കോണ്‍ഗ്രസ് അദ്ധ്യക്ഷന്‍ രാഹുല്‍ ഗാന്ധിയെ അധിക്ഷേപിച്ച്‌ കേന്ദ്രമന്ത്രി അശ്വിനി കുമാര്‍ ചൗബെ. രാഹുല്‍ മാലിന്യത്തിലെ പുഴുവാണെന്നും മാനസിക രോഗത്തിന് ചികിത്സ തേടേണ്ട സമയം അതിക്രമിച്ചെന്നും ചൗബെ പറഞ്ഞു. ബീഹാറില്‍ മാദ്ധ്യമപ്രവര്‍ത്തകരോട് സംസാരിക്കുന്നതിനിടയിലായിരുന്നു മന്ത്രിയുടെ വിവാദ പ്രസ്‌താവന.

മോദി ആകാശത്തിലെ നക്ഷത്രങ്ങളെ പോലെ തിളങ്ങുകയാണെന്നും കോണ്‍ഗ്രസ് അദ്ധ്യക്ഷനാകട്ടെ കേവലം കീടം മാത്രമാണെന്നുമായിരുന്നു മന്ത്രിയുടെ പ്രസ്‌താവന. റാഫേല്‍ കരാറുമായി ബന്ധപ്പെട്ട് മോദിക്കെതിരെ രാഹുല്‍ നടത്തിയ പരാമര്‍ശങ്ങളാണ് ചൗബെയെ പ്രകോപിതനാക്കിയത്. രാഹുല്‍ പ്രധാനമന്ത്രിയെ അപകീര്‍ത്തിപ്പെടുത്തുകയാണെന്നും ഇത്തരം നേതാക്കള്‍ ജനാധിപത്യത്തിന് അപമാനമാണെന്നും അദ്ദേഹം വ്യക്തമാക്കി. അതേസമയം, രാഹുലിനെതിരായ ചൗബെയുടെ പരാമ‌ര്‍ശത്തിനെതിരെ കോണ്‍ഗ്രസ് നേതാക്കളും ആര്‍.ജെ.ഡിയും രംഗത്തെത്തി. 'പണ്ഡിറ്റ് ശ്രീ ചൗബേ ബാബയെപോലുള്ള 'രത്ന'ങ്ങളെ മന്ത്രിസഭയിലെടുത്ത് രാജ്യത്ത് ഒരു പുതിയ സംസ്‌കാരം കെട്ടിപടുക്കുന്ന മോദിയെ ജനം തിരിച്ചറിയുമെന്ന് ട്വിറ്ററില്‍ തേജസ്വി യാദവ് കുറിച്ചു.