ബിഹാറിലെ സര്‍ക്കാര്‍, ഏയ്ഡഡ് സ്‌കൂളുകളില്‍ വിദ്യാര്‍ഥികള്‍ക്കും അധ്യാപകര്‍ക്കും പ്രഭാത പ്രാര്‍ഥന നിര്‍ബന്ധമാക്കിക്കൊണ്ട് സര്‍ക്കാര്‍ ഉത്തരവ്
ബിഹാറിലെ സര്‍ക്കാര്‍, ഏയ്ഡഡ് സ്‌കൂളുകളില്‍ വിദ്യാര്‍ഥികള്‍ക്കും അധ്യാപകര്‍ക്കും പ്രഭാത പ്രാര്‍ഥന നിര്‍ബന്ധമാക്കിക്കൊണ്ട് സര്‍ക്കാര്‍ ഉത്തരവ്. സര്‍ക്കാര്‍ തയ്യാറാക്കിയ പ്രാര്‍ഥന ഗാനമാണ് ചൊല്ലേണ്ടത്. വിദ്യാഭ്യാസ വകുപ്പ് പ്രിന്‍സിപ്പല്‍ സെക്രട്ടറി ആര്‍.കെ. മഹാജന്‍ ആണ് ഉത്തരവ് പുറപ്പെടുവിച്ചത്. എല്ലാ ജില്ലാ വിദ്യാഭ്യാസ ഓഫീസര്‍മാര്‍ക്കും ജില്ലാ പ്രോഗ്രാം ഓഫീസര്‍മാര്‍ക്കും ഇതു സംബന്ധിച്ച ഉത്തരവ് നല്‍കി. വ്യാഴാഴ്ചയാണ് ഉത്തരവിറക്കിയത്. 76000ത്തിലധികം സര്‍ക്കാര്‍ഏയ്ഡഡ് സ്‌കൂളുകളില്‍ പെട്ടെന്നു തന്നെ ഉത്തരവ് നടപ്പിലാക്കണമെന്ന് നിര്‍ദേശം നല്‍കി.
വിദ്യാര്‍ഥികളിലും ജീവനക്കാരിലും അച്ചടക്കവും കൃത്യനിഷ്ഠതയും വളര്‍ത്തിയെടുക്കുന്നതിനാണ് പ്രാര്‍ഥന നടപ്പാക്കുന്നതെന്നാണ് വിശദീകരണം. പ്രാര്‍ഥന ഉച്ചഭാഷിണിയിലൂടെ പാടണമെന്നും ഉത്തരവിലുണ്ട്. ഉച്ചഭാഷിണി ഇല്ലാത്ത സ്‌കൂളുകള്‍ അത് ഉടന്‍ വാങ്ങുകയും നേരത്തെയുള്ളവയില്‍ തകരാറുകള്‍ വല്ലതുമുണ്ടെങ്കില്‍ പരിഹരിക്കുകയും വേണം. ഇതിനു ചെലവു വരുന്ന തുക സ്‌കൂള്‍ വികസന ഫണ്ടില്‍ നിന്നോ, വിദ്യാര്‍ഥി ഫണ്ടില്‍ നിന്നോ എടുക്കാമെന്നും ഉത്തരവില്‍ പറയുന്നു.
രാവിലത്തെ അസംബ്ലിയില്‍ പ്രിന്‍സിപ്പല്‍, അധ്യാപകര്‍, വിദ്യാര്‍ഥികള്‍ എന്നിവര്‍ സംബന്ധിക്കണം. ധാര്‍മിക മൂല്ല്യങ്ങള്‍, പ്രചോദനം നല്‍കുന്ന കഥകള്‍, രസകരമായ സംഭവകഥകള്‍, പത്രവായന എന്നിവ പ്രാര്‍ഥന സഭയില്‍ ഉള്‍ക്കൊള്ളിക്കണം. അവസാന പിരീഡ് കായിക പ്രവര്‍ത്തനങ്ങള്‍ക്കോ പാഠ്യാനുബന്ധ പ്രവര്‍ത്തനങ്ങള്‍ക്കോ വേണ്ടി മാറ്റിവെക്കണം എന്നീ നിര്‍ദേശങ്ങളും ഉത്തരവിലുണ്ട്.
https://www.facebook.com/Malayalivartha
