ്ട്രീയ സാമൂഹിക സിനിമാ മേഖലയില് നിന്നുള്ള നിരവധിപ്പേർ കരുണാനിധിക്ക് അന്ത്യാഞ്ജലി അര്പ്പികാനായി എത്തി
അന്തരിച്ച മുൻ തമിഴ്നാട് മുഖ്യമന്ത്രി കരുണാനിധിക്ക് പ്രധാനമന്ത്രി നരേന്ദ്രമോദി അന്തിമോപചാരം അർപ്പിച്ചു. ഭൗതിക ശരീരം പൊതുദര്ശനത്തിനു വച്ചിരിക്കുന്ന ചെന്നൈയിലെ രാജാജി ഹാളിലെത്തിയാണ് പ്രധാനമന്ത്രി അന്തിമോപചാരമര്പ്പിച്ചത്. കേന്ദ്ര പ്രതിരോധമന്ത്രി നിര്മ്മല സീതാരാമനും പ്രധാനമന്ത്രിക്കൊപ്പമുണ്ടായിരുന്നു.
കരുണാനിധിയെ അവസാനമായി ഒരു നോക്കു കാണുവാന് രാജാജി ഹാളിന് മുന്നിലേക്കു വന് ജനപ്രവാഹമാണ്. നടന് രജനീകാന്ത്, ധനുഷ്, സൂര്യ, അജിത്ത്, മുഖ്യമന്ത്രി എടപ്പാടി പളനിസാമി, ഉപമുഖ്യമന്ത്രി ഒ.പനീര്സെല്വം, ടി.ടി.വി.ദിനകരന്, കേരളത്തില് നിന്നും ഉമ്മന്ചാണ്ടി തുടങ്ങിയവരും അന്തിമോപചാരം അര്പ്പിച്ചു.
മകള് കനിമൊഴിയുടെ വസതിയില് നിന്നു കലൈജ്ഞരുടെ ഭൗതികദേഹം രാജാജി ഹാളില് പുലര്ച്ചെ 5.30 നായിരുന്നു എത്തിച്ചത്. അതേസമയം, കരുണാനിധിയുടെ സംസ്കാര ചടങ്ങുകള്ക്ക് മറീന ബീച്ചില് സ്ഥലം അനുവദിക്കണമെന്ന കോടതി ഉത്തരവും എത്തിയിട്ടുണ്ട്. കരുണാനിധിയെ സംസ്ക്കരിക്കാന് മറീന ബീച്ചില് സ്ഥലം അനുവദിക്കാതിരുന്ന സംസ്ഥാന സര്ക്കാര് നടപടി വലിയ സംഘര്ഷങ്ങള്ക്ക് വഴിവെച്ചിരുന്നു. പൊലീസ് ലാത്തിച്ചാര്ജില് നിരവധി ഡിഎംകെ പ്രവര്ത്തകര്ക്ക് പരിക്കേല്ക്കുകയും ചെയ്തിരുന്നു.
https://www.facebook.com/Malayalivartha
