തെന്നിന്ത്യയിലെ ആക്ഷന്‍ റാണിയും കോണ്‍ഗ്രസ് നേതാവുമായ വിജയശാന്തി ഇനി താമര മുത്തും കാവിക്കൊടി പാറിക്കും. കോണ്‍ഗ്രസിലെ തമ്മില്‍തല്ല് മടുത്തിട്ടാണ് താരം ബി.ജെ.പിയില്‍ ചേക്കേറുന്നത്. തെലങ്കാന, ആന്ധ്ര, മഹാരാഷ്ട്ര, തമിഴ്‌നാട്, കര്‍ണ്ണാടക എന്നിവിടങ്ങളിലെ പോപ്പുലര്‍ നായികയായ വിജയശാന്തിയുടെ വരവ് ബി.ജെ.പി വലിയ പ്രതീക്ഷയോടെയാണ് കാണുന്നത്. മഹാരാഷ്ട്ര തെരഞ്ഞെടുപ്പും കര്‍ണാടക ഉപതെരഞ്ഞെടുപ്പും അടുത്തിരിക്കുന്ന സാഹചര്യത്തില്‍ വിജയശാന്തിയുടെ പിന്‍മാറ്റം കോണ്‍ഗ്രസിന് വലിയ തിരിച്ചടിയാകുമെന്നാണ് മാധ്യമങ്ങള്‍ വിലയിരുത്തുന്നത്. അടുത്തമാസം എട്ടിന് മുന്‍പ് ബിജെപിയില്‍ ചേര്‍ന്നേക്കുമെന്നാണ് റിപ്പോര്‍ട്ട്. 1997ല്‍ താരം ബി.ജെ.പിയില്‍ ചേര്‍ന്നിരുന്നെങ്കിലും പിന്നീട് പാര്‍ട്ടി വിട്ട് കോണ്‍ഗ്രസില്‍ ചേരുകയായിരുന്നു.

മഹാരാഷ്ട്ര നിയമസഭയില്‍ 15 മുതല്‍ 20 സീറ്റുകള്‍ ലഭിക്കാന്‍ വിജയശാന്തിയുടെ സാനിധ്യത്തിലൂടെ കഴിയുമെന്ന് ബി.ജെ.പി നേതാക്കള്‍ വിലയിരുത്തുന്നു. താര പ്രഭയും ജനങ്ങളുമായുള്ള ബന്ധവും വിജയശാന്തിക്ക് ഏറെ ഗുണം ചെയ്യും. തെന്നിന്ത്യയിലെ പല കോണ്‍ഗ്രസ് നേതാക്കളെയും തങ്ങളുടെ ക്യാമ്പിലെത്തിക്കാന്‍ ബി.ജെ.പി ശ്രമിക്കുന്നുണ്ട്. ആന്ധ്രപ്രദേശ് മുന്‍ ഡപ്യൂട്ടി മുഖ്യമന്ത്രി ദാമോദര്‍ രാജനരസിംഹ, മുന്‍ കേന്ദ്രമന്ത്രി സര്‍വേ സത്യനാരായണ, മുന്‍ എംഎല്‍എ കോമതി രാജഗോപാല്‍ റെഡ്ഡി, എന്നിവരുമായി ബി.ജെ.പി നേതാക്കള്‍ ചര്‍ച്ചകള്‍ നടത്തിയതായി വാര്‍ത്തകളുണ്ടായിരുന്നു. ദാമോദര്‍ രാജനരസിംഹ, സര്‍വേ സത്യനാരായണ എന്നിവര്‍ ഈ വാര്‍ത്ത തള്ളിയെങ്കിലും കോമതി ബിജെപിയില്‍ ചേരാന്‍ തീരുമാനിച്ചതായി അറിയിച്ചിരുന്നു.

കഴിഞ്ഞ ലോക്‌സഭാ തെരഞ്ഞെടുപ്പിന് മുമ്പ് വിജയശാന്തി പ്രധാനമന്ത്രി നരേന്ദ്രമോദിക്കെതിരെ രൂക്ഷവിമര്‍ശനവുമായി രംഗത്തെത്തിയിരുന്നു. മോദിയെ കണ്ടാല്‍ ഭീകരനെപ്പോലെയാണെന്നായിരുന്നു വിമര്‍ശനം. മോദി എപ്പോള്‍ ബോംബിടുമെന്നോര്‍ത്ത് ആളുകള്‍ ഭീതിയിലാണ്. പ്രധാനമന്ത്രി ജനങ്ങളെ ഭയപ്പെടുത്തുകയാണ്. ഇത് അദ്ദേഹത്തിന് യോജിച്ചതല്ല. തെലങ്കാനയിലെ ഷംഷബാദില്‍ തെരഞ്ഞെടുപ്പ് യോഗത്തില്‍ സംസാരിക്കവെയാണ് ഈ വിമര്‍ശനം വിജയശാന്തി നടത്തിയത്. ആ വിജയശാന്തിയെ തങ്ങളുടെ പാളയത്തില്‍ എത്തിക്കുന്നത് വഴി ബി.ജെ.പി കോണ്‍ഗ്രസിനോട് മധുരപ്രതികാരം കൂടിയാണ് നടത്തുന്നത്.

മഹിളാമോര്‍ച്ചാ മുന്‍ സെക്രട്ടറിയായിരുന്ന വിജയശാന്തി തിരിച്ച് വരുമ്പോള്‍ വനിതകള്‍ക്കിടിയില്‍ പാര്‍ട്ടിക്ക് കൂടുതല്‍ സ്വീകാര്യത ലഭിക്കുമെന്ന് ബി.ജെ.പി നേതൃത്വം കണക്ക്കൂട്ടുന്നു. 1999ലെ ലോക്‌സഭാ തെരഞ്ഞെടുപ്പില്‍ കോണ്‍ഗ്രസ് അധ്യക്ഷയായിരുന്ന സോണിയാഗാന്ധിക്കെതിരെ മത്സരിക്കാന്‍ വിജയശാന്തി തീരുമാനിച്ചിരുന്നു. എന്നാല്‍ സോണിയാഗാന്ധി കടപ്പയില്‍ നിന്ന് ബെല്ലാരിയിലേക്ക് കളംമാറ്റുകയായിരുന്നു. 2009ല്‍ വിജയശാന്തി ബി.ജെ.പി വിട്ട് സന്തം പാര്‍ട്ടിയായ തല്ലി തെലങ്കാന രൂപീകരിച്ചു. പിന്നീട് ആ പാര്‍ട്ടി ടി.ആര്‍.എസില്‍ ലയിച്ചു. 2009ല്‍ അവര്‍ ലോക്‌സഭാംഗമായി. 2011ല്‍ തെലങ്കാല രൂപീകരണത്തിന് ഐക്യദാര്‍ഢ്യം പ്രഖ്യാപിച്ച് ചന്ദ്രശേഖരറാവുവിനൊപ്പം എം.പി സ്ഥാനം രാജിവെച്ചു. എന്നാല്‍ സ്പീക്കര്‍ അംഗീകരിച്ചില്ല. ചന്ദ്രശേഖര റാവുമായുള്ള അഭിപ്രായഭിന്നതയെ തുടര്‍ന്ന് 2014ല്‍ അവര്‍ കോണ്‍ഗ്രസില്‍ ചേരുകയായിരുന്നു.