ലൈംഗികാരോപണക്കേസ് റദ്ദാക്കണമെന്ന തെഹല്ക സ്ഥാപക എഡിറ്റര് തരുണ് തേജ്പാലിന്റെ ആവശ്യം സുപ്രീംകോടതി തള്ളി... ആറു മാസത്തിനുള്ളില് വിചാരണ പൂര്ത്തിയാക്കാന് സുപ്രീംകോടതി ഉത്തരവ്
ലൈംഗികാരോപണക്കേസ് റദ്ദാക്കണമെന്ന തെഹല്ക സ്ഥാപക എഡിറ്റര് തരുണ് തേജ്പാലിന്റെ ആവശ്യം സുപ്രീംകോടതി തള്ളി. ജസ്റ്റീസ് അരുണ് മിശ്ര, എം.ആര്.ഷാ, ബി.ആര്.ഗവായി എന്നിവര് അടങ്ങിയ ബെഞ്ചാണ് ഹര്ജി തള്ളിയത്. ആറു മാസത്തിനുള്ളില് വിചാരണ പൂര്ത്തിയാക്കാന് സുപ്രീംകോടതി ഉത്തരവിട്ടു.
പീഡനാരോപണം കെട്ടിച്ചമച്ചാതാണെന്നും കേസ് റദ്ദാക്കണമെന്നുമായിരുന്നു തേജ്പാലിന്റെ ആവശ്യം. എന്നാല് കേസ് ഗുരുതരമായ കുറ്റകൃത്യമാണെന്ന് ചൂണ്ടിക്കാണിച്ച് ബെഞ്ച് ഹര്ജി തള്ളുകയായിരുന്നു. ഗോവയിലെ കോടതിയിലായിരിക്കും കേസിന്റെ വിചാരണ നടക്കുക. 2013ല് സഹപ്രവര്ത്തകയായ യുവതിയെ ബലാത്സംഗം ചെയ്യാന് ശ്രമിച്ചുവെന്നാണ് കേസ്.
ഗോവയില് തെഹല്ക്ക സംഘടിപ്പിച്ച തിങ്ക് കോണ്ക്ലേവിനിടെ തന്നോട് അപമര്യാദയായി പെരുമാറിയെന്നായിരുന്നു യുവതിയുടെ പരാതി. കേസില് തേജ്പാലിനെ അറസ്റ്റ് ചെയ്തെങ്കിലും 2014 മെയില് അദ്ദേഹം ജാമ്യം നേടിയിരുന്നു. കേസ് റദ്ദാക്കണമെന്ന ആവശ്യവുമായി തേജ്പാല് നേരത്തെ ബോംബെ ഹൈക്കോടതിയെയും സമീപിച്ചിരുന്നു. എന്നാല് അവിടെയും ഹര്ജി തള്ളുകയായിരുന്നു.
https://www.facebook.com/Malayalivartha
