പെണ്‍കുട്ടികള്‍ ബലാല്‍സംഗം ചെയ്യപ്പെടാനുള്ള കാരണം അവര്‍ കാലുകള്‍ പുറത്തു കാണുന്ന തരത്തിലുള്ള ഇറക്കം കുറഞ്ഞ വസ്ത്രം ധരിക്കുന്നതാണെന്ന ധാരണ ഇപ്പോഴും വച്ചുപുലര്‍ത്തുന്ന ചിലരുണ്ട്. അത്തരത്തില്‍ ചിന്തിക്കുന്ന ഒരു മധ്യവയസ്‌കയെ ഒരു കൂട്ടം പെണ്‍കുട്ടികള്‍ ചേര്‍ന്ന് പാഠം പഠിപ്പിക്കുന്നതിന്റെ വീഡിയോ സാമൂഹികമാധ്യമങ്ങളില്‍ വൈറാലാവുകയാണ്. ഡല്‍ഹിയിലാണ് സംഭവം.

ശിവാനി ഗുപ്ത എന്ന ഫെയ്‌സ്ബുക്ക് ഉപയോക്താവാണ് തനിക്കുണ്ടായ അനുഭവത്തെ കുറിച്ച് ഫെയ്‌സ്ബുക്കില്‍ കുറിപ്പിട്ടിരിക്കുന്നതും സംഭവത്തിന്റെ വീഡിയോ പോസ്റ്റ് ചെയ്തിട്ടുമുള്ളത്. ശിവാനിയും സുഹൃത്തുക്കളും ഒരു ഭക്ഷണശാലയില്‍ ഇരിക്കുമ്പോഴായിരുന്നു സംഭവം.

ശിവാനി ഫെയ്‌സ്ബുക്ക് കുറിപ്പില്‍ ഇങ്ങനെ പറയുന്നു;

ഞാന്‍ ഇറക്കം കുറഞ്ഞ വസ്ത്രം ധരിച്ചതിന് എന്നെയും എന്റെ സുഹൃത്തുക്കളെയും ഒരു മധ്യവയസ്‌കയായ സ്ത്രീ അപമാനിച്ചു. ഭക്ഷണശാലയിലുണ്ടായിരുന്ന ഏഴു പുരുഷന്മാരോട് ഞങ്ങളെ ബലാല്‍സംഗം ചെയ്യാന്‍ ആവശ്യപ്പെട്ടു. ഇറക്കം കുറഞ്ഞ വസ്ത്രം ധരിച്ചിരിക്കുന്നതിനാല്‍ ബലാല്‍സംഗം ചെയ്യപ്പെടേണ്ടവരാണ് ഞങ്ങളെന്നായിരുന്നു അവരുടെ ചിന്ത.

തുടര്‍ന്ന് പെണ്‍കുട്ടികള്‍, മാപ്പു പറയണമെന്ന് ആ സ്ത്രീയോട് ആവശ്യപ്പെട്ടു. എന്നാല്‍ മാപ്പ് പറയാന്‍ സ്ത്രീ തയ്യാറായില്ല. മാത്രവുമല്ല അഭിപ്രായത്തില്‍ അവര്‍ ഉറച്ചുനില്‍ക്കുകയും ചെയ്തു. അതോടെ പെണ്‍കുട്ടികളില്‍ ഒരാള്‍ സംഭവം മൊബൈല്‍ ഫോണില്‍ പകര്‍ത്തി. പിന്നീട് ചൂടേറിയ വാഗ്വാദമാണ് പെണ്‍കുട്ടികളും സ്ത്രീയും തമ്മില്‍ നടന്നത്. മാപ്പ് പറയാന്‍ തയ്യാറല്ലെന്നും പോലീസിനെ വിളിക്കാനുമാണ് മധ്യവയസ്‌ക പറയുന്നത്. അതിനിടെ മറ്റൊരു സ്ത്രീ പെണ്‍കുട്ടികള്‍ക്ക് പിന്തുണയുമായെത്തി. ഇറക്കം കുറഞ്ഞ വസ്ത്രം ധരിച്ചതിന് പെണ്‍കുട്ടിയെ അപമാനിച്ചത് തെറ്റാണെന്നും മാപ്പ് പറഞ്ഞേ മതിയാകൂവെന്നുമായിരുന്നു അവരുടെ നിലപാട്. മറ്റൊരാള്‍ എങ്ങനെ വസ്ത്രം ധരിക്കണമെന്നതിനെ കുറിച്ച് ഇവിടെ കാണപ്പെടുന്ന ഒരു വ്യക്തിയ്ക്കും അഭിപ്രായം പറയാന്‍ അധികാരമില്ല എന്ന് ആ യുവതി ശക്തമായി വാദിച്ചു.

എന്നാല്‍ തന്റെ നിലപാടില്‍ നിന്ന് പിന്നാക്കം പോകാന്‍ മധ്യവയസ്‌ക തയ്യാറാകുന്നതേയില്ല. രണ്ടുവയസ്സുള്ള കുട്ടികള്‍ വരെ ബലാല്‍സംഗം ചെയ്യപ്പെടുന്നുണ്ടല്ലോ എന്ന് കൂട്ടത്തിലെ ഒരു പെണ്‍കുട്ടി ചോദിക്കുന്നതും വീഡിയോയില്‍ കാണാം. പിന്നീട് നീണ്ട വാദപ്രതിവാദങ്ങള്‍ക്ക് ഒടുവില്‍ മധ്യവയസ്‌ക പ്രതികരിക്കാന്‍ തയ്യാറാകുന്നു. അതിങ്ങനെ: ഹലോ സ്ത്രീകളെ മറ്റുള്ളവര്‍ കാണാന്‍ വേണ്ടി ഈ പെണ്‍കുട്ടികള്‍ ഇറക്കം കുറഞ്ഞ വസ്ത്രം ധരിക്കുന്നു. വൗ നല്ല കാര്യം. മറ്റൊന്നു കൂടി, ഈ പെണ്‍കുട്ടികളുടെ മാതാപിതാക്കള്‍ ഈ വീഡിയോ കാണുന്നുണ്ടെങ്കില്‍ ദയവായി ഈ പെണ്‍കുട്ടികളെ നിയന്ത്രിക്കൂ എന്നും പറഞ്ഞ് കടന്നുപോകയായിരുന്നു.