അനിശ്ചിതകാല നിരാഹാര സമരം നടത്തിവന്ന ഡല്‍ഹി വനിതാ കമ്മീഷന്‍ അധ്യക്ഷ സ്വാതി മാലിവാളിനെ ആശുപത്രിയില്‍ പ്രവേശിപ്പിച്ചു. 13 ദിവസമായി നിരാഹാര സമരത്തിലായിരുന്ന സ്വാതി ബോധരഹിതയായതിനെ തുടര്‍ന്നാണ് ആശുപത്രിയിലേക്ക് മാറ്റിയത്. ഡല്‍ഹി ലോക് നായക് ആശുപത്രിയിലാണ് പ്രവേശിപ്പിച്ചിരിക്കുന്നത്. രാജ്യത്ത് പെണ്‍കുട്ടികള്‍ക്കെതിരെ നടക്കുന്ന അക്രമങ്ങള്‍ക്കെതിരെയാണ് സ്വാതിയുടെ പ്രതിഷേധം. ലൈംഗീക പീഡന കേസുകളിലെ പ്രതികള്‍ക്ക് ആറു മാസത്തിനുള്ളില്‍ വധശിക്ഷ നല്‍കണമെന്നും സ്വാതി ആവശ്യപ്പെട്ടിരുന്നു. ആദ്യം ഡല്‍ഹിയിലെ ജന്തര്‍മന്ദറില്‍ തുടങ്ങിയ സമരം പിന്നീട് രാജ്ഘട്ടിലേക്ക് മാറ്റുകയായിരുന്നു.
ലൈംഗീക പീഡനക്കേസുകളിലെ കുറ്റക്കാര്‍ക്ക് 21 ദിവസത്തിനുള്ളില്‍ വധ ശിക്ഷ നല്‍കാന്‍ വ്യവസ്ഥ ചെയ്യുന്ന ദിശ ബില്‍ നടപ്പാക്കണമെന്നും സ്വാതി ആവശ്യപ്പെട്ടിരുന്നു. ഇക്കാര്യം ചൂണ്ടിക്കാട്ടി കഴിഞ്ഞ ദിവസം അവര്‍ പ്രധാനമന്ത്രി നരേന്ദ്ര മോദിക്ക് കത്ത് എഴുതിയിരുന്നു. നിയമം നടപ്പാക്കുന്നത് വരെ സമരം തുടരുമെന്നാണ് സ്വാതി പ്രഖ്യാപിച്ചിരുന്നത്.