പി. ചിദംബരത്തെ നാല് ദിവസം സി.ബി.ഐ കസ്റ്റഡിയില്‍ വിട്ടു. ഡല്‍ഹിയിലെ സി.ബി.ഐ കോടതിയുടേതാണ് നടപടി.ആഗസ്റ്റ് 26 വരെയാണ് ചിദംബരം കസ്റ്റഡിയില്‍ തുടരുക. നേരത്തെ സോളിസിറ്റര്‍ ജനറലിന്റെ എതിര്‍പ്പ് മറികടന്ന് പി.ചിദംബരത്തിന് സംസാരിക്കാനും കോടതി അനുമതി നല്‍കി. തനിക്ക് വിദേശത്ത് ബാങ്ക് അക്കൗണ്ട് ഇല്ല. കാര്‍ത്തി ചിദംബരത്തിന് വിദേശത്ത് ബാങ്ക് അക്കൗണ്ട് തുടങ്ങാന്‍ അനുമതി ഉണ്ട്. ഇക്കാര്യങ്ങളെല്ലാം സി.ബി.ഐയോട് വിശദീകരിച്ചിട്ടുണ്ടെന്നും ചിദംബരം പറഞ്ഞു. എന്നാല്‍ അന്വേഷണവുമായി ചിദംബരം സഹകരിക്കുന്നില്ലായെന്നും ചോദ്യം ചെയ്യലില്‍ നിന്നും ഒഴിഞ്ഞുമാറുകയാണെന്നും സിബിഐ പറഞ്ഞു.

ചിദംബരത്തിന്റെ ഭാര്യ നളിനിയും മകന്‍ കാര്‍ത്തിയും കോടതിയില്‍ എത്തിയിരുന്നു. മൂന്ന് മണിക്കൂറോളം സി.ബി.ഐ ആസ്ഥാനത്ത് ചോദ്യം ചെയ്യലിന് ശേഷമാണ് ചിദംബരത്തെ സി.ബി.ഐ പ്രത്യേക കോടതിയില്‍ ഹാജരാക്കിയത്. ജസ്റ്റിസ് അജയ് കുഹാര്‍ ആണ് കേസ് പരിഗണിച്ചത്. സി.ബി.ഐക്ക് വേണ്ടി സോളിസിറ്റര്‍ ജനറല്‍ തുഷാര്‍ മേത്തയാണ് ഹാജരായത്. ചിദംബരത്തിനായി കോണ്‍ഗ്രസ് നേതാക്കളും അഭിഭാഷകരുമായ അഭിഷേക് സിങ് വി, കപില്‍ സിബല്‍ എന്നിവര്‍ വാദിച്ചു.