ഗാന്ധിജിയുടെ 150ാം ജന്മവാര്‍ഷികത്തോടനുബന്ധിച്ചു 129 തടവുകാരെ ഒക്ടോബര്‍ രണ്ടിനു ജാര്‍ഖണ്ഡ് സര്‍ക്കാര്‍ മോചിപ്പിക്കും. ജീവപര്യന്തം തടവില്‍ കഴിയുന്നവരാണ് മോചിതരാകുന്നത്. ഇവരില്‍ രണ്ടു പേര്‍ വനിതാ തടവുകാരാണ്. ജാര്‍ഖണ്ഡ് മുഖ്യമന്ത്രി രഘുബര്‍ ദാസിന്റെ അധ്യക്ഷതയില്‍ ചേര്‍ന്ന ശിക്ഷാ പുനരവലോകന സമിതി യോഗത്തിലെടുത്ത തീരുമാന പ്രകാരമാണു ശിക്ഷായിളവ്.

ഒക്ടോബര്‍ രണ്ടിനു രാവിലെ ജയിലുകളില്‍ നടക്കുന്ന പ്രത്യേക ചടങ്ങില്‍ തടവുകാരെ മോചിപ്പിക്കും. മോചിതരാകുന്നവരില്‍ രാഷ്ട്രീയത്തടവുകാരോ കുപ്രസിദ്ധരോ ഇല്ല. കഴിഞ്ഞ ഏപ്രിലില്‍ ജാര്‍ഖണ്ഡ് ശിക്ഷാ പുനരവലോകന സമിതി 221 തടവുകാര്‍ക്ക് ശിക്ഷയിളവ് നല്‍കാന്‍ തീരുമാനം എടുത്തിരുന്നു.