പഞ്ചാബില്‍ ജില്ലാ പഞ്ചായത്തുകളിലേക്കും പഞ്ചായത്ത് സമിതികളിലേക്കും നടന്ന തെരഞ്ഞെടുപ്പിന്റെ വോട്ടെണ്ണല്‍ ആരംഭിച്ചു. ഈ മാസം 19നാണ് പഞ്ചാബില്‍ പഞ്ചായത്ത് തെരഞ്ഞെടുപ്പ് നടന്നത്. തെരഞ്ഞെടുപ്പില്‍ ഭരണകക്ഷിയായ കോണ്‍ഗ്രസിന് മുന്‍തൂക്കം ലഭിക്കുന്നതായാണ് റിപ്പോര്‍ട്ടുകള്‍. 354 ജില്ലാ പഞ്ചായത്ത് അംഗങ്ങളേയും 2,900 പഞ്ചായത്ത് സമിതി അംഗങ്ങളെയുമാണ് വോട്ടെടുപ്പിലൂടെ സംസ്ഥാനത്ത് തിരഞ്ഞെടുക്കുക. 22 ജില്ലാ പഞ്ചായത്തുകളും 150 പഞ്ചായത്ത് സമിതികളുമാണ് സംസ്ഥാനത്തുള്ളത്.

നേരത്തെ ഭരണകക്ഷിയായ കോണ്‍ഗ്രസ് തെരഞ്ഞെടുപ്പില്‍ കൃത്രിമം കാണിക്കുന്നതായി പ്രതിപക്ഷ പാര്‍ട്ടിയായ ശിരോമണി അകാലിദള്‍ ആരോപിച്ചിരുന്നു. കോണ്‍ഗ്രസ് പ്രവര്‍ത്തകര്‍ ബൂത്തുകള്‍ പിടിച്ചെടുത്തതായും പോലീസ് നോക്കുകുത്തികളായി നിന്നതായും മുന്‍ മുഖ്യമന്ത്രി പ്രകാശ് സിങ് ബാദല്‍
ആരോപിച്ചു.
സംസ്ഥാനത്തിന്റെ പല ഭാഗങ്ങളും കോണ്‍ഗ്രസ് അകാലി പ്രവര്‍ത്തകര്‍ തമ്മിലുള്ള സംഘര്‍ഷങ്ങള്‍ റിപ്പോര്‍ട്ട് ചെയ്തിട്ടുണ്ട്. തെരഞ്ഞെടുപ്പിന് മുന്നോടിയായി 50000 പോലീസ് ഉദ്യോഗസ്ഥരെ സംസ്ഥാനത്ത് നിയോഗിച്ചിരുന്നു. കോണ്‍ഗ്രസും, എസ്.എ.ഡിബി.ജെ.പി മുന്നണിയും തമ്മിലാണ് പ്രധാന മത്സരം.