സന്തോഷകരമല്ലാത്ത വിവാഹ ജീവിതത്തില്‍ വിവാഹേതര ബന്ധങ്ങള്‍ ഉണ്ടായേക്കാം സുപ്രീംകോടതി. വ്യക്തി സ്വതന്ത്ര്യവും, വിവാഹേതര ബന്ധങ്ങളും ഇഴപിരിഞ്ഞു കിടക്കുന്നതാണ്. പ്രായപൂര്‍ത്തിയായ സ്ത്രീക്കും പുരുഷനും ഒരുമിച്ച് ലൈംഗികത ആസ്വദിക്കാന്‍ വിവാഹം ഇനി തടസ്സമല്ല. സ്ത്രീയുടെ അധികാരി ഭര്‍ത്താവല്ല എന്ന കോടതിയുടെ കണ്ടെത്തല്‍ ഇന്ത്യന്‍ ധാര്‍മികതയ്ക്കും, സംസ്‌ക്കാരത്തിനും പുതിയ മാനങ്ങള്‍ നല്കും. ഇത് കപട സദാചാരവാദികള്‍ക്കും, ഐ.പി.സി. 497 വകുപ്പുപയോഗിച്ച് നിരപരാധികളെ ക്രൂശിക്കുന്ന പോലീസിനും മുഖമടച്ചുള്ള അടിയാണ്.

ചരിത്രം ഇവിടെ തിരുത്തപ്പെടുന്നു വ്യക്തി സ്വാതന്ത്ര്യം ഇന്ത്യയില്‍ തിരിച്ചുവരുന്നു. ഐ.പി.സി. 497 വിവേചനപരമെന്ന് കോടതി നിരീക്ഷിച്ചു. ഒരു ഭര്‍ത്താവിനൊപ്പം കൂട്ടിച്ചേര്‍ക്കേണ്ട ആളല്ല ഭാര്യ. ഒരു കെട്ടിടത്തിന്റെ അനക്‌സ് പോലെയല്ല സ്ത്രീ. ഇനി വിവാഹേതര ബന്ധം കുറ്റകരമല്ല എന്ന് വിധി പ്രസ്താവനയില്‍ കോടതി പറഞ്ഞു സന്തോഷകരമല്ലാത്ത വിവാഹജീവിതത്തില്‍ ഒരു പക്ഷേ വിവാഹേതര ബന്ധങ്ങള്‍ കടന്നുവരാം.

ഇന്ത്യയുടെ പാരമ്പര്യം, സമ്പ്രദായം തുടങ്ങിയ തടസ്സവാദങ്ങള്‍ സര്‍ക്കാര്‍ ഉന്നയിച്ചെങ്കിലും കോടതി അത്തരം തടസ്സങ്ങള്‍ മുഖവിലയ്‌ക്കെടുത്തില്ല. വിവാഹേതര ലൈംഗികബന്ധം ഇനി ക്രിമിനല്‍ കുറ്റമല്ലെങ്കിലും, സിവില്‍ കോടതികളിലെ വിവാഹബന്ധം വേര്‍പെടുത്താനുള്ള കേസുകളില്‍ ഇത്തരം കാര്യങ്ങള്‍ ഉന്നയിക്കാന്‍ അവകാശമുണ്ടാകും. 150 വര്‍ഷങ്ങള്‍ക്കു മുന്‍പ് നിലനില്ക്കുന്ന കാലഹരണപ്പെട്ട ഒരു വകുപ്പാണ് സുപ്രീം കോടതി എടുത്തുകളഞ്ഞത്. സ്ത്രീക്കു ജീവിക്കാനുള്ള അവകാശത്തെ ഹനിക്കുന്നതാണ് ഈ വകുപ്പെന്ന് കോടതി വിധിന്യായത്തില്‍ പറയുന്നു.

പുതുയുഗത്തില്‍ ഇന്ത്യയില്‍ സദാചാരത്തിന്റെ പേരിലും, ധാര്‍മികതയുടെ പേരിലും വ്യക്തി സ്വാതന്ത്ര്യം ഹനിക്കുന്ന നിരവധി സംഭവങ്ങളുമുണ്ടാകുന്നു. ആള്‍ക്കൂട്ട ശിക്ഷയും, വിചാരണയും പതിവാണ്. ഐ.പി.സി. 497 എന്ന വകുപ്പുപയോഗിച്ച് പോലീസും പലപ്പോഴും ഇത്തരം പീഡിതരെ വീണ്ടും ദ്രോഹിക്കുകയും ചെയ്യുന്ന വിചിത്ര കാഴ്ചയായിരുന്നു ഇന്നലെ വരെ നമ്മള്‍ കണ്ടത്. ഭര്‍ത്താവിന്റെ അനുമതിയോടെ മാത്രമേ ഒരു സ്ത്രീ മറ്റൊരാളുമായി ലൈംഗികബന്ധം പുലര്‍ത്താവൂ എന്ന വിചിത്ര വകുപ്പാണ് കോടതി റദ്ദാക്കിയിരിക്കുന്നത്. ഇനി ഭാരതത്തില്‍ തുല്യാവകാശവും, തുല്യനീതിയും പുലരും. പോലീസും, സര്‍ക്കാരും കപട സദാചാര ക്രിമിനലുകളെ ഗുണ്ടകളെപോലെ കൈകാര്യം ചെയ്യേണ്ടതാണ്. വിവാഹ ജീവിതത്തിലെ വിശുദ്ധിയും, പവിത്രതയും വ്യക്തികള്‍ തീരുമാനിക്കേണ്ടതാണ്. നിയമങ്ങള്‍കൊണ്ട് അടിച്ചേല്പിക്കേണ്ടതല്ല. ലൈംഗികത മനുഷ്യന്റെ അനിവാര്യതയാണ്. ഏതെങ്കിലും കാരണത്താല്‍ വിവാഹജീവിതത്തില്‍ അതിനു തടസ്സമുണ്ടായാല്‍ ലൈംഗികത വ്യക്തി സ്വാതന്ത്ര്യമാണ്.

വിവാഹ ജീവിതത്തിലെ വിശ്വാസ്യതയും, സ്വാതന്ത്ര്യം വ്യക്തികള്‍ക്കു തീരുമാനമെടുക്കാവുന്ന തലങ്ങളാണ്. ഇത് ഇന്ത്യയില്‍ സ്വാതന്ത്ര്യത്തിന്റെ പുതിയ തുടക്കമാണ്.