ജേഴ്‌സി പോലുള്ള വിദേശ ഇനം പശുക്കളുടെ പാല്‍ മനുഷ്യന്റെ ആരോഗ്യത്തിനു ഹാനികരമാണെന്ന് ഹിമാചല്‍ പ്രദേശ് ഗവര്‍ണര്‍ ആചാര്യ ദേവ് വ്രത്. വിദേശ ഇനത്തിലുള്ള പശുക്കളുടെ പാല്‍ രക്ത സമ്മര്‍ദംകൂട്ടുമെന്നും മനുഷ്യരില്‍ അക്രമണവാസന ഉണ്ടാക്കുമെന്നുമാണ് അദ്ദേഹത്തിന്റെ കണ്ടെത്തല്‍. നാടന്‍ പശുവിന്റെ പാല്‍ കുടിക്കുന്നതാണ് ആരോഗ്യത്തിനു ഉത്തമമെന്നാണ് അദ്ദേഹത്തിന്റെ ഉപദേശം  'സനാതന ഹിന്ദു ധര്‍മത്തില്‍ പശുക്കളുടെ പ്രാധാന്യം' എന്ന വിഷയത്തില്‍ ഗോരഖ്‌നാഥ് ക്ഷേത്രത്തില്‍ പ്രസംഗിക്കവെയാണു ഗവര്‍ണറുടെ പരാമര്‍ശം.

300 പശുക്കളുളള തന്റെ ഹരിയാനയിലെ ഫാമില്‍ രൂപപ്പെടുത്തുകയും പരീക്ഷിച്ചു വിജയപ്പെടുത്തുകയും ചെയ്ത 'ജീവ് അമൃത്' എന്ന ജൈവ വളത്തെക്കുറിച്ചും അദ്ദേഹം സംസാരിച്ചു. നാടന്‍ പശുവിന്റെ ചാണകവും മൂത്രവും ഉപയോഗിച്ച് നിര്‍മ്മിച്ച വളത്തിന്റെ ഗുണത്തെപ്പറ്റിയും വിശദീകരിച്ചു. ഈ വളം മണ്ണിന്റെ സന്തുലിതാവസ്ഥ കൂട്ടുമെന്നും ഇതുവഴി മണ്ണിരയുടെ ഉല്‍പ്പാദനം വര്‍ധിക്കുമെന്നും, ഇത് കൃഷിക്ക ഏറെ ഗുണം ചെയ്യുമെന്നും അദ്ദേഹം പറഞ്ഞു. ഇത്തരത്തില്‍ വിജയിച്ച പദ്ധതി കര്‍ഷകരെ പരിശീലിപ്പിക്കുന്നതിനായി 25 കോടി രൂപയുടെ പദ്ധതി ഹരിയാന സര്‍ക്കാര്‍ ആവിഷ്‌ക്കരിച്ചിട്ടുണ്ട്

ഒരു നാടന്‍ പശുവിന്റെ ചാണകവും മൂത്രവും ഉപയോഗിച്ച് 30 ഏക്കര്‍ ഭൂമിയില്‍ കൃഷി ചെയ്യാന്‍ സാധിക്കും. എന്നാല്‍ വിദേശ ഇനത്തില്‍പ്പെട്ട 20 ജേഴ്‌സിയും ഹോള്‍സ്റ്റീന്‍ െ്രെഫസിയറും ഉണ്ടെങ്കില്‍ മാത്രമേ ഒന്നരയേക്കറിലേക്കുളള വളം നിര്‍മ്മിക്കാന്‍ സാധ്യമാവുകയുളളൂ. നാടന്‍ പശുവിന്റെ ഒരുഗ്രാം ചാണകത്തില്‍ രണ്ടു മുതല്‍ അഞ്ചരലക്ഷം കോടി വരെ ജൈവാണുക്കളുണ്ട്. എന്നാല്‍ വിദേശ ഇനങ്ങളുടെ ചാണകത്തില്‍ ഇത് 60 ലക്ഷം മുതല്‍ 70 ലക്ഷം വരെ മാത്രമാണുളളത്.

തന്റെ നേതൃത്വത്തില്‍ മൂന്ന് യൂണിവേഴ്‌സിറ്റികളിലായി നടത്തിയ പഠനത്തില്‍ നാടന്‍ പശുക്കളുടെ ചാണകത്തില്‍ സൂക്ഷ്മ ജൈവാണുക്കളുടെ അളവ് വിദേശ ഇനങ്ങളെ അപേക്ഷിച്ച് വളരെ കൂടുതലാണെന്നും കണ്ടെത്തിയിട്ടിട്ടുണ്ടെന്നും ആചാര്യ ദേവ് വ്രത് കൂട്ടിച്ചേര്‍ത്തു. ഗോരഖ്‌നാഥ് ക്ഷേത്രത്തിലെ മുന്‍ പൂജാരിമാരായ ദിഗ് വിജയനാഥ് , അവയ്ദ്യനാഥ് എന്നിവരുടെ വാര്‍ഷിക അനുസ്മരണം സംബന്ധിച്ച പരിപാടി നടക്കുന്ന വേളയിലാണ് വെളിപ്പെടുത്തല്‍. ഇപ്പോഴത്തെ പൂജാരിയായ ഉത്തര്‍ പ്രദേശ് മുഖ്യമന്ത്രി യോഗി ആദിത്യനാഥും ചടങ്ങില്‍ സന്നിഹിതനായിരുന്നു.