ഒര്‍ജിനലിനെ വെല്ലുന്ന വ്യാജന്‍മാരുള്ള സ്ഥലമാണ് തൃശൂരിലെ കുന്നംകുളം. എന്നാല്‍ കുന്നംകുളം വ്യാജനേയും ഞെട്ടിക്കുന്ന ഐ.പി.എസ്, ഐ.എ.എസ് വ്യാജന്‍മാര്‍ ഡല്‍ഹിയില്‍ പിടിയിലായി. കഴിഞ്ഞ എട്ട് വര്‍ഷമായി ഇവരീ തട്ടിപ്പ് നടത്തിവരുകയായിരുന്നു. ഉന്നത ഉദ്യോഗസ്ഥര്‍ പണം പിടിച്ചുപറിക്കുന്നെന്ന് കാട്ടി ഒരാള്‍ നല്‍കിയ പരാതിയെ തുടര്‍ന്നാണ് ഈ സംഘം വലയിലായത്. ഗൗരവ് മിശ്ര, അഷുതോഷ് രാത്തി എന്നിവരെയാണ് നോയിഡ പോലീസ് സെക്ടര്‍ 18 മെട്രോ സ്‌റ്റേഷന് സമീപത്തു നിന്നും ഇന്ന് പിടികൂടിയത്. പൊലീസ് യൂണിഫോം, വ്യാജ ഐഡി കാര്‍ഡുകള്‍, ഐഎഎസ്, ഐപിഎസ് ബാഡ്ജുകള്‍ എന്നിവ ഇവരുടെ പക്കല്‍ നിന്ന് കണ്ടെടുത്തു. 

പ്രമുഖനായ ഒരു നേതാവിന്റെ പേരു പറഞ്ഞായിരുന്നു ഇവര്‍ തട്ടിപ്പ് നടത്തിയിരുന്നത്. ഭീഷണിക്ക് വഴങ്ങാത്ത പൊലീസുകാരെ സ്ഥലംമാറ്റുമെന്ന് ഭീഷണിപ്പെടുത്തി പണം തട്ടിയെന്നും പരാതിയുണ്ട്. ഉന്നത ഉദ്യോഗസ്ഥരാണെന്ന് പറഞ്ഞ് എത്തുന്നതിനാല്‍ പലപ്പോഴും കീഴുദ്യോഗസ്ഥര്‍ക്ക് ഇവരെ ചോദ്യം ചെയ്യാന്‍ ഭയമായിരുന്നു. അത് മുതലെടുത്താണ് ഇവര്‍ വര്‍ഷങ്ങളായി തട്ടിപ്പ് നടത്തിവന്നത്. പൊലീസ് ആണെന്ന് തെറ്റിദ്ധരിപ്പിച്ച് ആളുകളില്‍ നിന്ന് പണം പടിച്ചുവാങ്ങിയ യുവാവിനെ കഴിഞ്ഞമാസം ഡല്‍ഹിയില്‍ പിടികൂടിയിരുന്നു. അയാളുമായി ഇന്ന് പിടിയിലായവര്‍ക്ക് ബന്ധമുണ്ടോ എന്ന് അന്വേഷിക്കുന്നുണ്ട്. പൊലീസ് പരീക്ഷ പാസാകാന്‍ കഴിയാതെ വന്നതോടെ വീട്ടുകാരുടെയും ഭാവി വധുവിന്റെയും മുന്നില്‍ മുഖംരക്ഷിക്കാനാണ് ആഷിക് ചൗധരി പോലീസ് വേഷം കെട്ടിയതെന്നാണ് പറഞ്ഞിരുന്നത്. 

ആഷിക് ചൗധരിയുടെ പക്കല്‍ നിന്ന് ഒരു തോക്ക്, തിരകള്‍, യൂണിഫോം, ബൈക്ക്, 25,000 രൂപ എന്നിവ പൊലീസ് കണ്ടെടുത്തിരുന്നു. ട്രെയിനിലും മറ്റും സഞ്ചരിച്ച് യാത്രക്കാരുടെ ബാഗുകളും മറ്റും സംശയത്തിന്റെ പേരില്‍ പരിശോധിച്ച ശേഷം പണവും മറ്റ് വിലപിടിപ്പുള്ള വസ്തുക്കളുമായും മുങ്ങുന്നതായിരുന്നു ഇയാളുടെ രീതി. ് തുളസി നികേതന്‍ പോലീസ് സ്‌റ്റേഷനില്‍ വന്ന് സാധനങ്ങള്‍ കൈപ്പറ്റാനും നിര്‍ദ്ദേശിച്ചിരുന്നു. പലരും ഭയന്ന് പോയിരുന്നില്ല. എന്നാല്‍ ഒരാള്‍ സ്‌റ്റേഷനില്‍ സാധനങ്ങള്‍ കൈപ്പറ്റാന്‍ ചെന്നപ്പോഴാണ് ആ പേരിലൊരു പൊലീസുകാരന്‍ സ്‌റ്റേഷനില്ലെന്ന കാര്യം അറിഞ്ഞത്. അയാള്‍ ഉന്നത പൊലീസ് ഉദ്യോഗസ്ഥര്‍ക്കും റെയില്‍വേയ്ക്കും പരാതി നല്‍കുകയായിരുന്നു. 

ഡല്‍ഹിയിലെ ആഢംബര ഹോട്ടലില്‍ താമസിക്കുകയും ഭക്ഷണം കഴിക്കുകയും ചെയ്ത ശേഷം ആഭ്യന്തരമന്ത്രാലയത്തിലെ സൈബര്‍ ക്രൈം ഉദ്യോഗസ്ഥനാണെന്ന് പറഞ്ഞ് ബില്ല് അടയ്ക്കാതെ മുങ്ങിയ ആദിത്യ ദീക്ഷിത് എന്ന യുവാവിനെയും അടുത്തിടെ പൊലീസ് പിടികൂടിയിരുന്നു. കാറില്‍ ഇന്ധനം നിറച്ചുതരാന്‍ ജീവനക്കാരോട് ആവശ്യപ്പെട്ടതോടെയാണ് ഹോട്ടല്‍ ഉടമയ്ക്ക് സംശയം തോന്നിയത്. അയാള്‍ പരിചയമുള്ള പൊലീസ് ഉദ്യോഗസ്ഥനോട് കാര്യം പറഞ്ഞപ്പോഴാണ് തട്ടിപ്പ് പുറത്തായത്. ഇയാളുടെ പി.ആര്‍.ഒ ആണെന്ന് അവകാശവാദമുന്നയിച്ച അഖിലേഷ് യാദവ് എന്നയാളും അറസ്റ്റിലായിരുന്നു. ഡല്‍ഹി കേന്ദ്രീകരിച്ച് ഇത്തരം തട്ടിപ്പ് സംഘങ്ങള്‍ വ്യാപകമാകുന്നതിനെ തുടര്‍ന്ന് കേന്ദ്രആഭ്യന്തര മന്ത്രാലയം രഹസ്യാന്വേഷണം ആരംഭിച്ചിട്ടുണ്ട്.