ആഗ്രയില്‍ താജ് മഹലിന് സമീപം ഉപേക്ഷിക്കപ്പെട്ട നിലയില്‍ കണ്ടെത്തിയ പ്രഷര്‍ കുക്കര്‍ ആശങ്ക പരത്തി .

താജ്മഹലിന് കിഴക്കേ ഗേറ്റിന് സമീപം പ്രഷര്‍ കുക്കര്‍ കണ്ടെത്തിയത് രാവിലെ പള്ളിയില്‍ നമസ്‌കരിക്കാന്‍ എത്തിയവരാണ്. 

സുരക്ഷാ ഉദ്യോഗസ്ഥര്‍ ഉടനടി സ്ഥലത്തെത്തി. ഉന്നത ഉദ്യോഗസ്ഥരുടെ നിര്‍ദ്ദേശ പ്രകാരം ബോംബ് ഡിറ്റക്ടര്‍ കൊണ്ടുവന്നു. ഇത് ഉപയോഗിച്ച് നടത്തിയ പരിശോധനയില്‍ 40 ശതമാനം സ്ഫോടകവസ്തു ഉള്ളതായി കണ്ടെത്തിയതോടെ ആശങ്ക ഇരട്ടിച്ചു.

പിന്നാലെ കൂടുതല്‍ പരിശോധന നടത്തിയപ്പോള്‍ ബോംബ് ഡിറ്റക്ടര്‍ കണ്ടെത്തിയത് തെറ്റാണെന്ന് തെളിഞ്ഞു.

ഇതിനിടെ ഒരു കുരങ്ങന്‍ പ്രഷര്‍ കുക്കറുമായി പോകുന്നത് കണ്ടിരുന്നുവെന്ന് സമീപത്തെ വീട്ടിലെ ഒരാള്‍ പറഞ്ഞതോടെയാണ് ആശങ്ക മാറി ചിരി പടര്‍ന്നത്.