രാജ്യം ഉറ്റുനോക്കുന്ന ആധാര് കേസില് വിധി ഇന്ന് ; വിധി പറയുന്നത് ഭരണഘടന ബെഞ്ച്, പട്ടികജാതി സംവരണ കേസിലും വിധി ഇന്നുണ്ടാകും
രാജ്യം ഉറ്റുനോക്കുന്ന ആധാര് കേസില് ചീഫ് ജസ്റ്റിസ് അധ്യക്ഷനായ സുപ്രീംകോടതി ബെഞ്ച് ബുധനാഴ്ച വിധി പുറപ്പെടുവിക്കും. സുപ്രീംകോടതി നടപടിയുടെ തല്സമയ സംപ്രേഷണം സംബന്ധിച്ച കേസിലും സ്ഥാനക്കയറ്റത്തില് സംവരണം നിര്ബന്ധമല്ലെന്ന സുപ്രീംകോടതിയുടെ തന്നെ വിധി പുനഃപരിശോധിക്കണമെന്ന കേസിലും ഇന്ന് വിധിപറയും.
ഭരണഘടനയുടെ 110ാം അനുഛേദപ്രകാരം പണബില്ലായി കൊണ്ടുവന്നാണ് കേന്ദ്ര സര്ക്കാര് ആധാര് പാസാക്കിയത്. സര്ക്കാരിന്റെ അനുകൂല്യങ്ങള്ക്കടക്കം എല്ലാ മേഖലകളിലും ആധാര് നിര്ബന്ധമാക്കുന്നത് ഭരണഘടന വിരുദ്ധമാണെന്ന് ചൂണ്ടിക്കാട്ടി റിട്ട. ജസ്റ്റിസ് പുട്ടസ്വാമി, കല്ല്യാണി സെന് മേനോന് ഉള്പ്പടെയുള്ളവര് നല്കിയ ഹര്ജികളിലാണ് ഭരണഘടന ബെഞ്ച് വിധി പറയുക. 38 ദിവസം തുടര്ച്ചയായി വാദം കേട്ട കേസില് ആധാറിന്റെ ഭരണഘടന സാധുത, ആധാറിനായി ശേഖരിച്ച വിവരങ്ങള് സുരക്ഷിതമാണോ, ആധാര് സ്വകാര്യതയുടെ ലംഘനമാണോ എന്നീ വിഷയങ്ങള് ഭരണഘടന ബെഞ്ച് പരിശോധിച്ചു. പണബില്ലായാണ് കൊണ്ടുവന്നതെങ്കിലും നിയമമായി മാറിയ ആധാറിനെ എങ്ങനെ ചോദ്യം ചെയ്യാനാകുമെന്ന് കേസില് വാദം കേള്ക്കുന്നതിനിടെ കോടതി ചോദിച്ചിരുന്നു.
എന്നാല്, ഭരണഘടനവിരുദ്ധമായി സ്പീക്കര് തീരുമാനമെടുത്താല് അതില് കോടതിക്ക് ഇടപെടാമെന്നായിരുന്നു ഹര്ജിക്കാരുടെ വാദം. ആധാര് മൊബൈല് നമ്പരുമായും ബാങ്ക് അക്കൗണ്ടുമായും ബന്ധിപ്പിക്കുന്നതിനിടെ വാദം കേള്ക്കുന്നതിനിടെ കോടതി എതിര്ത്തിരുന്നു.
ലക്ഷക്കണക്കിന് ആളുകള് പട്ടിണി കിടക്കുന്ന രാജ്യത്ത് സ്വകാര്യതക്ക് അപ്പുറത്ത് ജനങ്ങളുടെ പട്ടിണി മാറ്റാന് അവകാശമുണ്ടെന്നായിരുന്നു കേന്ദ്ര സര്ക്കാരിന്റെ വാദം. ആധാറിനായി ശേഖരിച്ച ബയോമെട്രിക് വിവരങ്ങള് ആര്ക്കും ചോര്ത്താനാകില്ലെന്ന സ്ഥാപിക്കാന് ഭരണഘടന ബെഞ്ചില് യുഐഡിഐ പവര്പോയിന്റ് പ്രസന്റേഷന് നടത്തുകയും ചെയ്തിരുന്നു. 2048 എന്ക്രിപ്ഷന് കീ ഉപയോഗിച്ച് സംരക്ഷിക്കുന്ന ആധാര് വിവരങ്ങള് പ്രപഞ്ചമുള്ളിടത്തോളം ആര്ക്കും ഹാക്ക് ചെയ്യാനാകില്ലെന്ന് സ്ഥാപിക്കാനാണ് യുഐഡിഎ കോടതിയില് ശ്രമിച്ചത്.
ആധാര് പൗരന്റെ സ്വകാര്യതക്കുള്ള അവകാശത്തിന്റെയും ശരീരത്തിന്മേലുള്ള സ്വയം ഭരണാവകാശത്തിന്റെയും ലംഘനമാണോ എന്നും ആ നിലക്ക് ഭരണഘടനാവിരുദ്ധമാണോ എന്നുമുള്ള കാര്യങ്ങളില് സുപ്രീംകോടതി തീര്പ്പുകല്പിക്കും. ചീഫ് ജസ്റ്റിസ് ദീപക് മിശ്രക്ക് പുറമെ ജസ്റ്റിസുമാരായ എ.കെ. സിക്രി, എ.എം. ഖന്വില്കര്, ഡി.വൈ. ചന്ദ്രചൂഡ്, അശോക് ഭൂഷണ് എന്നിവരടങ്ങുന്ന ബെഞ്ചാണ് ആധാര് കേസ് കഴിഞ്ഞ മേയില് വാദം കേട്ട് വിധി പറയാനായി മാറ്റിവെച്ചത്.
"
https://www.facebook.com/Malayalivartha
