രാഷ്ട്രപിതാവ് മഹാത്മാ ഗാന്ധിയുടെ 150ാം ജന്മവാര്‍ഷികം ആചരിച്ച് രാജ്യം. പ്രധാനമന്ത്രി നരേന്ദ്ര മോദി, രാഷ്ട്രപതി രാംനാഥ് കോവിന്ദ്, ഉപരാഷ്ട്രപതി വെങ്കയ്യ നായിഡു തുടങ്ങിയവര്‍ രാജ്ഘട്ടിലെ ഗാന്ധിജിയുടെ സമാധിസ്ഥലത്തെത്തി ആദരാഞ്ജലികള്‍ അര്‍പ്പിച്ചു.
ഗാന്ധിജിയുടെ150ാം ജന്മവാര്‍ഷികത്തില്‍ എല്ലാവരും മുന്നോട്ടു വന്ന് അദ്ദേഹത്തിന്റെ സ്വപ്നങ്ങള്‍ പൂര്‍ത്തീകരിക്കാന്‍ വേണ്ടി പ്രവര്‍ത്തിക്കണമെന്ന് പ്രധാനമന്ത്രി ട്വീറ്റ് ചെയ്തു. കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയും സോണിയാ ഗാന്ധിയും സമാധി സ്ഥലത്തെത്തി ആദരാഞ്ജലികള്‍ അര്‍പ്പിച്ചു. ഗാന്ധിജി പ്രതിമയല്ല, മറിച്ച് ഇന്ത്യ പാലിക്കുന്ന ആശയങ്ങളിലൂടെയും മൂല്യങ്ങളിലൂടെയും അദ്ദേഹം ഇന്നും ജീവിച്ചിരിക്കുന്നു. സത്യവും അഹിംസയും പുലര്‍ത്തുന്നതിനാണ് അദ്ദേഹം ജീവിച്ചത്, മരിച്ചതും അതിനുവേണ്ടിത്തന്നെ. അതാണ് ഇന്ത്യയുടെ ആണിക്കല്ലെന്നും യഥാര്‍ഥ രാജ്യസ്‌നേഹികള്‍ ഇവ കാത്തുസൂക്ഷിക്കണമെന്നും രാഹുല്‍ ട്വീറ്റ് ചെയ്തു. വിവിധ സംസ്ഥാനങ്ങളും ഗാന്ധിജയന്തി വിപുലമായി ആചരിച്ചു.