എഐസിസി ജനറല്‍ സെക്രട്ടറി പ്രിയങ്ക ഗാന്ധിക്കെതിരെ രൂക്ഷ വിമര്‍ശനവുമായി ബിജെപി നേതാവ് സുബ്രഹ്മണ്യന്‍ സ്വാമി. പ്രിയങ്കയുടെ വിദ്യാഭ്യാസ യോഗ്യതയെ ചോദ്യം ചെയ്തായിരുന്നു സ്വാമിയുടെ വിമര്‍ശനം.

ജീസസ് ആന്റ് മേരി കോളേജില്‍ പഠിക്കുമ്പോള്‍ പ്രിയങ്ക ഹിന്ദിക്ക് തോറ്റ ആളാണെന്നും മോദിയെ കുറ്റം പറയാന്‍ പ്രിയങ്കയ്ക്ക് ഒരു അര്‍ഹതയുമില്ലെന്നും അതിനുള്ള വിദ്യാഭ്യാസ യോഗ്യത അവര്‍ക്കില്ലെന്നുമായിരുന്നു സുബ്രഹ്മണ്യന്‍ സ്വാമിയുടെ വിമര്‍ശനം. വാരാണസില്‍ മോദിക്കെതിരെ പ്രിയങ്ക മത്സരിക്കുന്നതിനെക്കുറിച്ചുള്ള ചോദ്യത്തിന് അവിടെ ആര്‍ക്ക് വേണമെങ്കിലും മത്സരിക്കാമെന്നും സ്വാമി പ്രതികരിച്ചു. ഗാന്ധി കുടുംബം ഒന്നടങ്കം രാജ്യത്തെ തകര്‍ക്കുകയാണ് ചെയ്തതെന്നും ബിജെപി നേതാവ് കുറ്റപ്പെടുത്തി.

രാഹുൽ ഗാന്ധിക്കെതിരെയും സുബ്രഹ്മണ്യന്‍ സ്വാമി നേരെത്തെ വിമർശനവുമായി രംഗത്ത് വന്നിരുന്നു. രാഹുലിന്റെ ഇന്ത്യന്‍ പൗരത്വം റദ്ദാക്കണമെന്ന് ബിജെപി നേതാവ് സുബ്രഹ്മണ്യന്‍ സ്വാമി ആവശ്യപ്പെട്ടു. 2004- 2006 സാമ്പത്തിക വര്‍ഷത്തില്‍ യുകെ പൗരന്‍ എന്ന നിലയില്‍ രാഹുല്‍ ഗാന്ധി ആദായ നികുതി നല്‍കിയിട്ടുണ്ട്. ഈ വിവരങ്ങള്‍ കണക്കിലെടുത്ത് രാഹുലിന്റെ ഇന്ത്യന്‍ പൗരത്വം റദ്ദാക്കണമെന്നാണ് ബിജെപി നേതാവ് ആവശ്യപ്പെട്ടു. രാഹുല്‍ ഗാന്ധി ബ്രീട്ടിഷ് പൗരനാണെന്ന് അമേത്തിയിലെ സ്വതന്ത്ര സ്ഥാനാര്‍ത്ഥി ധ്രുവ് ലാലിന്റെ അഭിഭാഷകന്‍ രവി പ്രകാശ് ആരോപണം ഉന്നയിച്ചിരുന്നു.

പ്രധാനമന്ത്രി നരേന്ദ്ര മോദിയുടെ മന്ത്രിമാർക്കു സാമ്പത്തികശാസ്ത്രത്തെക്കുറിച്ച് അടിസ്ഥാനവിവരം പോലുമില്ലെന്നു സുബ്രഹ്മണ്യൻ സ്വാമി മുൻപ് ആരോപിച്ചിരുന്നു. 2016 ൽ, അന്നത്തെ റിസർവ് ബാങ്ക് ഗവർണർ രഘുറാം രാജനെ പുറത്താക്കണമെന്നാവശ്യപ്പെട്ടു സ്വാമി പ്രധാനമന്ത്രിക്കു കത്തെഴുതിയിരുന്നു. രഘുറാം രാജൻ ‘മാനസികമായി ഇന്ത്യക്കാരനല്ലെ’ന്നും കരുതിക്കൂട്ടി ഇന്ത്യയുടെ സമ്പദ്‌വ്യവസ്ഥയെ തകർത്തെന്നുമായിരുന്നു സ്വാമിയുടെ പക്ഷം. ‘റിസർവ് ബാങ്ക് പലിശനിരക്കുകൾ കുത്തനെ കൂട്ടിയതു ചെറുകിട വ്യവസായമേഖലയെ തകർത്തുകളഞ്ഞു. ഇതു രാജ്യത്തെ തൊഴിലില്ലായ്മ വർധിപ്പിച്ചു. സമ്പദ്‌വ്യവസ്ഥ ആകെ കുളമായി. രഘുറാം രാജന് ഇതൊന്നും മനസ്സിലായതുപോലുമില്ല’ എന്നും സ്വാമി ആരോപണമുയർത്തിയിരുന്നു. രാജ്യത്തെ നിലവിലെ സാമ്പത്തിക നയങ്ങളൊന്നും കാര്യക്ഷമമല്ലെന്നും ശരിയായ നയങ്ങൾ രൂപപ്പെടുത്തിയെടുത്താൽ ചൈനയെ മറികടക്കാൻ ഇന്ത്യയ്ക്കു കഴിയുമെന്നും സുബ്രഹ്മണ്യൻ സ്വാമി ആരോപിച്ചിരുന്നു.