പുല്വാമയില് ഭീകരാക്രമണത്തില് മരിച്ച മലയാളി സൈനികന് വയനാട് ലക്കിടി സ്വദേശി വി.വി.വസന്ത്കുമാറിന്റെ മൃതദേഹം കരിപ്പൂര് വിമാനത്താവളത്തില് എത്തിച്ചു
പുല്വാമയില് ഭീകരാക്രമണത്തില് മരിച്ച മലയാളി സൈനികന് വയനാട് ലക്കിടി സ്വദേശി വി.വി.വസന്ത്കുമാറിന്റെ മൃതദേഹം കരിപ്പൂര് വിമാനത്താവളത്തില് എത്തിച്ചു. ഉച്ചയ്ക്ക് രണ്ടോടെയാണ് മൃതദേഹം വിമാനത്താവളത്തില് എത്തിയത്. മലപ്പുറം ജില്ലാ കളക്ടര് അമിത് മീണ അടക്കമുള്ള ഉദ്യോഗസ്ഥര് ചേര്ന്നാണ് മൃതദേഹം ഏറ്റുവാങ്ങിയത്. കേന്ദ്രമന്ത്രി അല്ഫോണ്സ് കണ്ണന്താനം, മന്ത്രിമാരായ ഇ.പി.ജയരാജന്, എ.കെ.ശശീന്ദ്രന്, കെ.ടി.ജലീല് തുടങ്ങിയവരും വയനാട്, മലപ്പുറം, കോഴിക്കോട്, പാലക്കാട് ജില്ലകളിലെ ജനപ്രതിനിധികളും വിവിധ രാഷ്ട്രീയ പാര്ട്ടി നേതാക്കളും ഉള്പ്പടെ നിരവധി പേര് കരിപ്പൂര് വിമാനത്താവളത്തില് എത്തിയിരുന്നു.
വിമാനത്താവളത്തില് പ്രത്യേകം സജ്ജീകരിച്ച വേദിയില് മൃതദേഹം വച്ചു. തുടര്ന്ന് ഔദ്യോഗിക ബഹുമതികള് നല്കിയ ശേഷമാണ് വയനാട്ടിലേക്ക് മൃതദേഹം കൊണ്ടുപോയത്. കോഴിക്കോട് വഴിയാണ് മൃതദേഹം ജന്മനാടായ വയനാട്ടിലേക്ക് കൊണ്ടുപോകുന്നത്. രാമനാട്ടുകര ബൈപ്പാസിലെ തൊണ്ടയാണ് മൃതദേഹം അല്പസമയം പൊതുദര്ശനത്തിന് വയ്ക്കും. സൈന്യത്തിലെ മുതിര്ന്ന ഉദ്യോഗസ്ഥരും മൃതദേഹത്തെ അനുഗമിക്കുന്നുണ്ട്. വിലാപയാത്രയായി എത്തിക്കുന്ന മൃതദേഹം വസന്ത്കുമാര് പ്രാഥമിക വിദ്യാഭ്യാസം നടത്തിയ ലക്കിടി ഗവ.എല്പി സ്കൂളില് പൊതുദര്ശനത്തിനു വയ്ക്കും. പിന്നീടായിരിക്കും പൂക്കോടിലെ വീട്ടിലേക്കു കൊണ്ടുവരിക. വീട്ടിലെ ചടങ്ങുകള്ക്ക് ശേഷം തൃക്കൈപ്പറ്റ മുക്കംകുന്നിലെ തറവാട്ടുവളപ്പില് സംസ്കാരം നടത്തും
https://www.facebook.com/Malayalivartha
