ഇന്ത്യ ജീവിക്കുന്നത് ഈ നല്ല മനസുകളിലാണ്... മാതൃകയായി വ്യാപാരി; മകളുടെ വിവാഹത്തിനു കരുതിവച്ച തുകയില് 11 ലക്ഷം രൂപ കൊല്ലപ്പെട്ട ജവാന്മാരുടെ കുടുംബത്തിനും 5 ലക്ഷം രൂപ സൈനികര്ക്ക് വേണ്ടി പ്രവര്ത്തിക്കുന്ന സംഘടനയ്ക്കുമാണ് നല്കുന്നത്
പുല്വാമ ഭീകരാക്രമണത്തില് വീര ജവാന്മാരോടുള്ള ഐക്യദാര്ഢ്യം രാജ്യമെമ്പാടും അലയടിക്കുകയാണ്. അതിനിടെ വീരമ്യത്യുവരിച്ച സൈനികരുടെ കുടുംബത്തിന് സഹായം നല്കാനായി മകളുടെ വിവാഹ ആഘോഷങ്ങള്ക്കുള്ള പണം നല്കി വ്യാപാരി. വിവാഹ ആഘോഷങ്ങള് ഉപേക്ഷിച്ചാണ് പണം നല്കിയത്. സുറത്തിലെ വജ്രവ്യാപാരി ദീവാക്ഷി മനേക്കാണ് മകളുടെ വിവാഹത്തിനു കരുതിവച്ച തുകയില് 11 ലക്ഷം രൂപ കൊല്ലപ്പെട്ട ജവാന്മാരുടെ കുടുംബത്തിനും 5 ലക്ഷം രൂപ സൈനികര്ക്ക് വേണ്ടി പ്രവര്ത്തിക്കുന്ന സംഘടനയ്ക്കും നല്കാന് തീരുമാനിച്ചത്.
ഫെബ്രുവരി 5 നായിരുന്നു ദീവാക്ഷി മനേക്കിന്റെ മകള് ആമിയുടെ വിവാഹം. ഇതിന്റെ ഭാഗമായി സല്ക്കാരം സംഘടിപ്പിക്കാന് തീരുമാനിച്ചിരുന്നതിന്റെ തലേദിവസമാണ് പുല്വാമയില് ആക്രമണത്തെ തുടര്ന്ന് 44 ജവാന്മാര് വീരമ്യത്യു വരിച്ചത്. ഇതോടെ ആഘോഷങ്ങള് ഉപേക്ഷിച്ച് ജവാന്മാരുടെ കുടുംബത്തെ സഹായിക്കാന് ഇവര് തീരുമാനിക്കുകയായിരുന്നു. മനേക്കിന്റെ തീരുമാനത്തിന് സോഷ്യല് മീഡിയയില് നിന്നും മറ്റുള്ളവരില് നിന്നും വലിയ പിന്തുണയാണ് ലഭിച്ചിരിക്കുന്നത്.
പുല്വാമ ഭീകരാക്രമണത്തിനു പിന്നാലെ പാക്കിസ്ഥാനെതിരെ സമസ്ത മേഖലകളിലും നിയന്ത്രണങ്ങളും നിലപാടുകളും കടുപ്പിച്ച് ഇന്ത്യ രംഗത്തെത്തിയിട്ടുണ്ട്. പാക്കിസ്ഥാനുമായി ഇനി ക്രിക്കറ്റ് മത്സരങ്ങള്ക്കില്ലെന്ന് ഐപിഎല് ചെയര്മാന് രാജീവ് ശുക്ല പറഞ്ഞു. കേന്ദ്ര സര്ക്കാരിന്റെ ഭാഗത്തു നിന്ന് എന്തെങ്കിലും തരത്തിലുള്ള നിര്ദേശമുണ്ടായാല് മാത്രമേ ഇനിയൊരു മത്സരത്തേക്കുറിച്ച് ആലോചിക്കൂ എന്നും അദ്ദേഹം വ്യക്തമാക്കി.
