ബജറ്റിന് പിന്നാലെ ധനമന്ത്രിക്ക് പ്രധാനമന്ത്രിയുടെ അഭിനന്ദനം. കേന്ദ്ര ബജറ്റ് അവതരിപ്പിച്ച ധനമന്ത്രി നിര്‍മല സീതാരമാനെ പ്രശംസിച്ച് പ്രധാനമന്ത്രി നരേന്ദ്ര മോദി രംഗത്തെത്തി. സമസ്ത മേഖലയ്ക്കും ഉണര്‍വ്വ് പകരുന്നതാണ് ബജറ്റെന്നാണ് പ്രധാനമന്ത്രി അഭിപ്രായപ്പെട്ടത്. പുതിയ പ്രഖ്യാപനത്തിലൂടെ തൊഴിലവസരങ്ങള്‍ കൂടുമെന്നും അദ്ദേഹം കൂട്ടിച്ചേർത്തു. പുതിയ 100 വിമാനത്താവളങ്ങള്‍ യാഥാര്‍ത്ഥ്യമാകുന്നതോടെ തൊഴിലില്ലായ്മ പരിഹരിക്കപ്പെടുമെന്നും പ്രധാനമന്ത്രി അവകാശവാദം ഉന്നയിച്ചു.

പുതിയ വിമാനത്താവളങ്ങൾ വരുന്നത് തൊഴിലവസരങ്ങൾ സൃഷ്ടിക്കുമെന്നും ടൂറിസം മേഖലയിൽ കൂടുതൽ അവസരങ്ങൾ ഉണ്ടാകാൻ ഇടയാക്കുമെന്നും അദ്ദേഹം വ്യക്തമാക്കി. ബജറ്റ് ഏറ്റവും കൂടുതൽ ഗുണം ചെയ്യുന്നത് വിദ്യാർത്ഥികൾക്കായിരിക്കും. കയറ്റുമതിക്ക് ആക്കം കൂട്ടാൻ സഹായിക്കും. നൈപുണ്യ വികസനത്തിന് പ്രാധാന്യം നൽകുന്നതാണ് പുതിയ ബജറ്റ്. ബജറ്റ് നിർദ്ദേശങ്ങൾ സമ്പദ് വ്യവസ്ഥയ്ക്ക് ഉത്തേജനമാകുമെന്നും മോദി വെളിപ്പെടുത്തുന്നു.

അതേസമയം, ബജറ്റ് പൊള്ളയാണെന്ന് പ്രതിപക്ഷംആരോപിച്ചു. തൊഴിലില്ലായ്മ നേരിടുന്ന പ്രഖ്യാപനങ്ങള്‍ എവിടെ എന്നായിരുന്നു രാഹുൽ ഗാന്ധി ചോദ്യമുന്നയിച്ചത്. ഇന്‍ഷ്വറന്‍സ് രംഗത്തെ സ്വകാര്യവത്ക്കരണം പൊന്മുട്ടയിടുന്ന താറാവിനെ കൊന്നപോലെയായെന്ന് സിപിഎം ജനറല്‍ സെക്രട്ടറി സീതാറാം യെച്ചൂരി അഭിപ്രായപ്പെട്ടു. കേന്ദ്ര ബജറ്റ് സഹകരണ മേഖലയ്ക്ക് തിരിച്ചടിയെന്നാണ് മുഖ്യമന്ത്രി പിണറായി വിജയന്‍ പ്രതികരിച്ചത്. സംസ്ഥാനത്തിന്‍റെ ആവശ്യങ്ങളെ ബജറ്റ് അവഗണിച്ചുവെന്നും അദ്ദേഹം കൂട്ടിച്ചേര്‍ത്തു.