കാണാതായ എഎന് 32 വിമാനത്തിലെ യാത്രക്കാരെല്ലാം മരിച്ചതായി വ്യോമസേന... മൃതദേഹങ്ങള് കണ്ടെത്താന് ശ്രമം തുടരുന്നു
അരുണാചല് പ്രദേശിലേക്കു പറക്കവേ കാണാതായ എഎന് 32 വിമാനത്തിലെ യാത്രക്കാരെല്ലാം മരിച്ചതായി വ്യോമസേന സ്ഥിരീകരിച്ചു. തെരച്ചില് സംഘം വിമാനം തകര്ന്ന പ്രദേശത്തെത്തിയ ശേഷമാണ് വ്യോമസേനയുടെ സ്ഥിരീകരണം. വിമാനം തകര്ന്നുവീണ പ്രദേശത്തേക്ക് ഹെലികോപ്റ്റര് ഇറക്കാന് സാധിക്കാത്തതിനെ തുടര്ന്ന് പാരച്യൂട്ടുകള് ഉപയോഗിച്ചാണ് ആളുകളെ ഇറക്കിയത്. മൃതദേഹങ്ങള് കണ്ടെത്താന് ശ്രമം തുടരുകയാണ്. ജോര്ഹട്ടില്നിന്നു മെന്ചുകയിലേക്കു 13 പേരുമായി പറന്ന വിമാനമാണു ജൂണ് മൂന്നിനു കാണാതായത്.
അരുണാചലിലെ ലിപോ മേഖലയിലെ വനത്തില് കഴിഞ്ഞ ദിവസം വിമാനത്തിന്റെ അവശിഷ്ടങ്ങള് കണ്ടെത്തി. വിമാനം തകര്ന്നുവീണ പ്രദേശത്ത് ഹെലികോപ്റ്ററുകള് എത്തിയെങ്കിലും ഉയര്ന്ന മലയും നിബിഡ വനപ്രദേശവുമായതിനാല് ഇറങ്ങാന് സാധിച്ചിരുന്നില്ല. റോഡ്മാര്ഗം ഇവിടേക്ക് എത്താനാകില്ല.
തകര്ന്നുവീണ വിമാനത്തില് മൂന്നു മലയാളി ഉദ്യോഗസ്ഥരുമുണ്ടായിരുന്നു. അഞ്ചല് സ്വദേശി ഫ്ളൈറ്റ് എന്ജിനിയര് അനൂപ്കുമാര്, തൃശൂര് അത്താണി സ്വദേശി സ്ക്വാഡ്രന് ലീഡര് വിനോദ്കുമാര്, കണ്ണൂര് സ്വദേശി എന്.കെ. ഷരിന് എന്നിവരാണു വിമാനത്തിലുണ്ടായിരുന്ന മലയാളികള്. പതിനൊന്ന് വര്ഷം മുന്പാണ് അനൂപ് സൈന്യത്തില് ചേര്ന്നത്. ഒന്നര മാസം മുമ്പാണ് അവസാനമായി നാട്ടിലെത്തിയത്. വൃന്ദയാണു ഭാര്യ. ആറു മാസം പ്രായമായ ഒരു കുട്ടിയുമുണ്ട്. തൃശൂര് സ്വദേശിയാണെങ്കിലും വര്ഷങ്ങളായി വിനോദ്കുമാറും കുടുംബവും കോയന്പത്തൂര് സിങ്കാനല്ലൂര് വിദ്യാവിഹാര് എന്ക്ലേവിലാണ് താമസം. വിനോദ്കുമാറിന്റെ സഹോദരന് വിവേകും വ്യോമസേനയിലാണ്.
ഷരിന് ഏഴു വര്ഷം മുന്പാണ് വ്യോമസേനയില് ചേര്ന്നത്. 2017 മേയ് മുതല് അരുണാചലിലെ മേചുക വ്യോമതാവളത്തിലാണു ജോലി. കഴിഞ്ഞ ഓഗസ്റ്റിലായിരുന്നു ഷരിനും വണ്ടിക്കാരന് പീടികയിലെ അഷിതയുമായുള്ള വിവാഹം നടന്നത്. ഏഴുമാസം ഗര്ഭിണിയാണ് അഷിത.
https://www.facebook.com/Malayalivartha
