യുദ്ധക്കളമായി രാജ്യ തലസ്ഥാനം..... പൗരത്വ നിയമ ഭേദഗതിക്കെതിരായ പ്രക്ഷോഭം അക്രമാസക്തമായപ്പോള് യുദ്ധക്കളമായി രാജ്യതലസ്ഥാനം, വിദ്യാര്ഥികളും നാട്ടുകാരും ജാമിഅ നഗറില് സംഘടിപ്പിച്ച പ്രതിഷേധത്തില് വന് സംഘര്ഷമുണ്ടായി, നിരവധി വാഹനങ്ങള്ക്ക് തീയിട്ടു, പ്രതിഷേധക്കാര്ക്ക് നേരെ പൊലീസ് നടത്തിയ ലാത്തിച്ചാര്ജില് നിരവധി വിദ്യാര്ഥികള്ക്ക് പരിക്കേറ്റു
പൗരത്വ നിയമ ഭേദഗതിക്കെതിരായ പ്രക്ഷോഭത്തില് ആയിരങ്ങള് അണിനിരന്നപ്പോള് യുദ്ധക്കളമായി ഡല്ഹി ജാമിഅ മില്ലിയ യൂണിവേഴ്സിറ്റി. വിദ്യാര്ഥികളും നാട്ടുകാരും ജാമിഅ നഗറില് സംഘടിപ്പിച്ച പ്രതിഷേധത്തില് വന് സംഘര്ഷമുണ്ടായി. നിരവധി വാഹനങ്ങള്ക്ക് തീയിട്ടു. പ്രതിഷേധക്കാര്ക്ക് നേരെ പൊലീസ് നടത്തിയ ലാത്തിച്ചാര്ജില് നിരവധി വിദ്യാര്ഥികള്ക്ക് പരിക്കേറ്റു. ക്യാമ്പസിനുള്ളില് കടന്ന പൊലീസ് കണ്ണീര്വാതക ഷെല് പ്രയോഗിച്ചു.
അതേസമയം വിദ്യാര്ഥികളല്ല അക്രമം നടത്തിയതെന്ന് ജാമിഅ വിദ്യാര്ഥി യൂനിയനും ജാമിഅ സര്വകലാശാല അധികൃതരും വ്യക്തമാക്കി. ക്യാമ്പസ് പൊലീസിന്റെ നിയന്ത്രണത്തിലാണിപ്പോള്. ഇന്നലെ വൈകുന്നേരം സര്വകലാശാലയില് നിന്ന് ആരംഭിച്ച പ്രതിഷേധ മാര്ച്ച് ജന്തര് മന്തറില് അവസാനിക്കുമെന്നായിരുന്നു പ്രതീക്ഷിച്ചിരുന്നത്.
ജാമിഅ യൂണിവേഴ്സിറ്റിക്ക് സമീപമുള്ള കാളിന്ദി കുഞ്ച് റോഡിലാണ് പ്രതിഷേധം നടന്നത്. മൂന്ന് ബസുകള്ക്ക് പ്രതിഷേധക്കാര് തീയിട്ടതായി ദേശീയമാധ്യമങ്ങള് റിപ്പോര്ട്ട് ചെയ്യുന്നു. പൊലീസ് അതിക്രമത്തില് പരിക്കേറ്റ വിദ്യാര്ഥികളില് പലരുടെയും പരിക്ക് ഗുരുതരമാണ്. പൊലീസ് ക്യാമ്പസിലെ ലൈബ്രറിയിലേക്കും കണ്ണീര്വാതകം എറിഞ്ഞു. കാമ്പസില് കടന്ന പൊലീസ് നിരവധി വിദ്യാര്ത്ഥികളെ കസ്റ്റഡിയിലെടുത്തു. പോലീസ് ബലമായി കാമ്പസില് പ്രവേശിച്ച് വിദ്യാര്ത്ഥികളെ ആക്രമിച്ചതായി സര്വകലാശാല പ്രതികരിച്ചു.പ്രതിഷേധത്തെ അപകീര്ത്തിപ്പെടുത്താനും അവഹേളിക്കാനുമുള്ള ശ്രമമാണ് അക്രമത്തിലൂടെ നടന്നതെന്ന് വിദ്യാര്ത്ഥികള് പറഞ്ഞു. വിദ്യാര്ത്ഥികളോട് സമാധാനം കാത്തുസൂക്ഷിച്ച് കാമ്പസിലേക്ക് മടങ്ങണമെന്ന് ജാമിഅ വൈസ് ചാന്സലര് നജ്മ അക്തര് അഭ്യര്ത്ഥിച്ചു. സര്വകലാശാല സ്ഥിതിചെയ്യുന്ന മജന്ത ലൈനിലെ മെട്രോ പ്രവര്ത്തനത്തെ പ്രതിഷേധം ബാധിച്ചു. ഇവിടത്തെ അഞ്ച് സ്റ്റേഷനുകളുടെ ഗേറ്റുകള് അടച്ചു. അക്രമത്തെ മുഖ്യമന്ത്രി അരവിന്ദ് കെജ്രിവാള് അപലപിച്ചു. പൗരത്വ നിയമം പാസാക്കിയതുമുതല് രാജ്യത്തിന്റെ ചില ഭാഗങ്ങളില് അക്രമങ്ങള് തുടരുകയാണ്.
https://www.facebook.com/Malayalivartha
