‘ ലക്‌നൗ, ഉന്നാവോ, ബാന്ദ, ഫത്തേപൂര്‍ എന്നിങ്ങനെ നാലു ജില്ലകളില്‍ സി.ബി.ഐ പരിശോധന നടത്തുകയാണ്. ഉന്നാവോ ലൈംഗികാതിക്രമ പരാതിയുമായി ബന്ധപ്പെട്ട് ഉത്തര്‍പ്രദേശില്‍ 17 ഇടങ്ങളഇല്‍ സി.ബി.ഐ റെയ്ഡ് നടത്തുന്നുണ്ട് . അന്വേഷണം പുരോഗമിക്കുകയാണ്.’ സി.ബി.ഐ പ്രസ്താവനയില്‍ അറിയിച്ചു.കേസിലെ പ്രതിയായ ബി.ജെ.പി എം.എല്‍.എ കുല്‍ദീപ് സെന്‍ഗാറുമായി ബന്ധപ്പെട്ട സ്ഥലങ്ങളിലായിരുന്നു റെയ്ഡ്.

ഉന്നാവോ പെണ്‍കുട്ടിയെ ഗുരുതരാവസ്ഥയിലാക്കിയ വാഹനാപകടത്തിനു പിന്നില്‍ കുല്‍ദീപ് സെന്‍ഗാറാണെന്ന് ബന്ധുക്കള്‍ ആരോപിച്ചിരുന്നു. സംഭവത്തില്‍ പ്രത്യേക അന്വേഷണം നടക്കുന്നുണ്ട്. പെണ്‍കുട്ടി ഇപ്പോഴും ഗുരുതരാവസ്ഥയില്‍ വെന്റിലേറ്ററില്‍ കഴിയുകയാണ്. സംഭവവുമായി ബന്ധപ്പെട്ട് സി.ബി.ഐ സിതാപൂര്‍ ജയിലിലെത്തി കുല്‍ദീപ് സെന്‍ഗാറിനെ ചോദ്യം ചെയ്തിരുന്നു. വിസിറ്റേഴ്‌സ് റെക്കോര്‍ഡുകള്‍ പരിശോധിക്കുകയും ചെയ്തിരുന്നു.

പെണ്‍കുട്ടി സഞ്ചരിച്ച വാഹനത്തില്‍ ഇടിച്ച ട്രെക്കിന്റെ ഉടമയേയും ക്ലീനറേയും അന്വേഷണ സംഘം ചോദ്യം ചെയ്തിരുന്നു. വായ്പ മുടങ്ങിയതിനാല്‍ ഫിനാന്‍സ് കമ്പനി കൊണ്ടുപോകുമെന്ന് ഭയന്നാണ് നമ്പര്‍ പ്ലേറ്റില്‍ ഗ്രീസ് പുരട്ടിയതെന്നും ട്രക്ക് ഉടമ പറഞ്ഞിരുന്നു. അതേസമയം അന്വേഷണ സംഘത്തെ സി.ബി.ഐ വിപുലീകരിച്ചിട്ടുണ്ട്. 20 അംഗങ്ങളെയാണ് പുതുതായി ഉള്‍പ്പെടുത്തിയിരിക്കുന്നത്.