പാക് അധീന കശ്മീരാണ് ഇന്ത്യ ലക്ഷ്യമിടുന്നതെന്ന തരത്തിലുള്ള കൃത്യമായ പ്രസ്താവനയാണ് കേന്ദ്ര പ്രതിരോധമന്ത്രി രാജ്‌നാഥ് സിംഗില്‍ നിന്ന് വരുന്നത്. 1971 ലെ വിഭജനവും , ബംഗ്ലാദേശിന്റെ രൂപീകരണവും പാകിസ്ഥാന്‍ മറക്കരുതെന്ന മുന്നറിയിപ്പാണ് അദ്ദേഹം ഇപ്പോള്‍ നല്‍കുന്നത്. ജയ്പൂരില്‍ പണ്ഡിറ്റ് ദീന്‍ ദയാല്‍ ഉപാദ്ധ്യായയുടെ ജന്മവാര്‍ഷിക പരിപാടികളില്‍ പങ്കെടുക്കവെയായിരുന്നു കേന്ദ്ര പ്രതിരോധ മന്ത്രിയുടെ ഈ പരാമര്‍ശം.

പുല്‍വാമ ഭീകരാക്രമണത്തിനു ശേഷം ഇന്ത്യ ഏറെ മുന്‍ കരുതലുകള്‍ എടുത്തിരുന്നു എന്നും. ബാലാക്കോട്ട് ആക്രമണം നടത്തിയത് തന്നെ അവിടെയുള്ള സാധാരണക്കാരെ ലക്ഷ്യമിട്ടായിരുന്നില്ല. മറിച്ച് ഭീകരരെ ഉന്നം വച്ചായിരുന്നുവെന്നും രാജ്‌നാഥ് സിംഗ് വ്യക്തമാക്കുന്നു. പാക് അധീന കശ്മീരും ഇന്ത്യയുടെ ഭാഗമായി മാറുമെന്ന് അടുത്തിടെയാണ് കേന്ദ്രമന്ത്രി ജിതേന്ദ്രസിംഗിന്റെ പ്രസ്ഥാവന പുറത്തുവന്നത്. അതിനുപിന്നാലെയാണ് 1971 ലെ വിഭജനവും , ബംഗ്ലാദേശിന്റെ രൂപീകരണവും മറക്കരുതെന്ന രാജ്‌നാഥ് സിംഗിന്റെ ഈ മുന്നറിയിപ്പും വരുന്നത്. 1970 ല്‍ പാകിസ്ഥാനില്‍ നടന്ന പൊതു തെരഞ്ഞെടുപ്പിനു ശേഷമുണ്ടായ സംഭവ വികാസങ്ങളാണ് 1971 ലെ ഇന്തോ പാക് യുദ്ധത്തിന് വഴിതെളിച്ചത് . 1971 ഡിസംബര്‍ 3 ന് ഭാരതത്തില്‍ ആഗ്രയുള്‍പ്പെടെയുള്ള 11 വ്യോമ സേനാത്താവളങ്ങളില്‍ പാക് വ്യോമ സേന ആക്രമണമഴിച്ചു വിട്ടു . പാകിസ്ഥാന്‍ ആക്രമണത്തിനു തിരിച്ചടിയായി അന്നു തന്നെ ഇന്ത്യന്‍ വ്യോമ സേന പാകിസ്ഥാനിലും ആക്രമണമാരംഭിച്ചു . പാക് നാവിക സേന ഇന്ത്യന്‍ തീരത്തും ആക്രമണമാരംഭിച്ചു. എന്നാല്‍ ശക്തിയായി തിരിച്ചടിച്ച ഇന്ത്യന്‍ നാവിക സേന വൈസ് അഡ്മിറല്‍ എസ് എന്‍ കോഹ് ലി യുടെ നേതൃത്വത്തില്‍ കറാച്ചി ആക്രമിച്ചു . പാക് നശീകരണക്കപ്പല്‍ പി എന്‍ എസ് ഖൈബറിനെ തകര്‍ത്ത നാവിക സേന രണ്ടു കപ്പലുകള്‍ക്ക് കേടുപാടുണ്ടാക്കി . പാകിസ്ഥാന്റെ 3 ചരക്കു കപ്പലുകള്‍ മുക്കി . എന്നാല്‍ പാക് അന്തര്‍ വാഹിനി ഹാഗറിന്റെ ആക്രമണത്തില്‍ ഇന്ത്യന്‍ പടക്കപ്പല്‍ ഐ എന്‍ എസ് കുക്രി തകര്‍ന്നു . 18 ഓഫീസര്‍മാരും 176 നാവികരും ജീവത്യാഗം ചെയ്തു.

ഇന്ത്യന്‍ നാവിക സേനയുടെ പ്രതികാരം പാക് സൈന്യത്തിനു താങ്ങാനായില്ല. ശക്തമായ ഇന്ത്യന്‍ ആക്രമണത്തില്‍ പാക് നാവിക സേനയുടെ മൂന്നിലൊന്ന് സൈനിക ശേഷിയും നശിപ്പിക്കപ്പെട്ടു . ഇന്ത്യന്‍ വ്യോമ സേനയുടെ ആക്രമണങ്ങളെ പ്രതിരോധിക്കാന്‍ പാക് വ്യോമ സേനയ്ക്ക് കഴിഞ്ഞതുമില്ല. ഇന്ത്യന്‍ കരസേന ബംഗ്ലാദേശിന്റെ മുക്തിബാഹിനിക്കൊപ്പം ചേര്‍ന്ന് മിത്രബാഹിനി എന്ന പേരില്‍ കിഴക്കന്‍ പാകിസ്ഥാനിലെ പാക് സൈന്യത്തെ ആക്രമിച്ചു . ഇന്ത്യ- ബംഗ്ലാദേശ് സഖ്യ സൈന്യത്തിന്റെ ആക്രമണത്തില്‍ പാക് സൈന്യം നിലം പരിശായി . ധാക്ക സ്വതന്ത്രമാക്കപ്പെട്ടു . 1971 ഡിസംബര്‍ 16 ന് 13 ദിവസം മാത്രം നീണ്ടു നിന്ന യുദ്ധം അവസാനിച്ചു. ഭാരതത്തിനു മുന്നില്‍ പാകിസ്ഥാന്‍ കീഴടങ്ങി.