യുദ്ധമുണ്ടായാല്‍ അതിവേഗ സൈനികനീക്കം ലക്ഷ്യമിട്ട് ചൈനീസ് അതിര്‍ത്തിയിലേക്ക് ഇന്ത്യ തുരങ്കപാത നിര്‍മ്മിക്കുന്നു. ബ്രഹ്മപുത്ര നദിക്കടിയിലൂടെ 12 മുതല്‍ 15 കിലോമീറ്ററോളം ആയിരിക്കും നിര്‍ദിഷ്ട തുരങ്ക പാതയുടെ നീളം. അസമിലെ ദിസ്പൂരില്‍ നിന്ന് അരുണാചല്‍പ്രദേശില്‍ ബ്രഹ്മപുത്ര നദി പ്രവേശിക്കുന്ന സ്ഥലം വരെ തുരങ്കമുണ്ടാകും. തുരങ്കപാതയുടെ സര്‍വേ നടപടികള്‍ പൂര്‍ത്തിയായി.

അരുണാചല്‍ അതിര്‍ത്തിയിലേക്കുള്ള റോഡുകളും പാലങ്ങളും, യുദ്ധമുണ്ടായാല്‍ എളുപ്പത്തില്‍ ചൈനയ്ക്ക് ആക്രമിക്കാന്‍ കഴിയും എന്നത് മുന്നില്‍ കണ്ടാണ് തുരങ്കപാത നിര്‍മ്മിക്കാനുള്ള ആലോചന ഉണ്ടായത്. തുരങ്കത്തില്‍ കൂടി രഹസ്യമായി ഇന്ത്യാ-ചൈന നിയന്ത്രണ രേഖയിലേക്ക് സൈനികരെയും ആയുധങ്ങളെയും എത്തിക്കാന്‍ സാധിക്കും. ബ്രഹ്മപുത്ര നദിയുടെ അടിത്തട്ടില്‍ നിന്ന് 20 മുതര്‍ 30 മീറ്റര്‍ വരെ താഴ്ന്നാകും തുരങ്കം നിര്‍മിക്കുകയെന്നാണ് റിപ്പോര്‍ട്ട്. റോഡ്, റെയില്‍ പാത അല്ലെങ്കില്‍ രണ്ടും ചേര്‍ന്നത് എന്നിങ്ങനെയാണ് ഇപ്പോള്‍ പദ്ധതിയിലുള്ളത്.

നിര്‍മാണത്തിലെ പ്രതിസന്ധികള്‍ പരിഗണിച്ച് ഇതില്‍ വ്യത്യാസങ്ങള്‍ വരാം. നദിയുടെ അടിത്തട്ടില്‍ കൂടി തുരങ്കം നിര്‍മിക്കുമ്പോഴുള്ള സാഹചര്യങ്ങള്‍ പരിശോധിച്ച് എന്തുതരം തുരങ്കമാണ് വേണ്ടതെന്ന് പിന്നീട് തീരുമാനിക്കും.

അരുണാചല്‍ അതിര്‍ത്തി പ്രദേശങ്ങളിലേക്ക് എത്തിപ്പെടാന്‍ സൈന്യത്തിന് പ്രതിബന്ധമായി നിന്നത് ബ്രഹ്മപുത്ര നദിയായിരുന്നു. തുരങ്കം വരുന്നതോടെ പ്രതിസന്ധി വലിയൊരളവ് പരിഹരിക്കപ്പെടും.