നേരത്തെ പാക്കിസ്ഥാനുള്ള സൗഹൃദ രാഷ്ട്ര പദവി റദ്ദാക്കുക, അവിടെ നിന്ന് ഇറക്കുമതി ചെയ്യുന്ന സാധനങ്ങളുടെ കസ്റ്റംസ് തീരുവ 200 ശതമാനം വര്ധിപ്പിക്കുക, പാക് സിനിമാ താരങ്ങള്ക്കും പ്രവര്ത്തകര്ക്കും സമ്പൂര്ണ വിലക്കേര്പ്പെടുത്തുക, ഇന്ത്യയിലെ ഒന്നിലേറെ സ്റ്റേഡിയങ്ങളില് നിന്ന് പാക് ക്രിക്കറ്റ് താരങ്ങളുടെ ചിത്രങ്ങള് നീക്കം ചെയ്യുക തുടങ്ങിയ ശക്തമായ നടപടികള് ഇന്ത്യ സ്വീകരിച്ചിരുന്നു.
അതേസമയം പുല്വാമ ഭീകരാക്രമണത്തില് ശക്തമായി സൈന്യം തിരിച്ചടി തുടങ്ങി. പുല്വാമയില് ഭീകരര്ക്കെതിരെയുള്ള ഏറ്റുമുട്ടലില് മൂന്ന് ഭീകരരെയാണ് വധിച്ചത്. ഏറ്റുമുട്ടലില് 5 സൈനികരാണ് മരണമടഞ്ഞത്. ഏറ്റുമുട്ടലില് പുല്വാമയില് ഭീകരാക്രമണത്തിന്റെ സൂത്രധാരനെ സുരക്ഷാസേന വധിച്ചിരുന്നു. പതിനേഴ് മണിക്കൂറാണ് ഏറ്റുമുട്ടല് നീണ്ടത്.
മൂന്ന് ദിവസം മുന്പ് ഭീകരാക്രമണം നടന്ന പുല്വാമയില് കഴിഞ്ഞ ദിവസം രാത്രിമുതലാണ് തീവ്രവാദികളും സൈന്യവും തമ്മില് ഏറ്റുമുട്ടല് നടന്നത്. ഏറ്റുമുട്ടലില് അഞ്ച് സൈനികരാണ് വീരമൃത്യു വരിച്ചത്. പുല്വാമയിലെ പിംഗലാന് മേഖലയിലാണ് ഏറ്റുമുട്ടല് നടുക്കുന്നത്. പ്രദേശത്ത് തീവ്രവാദികള് ഉണ്ടെന്ന രഹസ്യവിവരത്തെ തുടര്ന്ന് സൈന്യം പ്രദേശം വളഞ്ഞതിനെ തുടര്ന്ന് ഭീകരര് സൈന്യത്തിന് നേരെ വെടിയുതിര്ക്കുകയായിരുന്നു. ഏറ്റുമുട്ടലിനിടയില് പ്രദേശവാസിയായ ഒരാളും കൊല്ലപ്പെട്ടിരുന്നു. പ്രദേശവാസികളോട് സൈന്യം സ്ഥലത്ത് നിന്ന് മാറുവാന് ആവശ്യപ്പെട്ടിട്ടുണ്ട്. പ്രദേശത്ത് സൈനിക നടപടികള് തുടരുകയാണ്.
അതേസമയം ഭീകരരെ വധിച്ചതില് മുന് കശ്മീര് പൊലീസ് ചീഫ് ശേഷ് പോള് സൈന്യത്തെ അഭിനന്ദിക്കുകയും വീരമൃത്യു വരിച്ച സൈനികര്ക്ക് ആദരാഞ്ജലികള് അര്പ്പിക്കുകയും ചെയ്ത് ട്വീറ്റ് ചെയ്തിരുന്നു.
"
https://www.facebook.com/Malayalivartha