ഇന്ത്യയുടെ 40 ധീരജവാന്‍മാരുടെ ജീവനെടുത്ത ഭീകരവാദികള്‍ക്ക് ചെല്ലും ചെലവും കൊടുത്ത് വളര്‍ത്തിയ പാക്കിസ്ഥാനെ വെറുതെ വിടില്ലെന്ന് രാജ്യം. രാജ്യാന്തരതലത്തില്‍ പാക്കിസ്ഥാന ഒറ്റപ്പെടുത്തും. അതിന് ശേഷം ഉറി ആക്രമണത്തിന് നല്‍കിയ മറുപടിയേക്കാള്‍ ശക്തമായ ആക്രമണമായിരിക്കും നല്‍കുക എന്ന വ്യക്തമായ സൂചന പ്രധാനമന്ത്രി നരേന്ദ്രമോദി നല്‍കിക്കഴിഞ്ഞു. ഉത്തരവാദികളാരേയും വെറുതേ വിടില്ലെന്ന് പ്രധാനമന്ത്രി മുന്നറിയിപ്പും നല്‍കി. ജവാന്‍മാരെ കൊലപ്പെടുത്തിയ ഭീകരാക്രമണത്തിനെതിരെ രാജ്യത്താകമാനം വ്യാപക പ്രതിഷേധമാണ് ഉയരുന്നത്. അതിനാല്‍ ജനങ്ങളുടെ വികാരം മാനിക്കുന്നെന്നും പ്രധാനമന്ത്രി ഇന്ന് രാവിലെ നടത്തിയ പ്രസ്താവനയില്‍ പറയുന്നു. ആക്രമണത്തിന്റെ പശ്ചാത്തലത്തില്‍ 137 യുദ്ധവിമാനങ്ങള്‍ അതിര്‍ത്തിയില്‍ വിന്യസിച്ചിട്ടുണ്ട്.

സൈന്യം വായൂ ശക്തി എന്ന പേരില്‍ അഭ്യാസം നടത്താന്‍ നേരത്തെ തീരുമാനിച്ചിരുന്നെങ്കിലും ഭീകരാക്രമണത്തിന്റെ പശ്ചാത്തലത്തില്‍ പാക്കിസ്ഥാനെതിരായ മുന്നറിയിപ്പായി അത് മാറും. സായുധസേനാ ഹെലിക്കോപ്ടറുകളും അതിര്‍ത്തിയിലുണ്ട്. തിരിച്ചടിക്കുമെന്ന് കരസേനാ മുന്‍ ഉപമേധാവി ലഫ്. ജനറല്‍ ശരത് ചന്ദ് പറയുന്നു. എന്നാല്‍ ലോക്‌സഭാ തെരഞ്ഞെടുപ്പ് അടുത്തിരിക്കുന്ന സാഹചര്യത്തില്‍ യുദ്ധം ഒഴിവാക്കുമെന്നും അദ്ദേഹം പറയുന്നു. നമ്മള്‍ ശക്തരാണ്, നേരിടാന്‍ ശത്രുവിന് കഴിവില്ലാത്തത് കൊണ്ടാണ് ഭീകരാക്രമണം അഴിച്ചവിടുന്നത്. അതിനാല്‍ നയതന്ത്രപരമായ നീക്കംവേണം നടത്താന്‍. കാരണം പശ്ചിമേഷ്യന്‍ രാജ്യങ്ങളും പാകിസ്ഥാനും തമ്മില്‍ ന്ല്ലബന്ധമാണ്. ഇന്ത്യയും അമേരിക്കയും തമ്മിലുള്ള അടുപ്പം കാരണം പാക്കിസ്ഥാനുമായി റഷ്യ കൂടുതല്‍ അടുത്തിട്ടുണ്ടെന്നും അദ്ദേഹം ചൂണ്ടിക്കാട്ടുന്നു.

ഭീകരാക്രമണത്തിനുള്ള നിരവധി ശ്രമങ്ങളാണ് സൈന്യം ദിവസേന പരാജയപ്പെടുത്തുന്നത്. കാശ്മീരില്‍ തെരഞ്ഞെടുക്കപ്പെട്ട സര്‍ക്കാരില്ലാത്തതും കാര്യങ്ങള്‍ വഷളാക്കി. സൈനികതലത്തിലുള്ള പരാഹാരമല്ല കാശ്മീരില്‍ വേണ്ടതെന്ന് മുന്‍ ലഫ് ജനറല്‍ ചാക്കോ തരകന്‍ പറയുന്നു. രാഷ്ട്രീയ ചര്‍ച്ചകളിലൂടെയും നടപടികളിലൂടെയും ജനങ്ങളെ സര്‍ക്കാരിനൊപ്പം അണിനിരത്തുകയാണ് വേണ്ടത്. അതേസമയം പാക്കിസ്ഥാന് മറുപടിയും നല്‍കണം. പഠാന്‍കോട്ട്, ഉറി ആക്രമണങ്ങളില്‍ പാക്കിസ്ഥാന്റെ പങ്ക് വ്യക്തമാണ്. അവരുടെ അധീനതയിലുള്ള പാക്കിസ്ഥാനില്‍ നിരവധി തീവ്രവാദക്യാമ്പുകളാണുള്ളത്. അവര്‍ക്ക് വേണ്ട പരിശീലനവും സഹായവും നല്‍കുന്നത് പാക്ക് സൈന്യമാണ്. അതിനാല്‍ അന്താരാഷ്ട്ര തലത്തില്‍ അവരെ ഒറ്റപ്പെടുത്താനുള്ള സര്‍ക്കാരിന്റെ നീക്കം നല്ലതാണ്.

ഉറി ആക്രമണത്തിന് മറുപടിയായി പാക്കിസ്ഥാനിലെ ഭീകരക്യാമ്പുകളിലേക്ക് ഇന്ത്യ സര്‍ജിക്കല്‍ സ്‌ട്രൈക്ക് നടത്തിയത് അതീവരഹസ്യമായായിരുന്നു. ഒരു സൈനികന്‍ പോലും മരിക്കാതെയാണ് ഇന്ത്യ ആ ദൗത്യം പൂര്‍ത്തീകരിച്ചത്. അതിനാല്‍ ആ രീതിയിലുള്ള തിരിച്ചടി ഉണ്ടാകാനുള്ള സാധ്യത കൂടുതലാണ്. തൊണ്ണൂറുകളില്‍ അതിര്‍ത്തി കടന്നാണ് പാക് ഭീകരര്‍ എത്തിയിരുന്നത്. ഇന്നവര്‍ കാശ്മീരിലെ യുവാക്കളെ വഴിതെറ്റിച്ച് , പണവും ആയുധങ്ങളും നല്‍കി സൈന്യത്തിനെതിരെ തിരിച്ചുവിടുകയാണ്. അവരെ ഉപയോഗിച്ചാണ് ചാവേര്‍ ആക്രമണം അഴിച്ചുവിടുന്നത്. അതിനാല്‍ അവരെ ബോധവല്‍ക്കരിച്ച് രാജ്യത്തിനൊപ്പം നിര്‍ത്താനും പാക്കിസ്ഥാന് ശക്തമായ മറുപടി നല്‍കാനും ഇ്ന്ത്യയ്ക്ക് കഴിയണം. എങ്കിലേ കശ്മീരില്‍ സമാധാനം പുലരൂ....