പ്രധാനമന്ത്രി നരേന്ദ്രമോദി വീണ്ടും പ്രധാനമന്ത്രിയാകുന്നതില്‍ എന്‍.ഡി.എ യിലെ ചില കക്ഷികള്‍ക്ക് വിയോജിപ്പ്. കേന്ദ്ര മാനവവിഭവ സഹമന്ത്രിയും ആര്‍.എല്‍.എസ്.പി അധ്യക്ഷനുമായ ഉപേന്ദ്ര കുശ്വാഹയാണ് ഇക്കാര്യം വെളിപ്പെടുത്തിയത്. എന്നാൽ തന്റെ പാര്‍ട്ടിക്ക് മോദി വീണ്ടും ഭരണത്തില്‍ വരണം എന്നാണ് ആഗ്രഹമെന്നും അദ്ദേഹം പറഞ്ഞു.

അതേസമയം സഖ്യകക്ഷി നേതാക്കളുടെ പേര് വെളിപ്പെടുത്താന്‍ അദ്ദേഹം തയ്യാറായില്ല. എന്നാല്‍ സമയം വരുമ്പോള്‍ എല്ലാം എല്ലാവര്‍ക്കും വെളിപ്പെടുമെന്നും അദ്ദേഹം പറഞ്ഞു. എന്‍ ഡി എക്കുള്ളില്‍ കലഹമുണ്ടാകാന്‍ കുപ്രചാരണങ്ങള്‍ അഴിച്ചുവിടുന്നത് ഇത്തരക്കാരാണെന്നും അദ്ദേഹം കൂട്ടിച്ചേര്‍ത്തു.

ഉപേന്ദ്രയും പാര്‍ട്ടിയും എന്‍ഡിഎ സഖ്യം വിടുന്നതായി നേരത്തെ വാര്‍ത്തകളുണ്ടായിരുന്നു. എന്നാല്‍ ഈ വാര്‍ത്തകള്‍ക്ക് യാതൊരു അടിസ്ഥാനവുമില്ലെന്ന് അദ്ദേഹം വ്യക്തമാക്കി. ലോക്‌സഭ തെരഞ്ഞെടുപ്പിലുള്ള സീറ്റ് ചര്‍ച്ചകളിലേയ്ക്ക് കടന്നിരിക്കുകയാണ് ബിഹാറിലെ എന്‍ഡിഎ ഇപ്പോള്‍. സീറ്റ് ചര്‍ച്ചകള്‍ക്കായി പട്‌നയില്‍ എത്തിയപ്പോഴായിരുന്നു ആര്‍എസല്‍സിപി നേതാവായ ഉപേന്ദ്ര കുഷ്വാഹയുടെ വിവാദ പ്രസ്താവന. ജെഡിയുവും എല്‍ജെപിയും കഴിഞ്ഞാല്‍ ബിഹാറില്‍ ബിജെപിയുടെ പ്രധാന സഖ്യ കക്ഷിയാണ് ആര്‍എല്‍എസ്പി.

ആര്‍.ജെ.ഡിയുമായി സഖ്യം കൂടുമെന്ന തരത്തില്‍ കഴിഞ്ഞയാഴ്ച കുശ്‌വാഹ പ്രസ്താവന നടത്തിയിരുന്നു. ‘യാദവരില്‍ നിന്നുള്ള പാലും കുശ്‌വാഹമാരില്‍ നിന്നുള്ള അരിയും ഉപയോഗിച്ച് നല്ല ‘ഖീര്‍’ ഉണ്ടാക്കാം’ എന്നായിരുന്നു ഉപേന്ദ്രയുടെ പ്രസ്താവന. എന്നാല്‍ മുന്നണിവിടുമെന്ന ഊഹാപോഹങ്ങള്‍ അദ്ദേഹം തള്ളിയിട്ടുണ്ട്. ഒരു പാര്‍ട്ടിയെയും ഉദ്ദേശിച്ചല്ലെന്നും മോദിയ്ക്ക് വോട്ടുകള്‍ കിട്ടാന്‍ പ്രയത്‌നിക്കുമെന്നും ഉപേന്ദ്ര പറഞ്ഞു.