ഹിന്ദു സ്ത്രീകളുടെ സംരക്ഷണം ഉറപ്പ് വരുത്താന് ശ്രീരാമ സേനയ്ക്കിനി പുതിയ വനിതാ നേതാവ് ബംഗളൂരുവിന്റെ ലേഡി ഡോണ്, 'മീറ്റര് ബഡി'!
ബംഗളൂരിന്റെ ലേഡി ഡോണ് എന്നറിയപ്പെടുന്ന യശ്വസിനി മഹേഷ് എന്ന മുനിയമ്മ ഇനി ശ്രീരാമ സേനയുടെ വനിതാ വിഭാഗത്തെ നയിക്കും.
'യശ്വസിനി കുറ്റം തെളിയിച്ച് ശിക്ഷിക്കുന്നത് വരെ നിരപരാധിയാണ്, ഹിന്ദു സ്ത്രീകളുടെ ഉന്നമനത്തിന് വേണ്ടിയാണ് അവരെ ഞങ്ങളുടെ സംസ്ഥാന നേതാക്കള് തെരഞ്ഞെടുത്തത്. ഞാനവര്ക്ക് അനുവാദം കൊടുത്തു. അവരെ പാര്ട്ടിയിലേക്ക് ഞങ്ങള് വളരെയധികം സന്തോഷത്തോടു കൂടി തന്നെ സ്വാഗതം ചെയ്യുന്നു'; ശ്രീരാമ സേനയുടെ സ്ഥാപകന് പ്രമോദ് മുത്തലിക്ക് യശ്വസിനിയെ പാര്ട്ടിലെടുത്തതിനെ കുറിച്ച് പറയുന്നു.
ബസവനഗുഡി പോലീസ് സ്റ്റേഷനില് നിരവധി കേസുകളാണ് മുനിയമ്മക്കെതിരെയുള്ളത്. ഉയര്ന്ന പലിശക്ക് കടം കൊടുത്തതിനും, കൊലപാതക ശ്രമത്തിനും, ചെയിന് മോഷണത്തിനും, പിടിച്ചു പറിക്കും മുനിയമ്മക്കെതിരെ നിരവധി പരാതികളാണുള്ളത്. സാധാരണക്കാരായ ആളുകള്ക്ക് മുനിയമ്മക്കെതിരെ കേസ് രജിസ്റ്റര് ചെയ്യാന് വരെ ഭയമായിരുന്നു എന്ന് പോലീസ് പറയുന്നു. 'മീറ്റര് ബഡി' എന്ന പ്രാദേശിക പേരിലാണ് മുനിയമ്മ ബെംഗളൂരില് അറിയപെടുന്നത്. തന്റെ പക്കല് നിന്നും കടം വാങ്ങിയവര്ക്ക് അത് പറഞ്ഞ സമയത്ത് തിരികെ തരാന് കഴിഞ്ഞില്ലെങ്കില് കാശ് തിരികെ കിട്ടാനായി അവര് ഉപയോഗിക്കുന്നഭാഷ സാധാരണക്കാര്ക്ക് കേട്ടുനില്ക്കാനാവാത്ത തരത്തിലുള്ളതാണെന്ന് പോലീസ് പറയുന്നു.
മുനിയമ്മയുടെ ശ്രീരാമസേനയിലേക്കുള്ള കടന്ന് വരവ് ഒരിക്കലും അവര്ക്ക് നേരെയുള്ള ചാര്ജ് ഹിസ്റ്ററി ഷീറ്റ് മറക്കാന് പര്യാപ്തമല്ലെന്നാണ് പോലീസ് പറയുന്നത്. കേസുകളില് നിന്നെല്ലാം കുറ്റവിമുക്തയായി പുറത്ത് വരുമെന്നും ഹിന്ദു സ്ത്രീകളുടെ സംരക്ഷണം ഉറപ്പ് വരുത്തി ഹിന്ദുത്വം മുറുകെ പിടിക്കുമെന്നും മുനിയമ്മ പറയുന്നു.
ഭര്ത്താവിനും സഹോദരങ്ങള്ക്കുമൊപ്പമാണ് മുനിയമ്മ തന്റെ സാമ്രാജ്യം സംരക്ഷിക്കുന്നത്. താഴെ തട്ടിലും ഇടത്തട്ടിലുമുള്ള സ്ത്രീകളാണ് മുനിയമ്മയുടെ സ്ഥിരം 'ഉപഭോക്താക്കള്'. 2012-ല് മുനിയമ്മക്കെതിരെ ബസവനഗുഡി പോലീസ് ഒരു ചാര്ജ് ഹിസ്റ്ററി ഷീറ്റ് തന്നെ തുറന്നിരുന്നു.
എന്നാല് ഒരു സബ്ഇന്സ്പെക്ടുടെ കൃത്യവിലോപത്തിനെതിരെ തന് പരാതി നല്കിയതിനെ തുടര്ന്നാണ് തന്റെ പേരില് പരാതികള് രജിസ്റ്റര് ചെയ്യാന് തുടങ്ങിയതെന്നും ഇവയെല്ലാം അടിസ്ഥാനരഹിതമാണെന്ന് താന് നിയമത്തിനു മുന്നില് തെളിയിക്കും എന്നാണ് മുനിയമ്മ പറയുന്നത്.
തനിക്കെതിരേ കേസുകള് ഉണ്ടെന്നു കരുതി അത് തെറ്റാണെന്ന് തെളിയുന്നതു വരെ ജനസേവനത്തില് നിന്നും മാറിനില്ക്കേണ്ടതുണ്ടോ എന്നാണ് മുനിയമ്മയുടെ ചോദ്യം.
നിരവധി കേസുകളില് പ്രതിയായ മുനിയമ്മ രണ്ട് പ്രാവശ്യം പോലീസ് കസ്റ്റഡിയില് നിന്നും രക്ഷപെട്ടിട്ടുണ്ടെന്നും ഇപ്പോള് കോടതി പരിഗണനയിലുള്ള കേസാണതെന്നും വേറെയും കേസുകള് നടന്ന് കൊണ്ടിരിക്കുകയാണെന്നും മുതിര്ന്ന പോലീസ് ഉദ്യോഗസ്ഥന് പറയുന്നു.
https://www.facebook.com/Malayalivartha
