ഉത്തര്‍പ്രദേശില്‍ സ്ത്രീധനം നൽകിയില്ലെന്നാരോപിച്ച് ഭർത്താവും കുടുംബവും യുവതിയെ തല്ലിക്കൊന്നതായി റിപ്പോർട്ടുകൾ. ഷംലി ജില്ലയിലെ ഗ്രാമപ്രദേശത്ത് ശനിയാഴ്ച്ച വൈകുന്നേരമായിരുന്നു നാടിനെ നടുക്കിയ സംഭവം അരങ്ങേറിയത്.

യുവതി മരിക്കുന്നത് വരെ ഭര്‍ത്താവും കുടുംബവും ചേര്‍ന്ന് ക്രൂരമായി മര്‍ദ്ദിക്കുകയായിരുന്നെന്ന് പൊലീസ് അറിയിച്ചു. സംഭവത്തെ തുടര്‍ന്ന് യുവതിയുടെ പിതാവ് പൊലീസില്‍ പരാതി നല്‍കി. പരാതിയുടെ അടിസ്ഥാനത്തില്‍ ഭര്‍ത്താവ്, ഭര്‍ത്താവിന്റെ അച്ഛന്‍, അമ്മ, സഹോദരന്‍ എന്നിവരെ അറസ്റ്റ് ചെയ്തിട്ടുണ്ട്.

അതേസമയം, യുവതിയുടെ മൃതദേഹം പോസ്റ്റ്‌മോര്‍ട്ടം ചെയ്യാന്‍ അയച്ചിരിക്കുകയാണെന്നും കൂടുതല്‍ നടപടികള്‍ റിപ്പോര്‍ട്ട് പുറത്തുവന്നതിന് ശേഷം സ്വീകരിക്കുമെന്നും പൊലീസ് വ്യക്തമാക്കി.