യെച്ചൂരി തരിഗാമിയുടെ വസതിയിലെത്തി; ശ്രീനഗര് വിമാനത്താവളത്തില് നിന്ന് കനത്ത സുരക്ഷ അകമ്പടിയോടെയാണ് യെച്ചൂരി യൂസഫ് തരിഗാമിയുടെ വസതിയിലെത്തിയത്
വീട്ടുതടങ്കലിലാക്കപ്പെട്ട സിപിഐഎം നേതാവ് മുഹമ്മദ് യൂസഫ് തരിഗാമിയെ സന്ദർശിക്കാൻ പാര്ട്ടി ജനറല് സെക്രട്ടറി സീതാറാം യെച്ചൂരി ശ്രീനഗറിലെത്തി. സുപ്രീംകോടതിയുടെ അനുമതിയോടെ ഒരു സഹായിക്കൊപ്പമാണ് യെച്ചൂരി തരിഗാമിയെ കാണാനെത്തിയത്. ശ്രീനഗര് വിമാനത്താവളത്തില് നിന്ന് കനത്ത സുരക്ഷ അകമ്പടിയോടെയാണ് യെച്ചൂരി യൂസഫ് തരിഗാമിയുടെ വസതിയിലെത്തിയത്. ഇന്ന് കശ്മീരില് തങ്ങണമെന്ന് യെച്ചൂരി കശ്മീര് പൊലീസിനോട് ആവശ്യപ്പെട്ടിട്ടുണ്ട്. മുഹമ്മദ് യൂസഫ് തരിഗാമിയെ സന്ദര്ശിക്കാന് ഇന്നലെയാണ് സീതാറാം യെച്ചൂരിക്ക് സുപ്രീംകോടതി അനുമതി നല്കിയത്.
മുഹമ്മദ് യൂസുഫ് തരിഗാമിയെ ഹാജരാക്കണമെന്നാവശ്യപ്പെട്ട് യെച്ചൂരി നല്കിയ ഹേബിയസ് കോര്പ്പസ് ഹര്ജിയിലായിരുന്നു കോടതിയുടെ ഉത്തരവ്. എന്നാല് കശ്മീരിലെ സ്ഥിതിഗതികള് സാധാരണ നിലയിലാകുന്നത് വരെ കുടുംബാംഗങ്ങള് അല്ലാത്തവരെ തരിഗാമിയെ കാണുന്നത് തടയണമെന്ന് സര്ക്കാരിന് വേണ്ടി സോളിസിറ്റര് ജനറല് തുഷാര് മെഹ്ത കോടതിയില് നിലാപാടെടുത്തു. എന്നാല് കോടതി ഈ വാദം തള്ളുകയായിരുന്നു. രാജ്യത്ത് ഒരു പൗരന് മറ്റൊരാളെ കാണാന് തടയാനാകില്ലെന്ന് കോടതി ചൂണ്ടിക്കാട്ടി.
തരിഗാമിയെ കാണാന് താന് കശ്മീരിലേക്ക് പോയപ്പോള് ശ്രീനഗര് വിമാനത്താവളത്തില് വെച്ച് തടഞ്ഞെന്നും വീട്ടു തടങ്കലിലാക്കിയ ശേഷം അദ്ദേഹത്തെ കുറിച്ച് ഒരു വിവരവും ഇല്ലെന്നും യെച്ചൂരി കോടതിയില് അറിയിച്ചിരുന്നു. താരിഗാമിയുടെ ആരോഗ്യത്തിന് യാതൊരു കുഴപ്പവും ഇല്ലെന്ന് അറിയിച്ചാണ് യെച്ചൂരിയുടെ സന്ദര്ശനത്തെ കേന്ദ്രസര്ക്കാര് എതിര്ത്തത്. എന്നാല്, സോളിസിറ്റർ ജനറൽ തുഷാർ മേത്തയുടെ വാദങ്ങള് കോടതി തള്ളി. ശ്രീനഗർ എസ്പിക്കാണ് യെച്ചൂരിയുടെ സുരക്ഷാച്ചുമതല നല്കിയിരിക്കുന്നത്.
മറ്റൊരു ഹര്ജിയില് മുഹമ്മദ് അലീം സയീദ് അലീം എന്ന നിയമബിരുദധാരിക്ക് അനന്ത്നാഗിലുള്ള തന്റെ മാതാപിതാക്കളെ സന്ദര്ശിക്കുന്നതിനും കോടതി അനുമതി നല്കി. ഇതിനിടെ കശ്മീരിന് പ്രത്യേക അവകാശം നല്കുന്ന ഭരണഘടനയിലെ 370-ാം അനുച്ഛേദം എടുത്ത് കളഞ്ഞത് ചോദ്യം ചെയ്തുള്ള എട്ട് ഹര്ജികള് സുപ്രീംകോടതിയുടെ ഭരണഘടനാ ബെഞ്ചിന് വിടുകയും ചെയ്തു.
പ്രത്യേക പദവി റദ്ദാക്കിയതിനുശേഷം ജമ്മു കശ്മീരിലേക്ക് എത്തിയ രാഷ്ട്രീയ നേതാക്കളെയെല്ലാം ശ്രീനഗര് വിമാനത്താവളത്തില് വെച്ച് തിരിച്ചയക്കുകയായിരുന്നു. കഴിഞ്ഞ ദിവസം രാഹുല് ഗാന്ധിയുടെ നേതൃത്വത്തിലുള്ള പ്രതിപക്ഷ സംഘത്തെയും ഇങ്ങനെ തിരിച്ചയച്ചിരുന്നു. ഇതിനിടെയാണ് തരിഗാമിയെ കാണാന് യെച്ചൂരിക്ക് സുപ്രീംകോടതിയുടെ അനുമതി ലഭിച്ചത്.
https://www.facebook.com/Malayalivartha