പാര്‍ലമെന്റിനെ മറികടന്ന പൗരത്വ ബില്‍ ഇനി സുപ്രീംകോടതിയിലേക്ക്. വിവാദ ബില്ലിനെതിരെ സുപ്രീംകോടതിയെ സമീപിക്കുമെന്ന് കോണ്‍ഗ്രസ് അറിയിച്ചു. പൗരത്വനിയമ ഭേദഗതി ബില്‍ ഭരണഘടനാ വിരുദ്ധമാണെന്നാണ് കോണ്‍ഗ്രസ് നിലപാട്. ബില്‍ അസാധുവാക്കണമെന്നും കോണ്‍ഗ്രസ് ആവശ്യപ്പെടുന്നു. ബില്ലിനെതിരെ ഇന്ന് സുപ്രീംകോടതിയില്‍ ഹര്‍ജി നല്‍കുമെന്ന് മുസ്ലീം ലീഗും വ്യക്തമാക്കിയിട്ടുണ്ട്.
ലോക്‌സഭ പാസ്സാക്കിയ പൗരത്വം ഭേദഗതി ബില്‍ ഇന്നലെ രാജ്യസഭയിലും വിജയിച്ചു. 125 പേരുടെ പിന്തുണയോടെയാണ് പൗരത്വ ഭേദഗതി ബില്‍ രാജ്യസഭ പാസാക്കിയത്. എതിര്‍ത്തത് 105 പേര്‍. ശിവസേന വോട്ടെടുപ്പ് ബഹിഷ്‌കരിച്ചു. രാഷ്ട്രപതി ഒപ്പു വയ്ക്കുന്നതോടെ നിയമം പ്രാബല്യത്തില്‍ വരും.ഭരണഘടനയുടെ ചരിത്രത്തില്‍ തന്നെ കറുത്ത ദിനമാണെന്നാണ് കോണ്‍ഗ്രസ് അധ്യക്ഷ സോണിയഗാന്ധി ബില്‍ പാസ്സാക്കിയതിനെ വിശേഷിപ്പിച്ചത്. ഇന്ത്യയുടെ നാനാത്വത്തിനു മുകളില്‍ സങ്കുചിത മനോഭാവമുള്ളവരുടെയും മര്‍ക്കടമുഷ്ടിക്കാരുടെയും വിജയമാണ് പൗരത്വ ഭേദഗതി ബില്‍ പാസാക്കിയതിലൂടെ ഉണ്ടായതെന്നും സോണിയ ഗാന്ധി പ്രസ്താവനയില്‍ അറിയിച്ചു.