ജനങ്ങളുടെ ചിന്താരീതികള് മാറേണ്ടിയിരിക്കുന്നു; പഴക്കംചെന്ന ആചാരങ്ങള് എപ്പോഴും ശരിയായിരിക്കണമെന്നില്ല; ശബരിമലയില് സ്ത്രീകള്ക്ക് പ്രവേശനം അനുവദിച്ച സുപ്രീം കോടതി വിധിയെ സ്വാഗതം ചെയ്ത് തൃപ്തി ദേശായി
ശബരിമലയില് സ്ത്രീകള്ക്കും പ്രവേശിക്കാമെന്ന സുപ്രീം കോടതിയുടെ വിധിയെ സ്വാഗതം ചെയ്ത് തൃപ്തി ദേശായി. വിധി സ്ത്രീകളുടെ വിജയമാണെന്ന് പ്രതികരിച്ച അവര് പഴക്കം ചെന്ന ആചാരങ്ങളുമായി ബന്ധപ്പെട്ടുള്ള ജനത്തിന്റെ ചിന്താരീതികള് മാറ്റണമെന്നും ആവശ്യപ്പെട്ടു.
ഭൂമാതാ ബ്രിഗേഡ് എന്ന സ്ത്രീ വിമോചന പ്രസ്ഥാനത്തിന്റെ നേതാവായ തൃപ്തിയുടെ ശ്രമഫലമായിട്ടാണ് ഹാജി അലി ദര്ഗ്ഗയില് സ്ത്രീകള്ക്ക് പ്രവേശിക്കാനായത്. ശബരിമലയിലെ സ്ത്രീപ്രവേശന വിഷയം ദേശീയതലത്തിലേക്ക് കൊണ്ട് വന്നതിലും തൃപ്തി ദേശായി വലിയ പങ്കാണ് വഹിച്ചത്.
ജനങ്ങളുടെ ചിന്താരീതികള് മാറേണ്ടിയിരിക്കുന്നു. പഴക്കംചെന്ന ആചാരങ്ങള് എപ്പോഴും ശരിയായിരിക്കണമെന്നില്ല. ഈ വിധി എല്ലാ സ്ത്രീകള്ക്കുമായി ലഭിച്ച വലിയ വിജയമാണ്. തൃപ്തി പറഞ്ഞു.
നേരത്തെ വിലക്ക് ലംഘിച്ചും ശബരിമലയില് പ്രവേശിക്കുമെന്ന് തൃപ്തി ദേശായി പ്രഖ്യാപിച്ചിരുന്നു. ഹാജി അലി ദര്ഗ, ത്രൈയംബകേശ്വര് ക്ഷേത്രം, ശനി ശിംഘനാപൂര് ക്ഷേത്രം എന്നിവിടങ്ങളില് തൃപ്തി മറ്റ് സ്ത്രീകളോടൊപ്പം പ്രവേശിച്ചിരുന്നു.
ശബരിമല പ്രവേശനത്തിനായി കേരളത്തിലേക്ക് വരുമെന്ന് ഒരു വേള പ്രഖ്യാപിച്ചിരുന്നെങ്കിലും സോഷ്യല് മീഡിയയിലടക്കം ശക്തമായ വിമര്ശനവും ഭീഷണിയും നേരിട്ടതിനെ തുടര്ന്ന് അവര് ആ ശ്രമം ഉപേക്ഷിക്കുകയായിരുന്നു. അതേ സമയം വിധി അനുകൂലമായാല് ഉടന് ശബരിമലയിലേക്ക് ദര്ശനത്തിനായി എത്തുമെന്ന് അവര് ഒരു ദേശീയ മാദ്ധ്യമത്തിനോട് ഇന്ന് പ്രതികരിച്ചിരുന്നു.
https://www.facebook.com/Malayalivartha
