സ്വകാര്യ നമ്പർ സിനിമയിൽ പരാമർശിച്ചതിന് പിന്നാലെ വെട്ടിലായ യുവാവിനോട് മാപ്പ് ചോദിച്ച്‌ കൊണ്ട് സണ്ണി ലിയോൺ രംഗത്ത് . അര്‍ജുന്‍ പട്യാല എന്ന സണ്ണി ലിയോൺ ചിത്രം പുറത്തു വന്നതോടെയാണ് ദില്ലി സ്വദേശിയായ പുനീത് അഗര്‍വാള്‍ കുടുക്കിലായത്. അര്‍ജുന്‍ പട്യാല എന്ന ചിത്രത്തില്‍ സണ്ണി ലിയോൺ മറ്റൊരു കഥാപാത്രത്തിന് നമ്പര്‍ കൈമാറുന്ന രംഗമുണ്ട്. ഇതിനായി അവര്‍ ഉപയോഗിച്ചിരിന്ന നമ്പര്‍ ദില്ലിയിലെ പുനീത് അഗര്‍വാള്‍ എന്ന വ്യക്തിയുടേതാണ്. ജൂലൈ 26ന് ചിത്രം പുറത്തിറങ്ങിയതോടെ ആളുകള്‍ ഈ നമ്പറില്‍ വിളി തുടങ്ങിയിരുന്നു. ഇത് സണ്ണി ലിയോണാണോ ? സണ്ണി ലിയോണ്‍ ഉണ്ടോ? സണ്ണി ലിയോണിനൊന്ന് ഫോണ്‍ കൊടുക്കുമോ? '' ഇങ്ങനെ ഒരു നൂറ് ചോദ്യങ്ങള്‍കൊണ്ട് വീര്‍പ്പുമുട്ടുകയായിരുന്നു ഈ ചെറുപ്പക്കാരന്‍. ചിലര്‍ കുശലം ചോദിക്കും. ചിലര്‍ അശ്ലീലം പറയും. മറ്റുചിലര്‍ സണ്ണി ലിയോണിനെ ഫോണില്‍ കിട്ടില്ലെന്ന് അറിയുമ്പോള്‍ ചീത്തവിളിക്കുമെന്നും പുനീത് പറഞ്ഞിരുന്നു.

ആദ്യം കാര്യം മനസിലായില്ല. പിന്നീടാണ് അര്‍ജുന്‍ പട്യാല എന്ന ചിത്രത്തില്‍ തന്‍റെ നമ്പര്‍ ഉപയോഗിച്ചിട്ടുണ്ടെന്ന് ഇയാൾക്ക് മനസിലായത്. സംഭവത്തിനെതിരെ പൊലീസില്‍ പരാതി നല്‍കിയെങ്കിലും ഇതുവരെ യാതൊരു നടപടിയും സ്വീകരിച്ചിട്ടില്ല. സിനിമക്കെതിരെ കോടതിയെ സമീപിക്കാനൊരുങ്ങുവെയാണ് മാപ്പുമായി സണ്ണി വന്നിരിക്കുന്നത്.ഒരു ടിവി ചാനലിന് നൽകിയ അഭിമുഖത്തിലാണ് താരം യുവാവിനോട് ക്ഷമാപണം നടത്തിയിരിക്കുന്നത്.