ലോകരാജ്യങ്ങള് പാകിസ്ഥാന്റെ ഈ ഇരട്ടത്താപ്പ് മനസിലാക്കണം; ഇന്ത്യഏറ്റവും കൂടുതല് ഭീഷണി നേരിടുന്നത് അയല്രാജ്യമായ പാകിസ്ഥാനില് നിന്നാണ്; ഐക്യരാഷ്ട്ര സഭയുടെ ജനറല് അസംബ്ലി യോഗത്തില് പാകിസ്ഥാനെതിരെ ആഞ്ഞടിച്ച് വിദേശകാര്യ മന്ത്രി സുഷമാ സ്വരാജ്
ഐക്യരാഷ്ട്ര സഭയുടെ ജനറല് അസംബ്ലി യോഗത്തില് തീവ്രവാദ വിഷയത്തില് പാകിസ്ഥാനെതിരെ ആഞ്ഞടിച്ച് വിദേശകാര്യ മന്ത്രി സുഷമാ സ്വരാജ്. ഇന്ത്യഏറ്റവും കൂടുതല് ഭീഷണി നേരിടുന്നത് അയല്രാജ്യമായ പാകിസ്ഥാനില് നിന്നാണ്. ഇത്തരക്കാരെ ലോകരാജ്യങ്ങള്ക്കിടയില് ഒറ്റപ്പെടുത്തുകയാണ് വേണ്ടത്. പാകിസ്ഥാന്റെ നിലപാട് കാരണമാണ് അവരുമായുള്ള ചര്ച്ച അവസാനിപ്പിച്ചത്. തീവ്രവാദികളെ മഹത്വത്കരിക്കുന്ന നിലപാടാണ് പാകിസ്ഥാന് സ്വീകരിക്കുന്നത്. മുംബയ് ഭീകരാക്രമണക്കേസിലെ മുഖ്യപ്രതിയെ പാകിസ്ഥാന് സംരക്ഷിക്കുകയാണെന്നും അവര് പറഞ്ഞു.
പ്രധാനമന്ത്രി നരേന്ദ്ര മോദിയുടെ നേതൃത്വത്തില് ഇന്ത്യ ലോകരാജ്യങ്ങള്ക്കിടയില് വളര്ന്ന് കൊണ്ടിരിക്കുകയാണ്. ഇന്ത്യയെ പിന്നോട്ടടിക്കുന്ന രണ്ട് ഘടകങ്ങള് തീവ്രവാദവും കാലാവസ്ഥാ വ്യതിയാനവുമാണ്. ദൗര്ഭാഗ്യകരമെന്ന് പറയട്ടെ, തീവ്രവാദ വിഷയത്തില് ഇന്ത്യയ്ക്ക് ഏറ്റവും കൂടുതല് ഭീഷണി സൃഷ്ടിക്കുന്നത് അയല്രാജ്യമാണ്. അമേരിക്കയുടെ സുഹൃത്തായ പാകിസ്ഥാന് തന്നെയാണ് പ്രതിയായ ഒസാമ ബിന് ലാദനെ ഒളിപ്പിച്ച് വച്ചത്. മുംബയ് ഭീകരാക്രമണത്തിന്റെ ബുദ്ധികേന്ദ്രം ഇപ്പോഴും പാകിസ്ഥാനില് സ്വതന്ത്രമായി നടക്കുകയാണ്. ലോകരാജ്യങ്ങള് പാകിസ്ഥാന്റെ ഈ ഇരട്ടത്താപ്പ് മനസിലാക്കണമെന്നും സുഷമ ആവശ്യപ്പെട്ടു.
പാകിസ്ഥാനുമായുള്ള സമാധാന ചര്ച്ചകള് ഇന്ത്യ തകര്ത്തുവെന്നാണ് ഇപ്പോള് ചിലര് ആരോപിക്കുന്നത്.എന്നാല് ഇക്കാര്യം ശുദ്ധനുണയാണ്. ഏറ്റവും സങ്കീര്ണമായ പ്രശ്നങ്ങള് പോലും ചര്ച്ചയിലൂടെ പരിഹരിക്കാമെന്നാണ് ഇന്ത്യ വിശ്വസിക്കുന്നത്. പാകിസ്ഥാനുമായുള്ള ചര്ച്ചകള് നിരവധി തവണ തുടങ്ങിയതുമാണ്. എന്നാല് ഇന്ത്യന് ജവാന്മാരെ പാകിസ്ഥാന് ആക്രമിച്ചത് കൊണ്ടാണ് ചര്ച്ചകള് നിലച്ചതെന്നും സുഷമ പറഞ്ഞു.
https://www.facebook.com/Malayalivartha
