കേന്ദ്രസര്‍ക്കാരിനെതിരായ ശിവസേനയുടെ മൂന്ന് വര്‍ഷത്തോളം നീണ്ട വിമര്‍ശനങ്ങള്‍ക്കു താത്ക്കാലിക പരിഹാരം. വരാനിരിക്കുന്ന ലോക്‌സഭാ, നിയമസഭാ തിരഞ്ഞെടുപ്പുകളില്‍ ശിവസേനയും ബിജെപിയും ഒരുമിച്ചു പോരാടും. ശിവസേനാ തലവന്‍ ഉദ്ധവ് താക്കറെയുടെ മുംബൈയിലെ വീട്ടിലെത്തി ബിജെപി ദേശീയ അധ്യക്ഷന്‍ അമിത് ഷാ ചര്‍ച്ച നടത്തി. അമിത് ഷായും ഉദ്ധവ് താക്കറെയും സംയുക്തമായി നടത്തിയ വാര്‍ത്താ സമ്മേളനത്തിലാണ് ഇക്കാര്യം അറിയിച്ചത്.

മഹാരാഷ്ട്രയില്‍ ശിവസേന 23 ഉം ബിജെപി 25 ഉം സീറ്റുകളിലേക്കു മല്‍സരിക്കാന്‍ ധാരണയായതായി മഹാരാഷ്ട്ര മുഖ്യമന്ത്രി ദേവേന്ദ്ര ഫട്‌നവിസ് പറഞ്ഞു. നിയമസഭാ തിരഞ്ഞെടുപ്പിലും ഇരു പാര്‍ട്ടികളും ഒരുമിച്ചു പോരാടുമെന്നും ഫട്‌നവിസ് പ്രതികരിച്ചു. ഈ വര്‍ഷം തന്നെ നടക്കാനിരിക്കുന്ന മഹാരാഷ്ട്ര നിയമസഭാ തിരഞ്ഞെടുപ്പില്‍ ഇരു കക്ഷികളും സീറ്റുകള്‍ തുല്യമായി വീതിക്കും. ഉത്തര്‍പ്രദേശ് കഴിഞ്ഞാല്‍ ഏറ്റവും കൂടുതല്‍ ലോക്‌സഭാംഗങ്ങളെ പാര്‍ലമെന്റിലേക്ക് അയക്കുന്നത് മഹാരാഷ്ട്രയില്‍ നിന്നാണ്, 48 പേര്‍. 2014ലെ പൊതു തിരഞ്ഞെടുപ്പില്‍ ബിജെപി 26 ഉം ശിവസേന 22 ഉം സീറ്റുകളിലാണു മല്‍സരിച്ചത്. മൂന്നു പതിറ്റാണ്ടായി തുടര്‍ന്നു വന്ന ബിജെപി ശിവസേന സഖ്യം 2014ലെ നിയമസഭാ തിരഞ്ഞെടുപ്പിലാണ് ഉലഞ്ഞത്.