ഇന്ത്യാ സന്ദര്‍ശനത്തിനായി യു.എസ് പ്രസിഡന്റ് ഡോണള്‍ഡ് ട്രംപ് എത്തുമ്പോള്‍ ഇന്ത്യ കണ്ടതിലേറ്റവും വലിയ സുരക്ഷയാണ് അദ്ദേഹത്തിനായി ഒരുക്കിയിരിക്കുന്നത്. അമേരിക്കന്‍ സീക്രട്ട് സര്‍വിസിനെ കൂടാതെ 10 കമ്പനി പാരാമിലിട്ടറി സംഘം, 10 കമ്പനി പി.എ.സി, എന്‍.എസ്.ജി കമാന്‍ഡോകള്‍ എന്നിവരാണ് ട്രംപിന്റെ സുരക്ഷ നിര്‍വഹിക്കുന്നത്. ലോകത്തിലെ ഏറ്റവും പ്രമുഖ നേതാവ് എത്തുമ്‌ബോള്‍ ചെറിയൊരു ക്രമസമാധാന പ്രശ്‌നം പോലും ഉണ്ടാകാതിരിക്കാനുള്ള ജാഗ്രതയിലാണ് അധികൃതര്‍.

ലോകാത്ഭുതങ്ങളിലൊന്നായ ആഗ്രയിലെ താജ്മഹല്‍ സന്ദര്‍ശിക്കാന്‍ ട്രംപ് എത്തുമ്‌ബോള്‍ സുരക്ഷാ സംഘത്തില്‍ പ്രത്യേക പരിശീലനം ലഭിച്ച അഞ്ച് കുരങ്ങന്‍മാരും ഉണ്ടാകുമെന്നാണ് പുതിയ വിവരം. നീളന്‍വാലന്‍ ലാംഗ്വര്‍ ഇനത്തില്‍പെട്ട കുരങ്ങുകളെയാണ് സുരക്ഷക്ക് നിയോഗിക്കുക.

താജ്മഹലിന്റെ പരിസരത്ത് വാനരശല്യം ഏറെയാണ്. ഇവിടെയെത്തുന്ന സഞ്ചാരികള്‍ക്ക് കുരങ്ങന്‍മാര്‍ ചിലപ്പോഴൊക്കെ ബുദ്ധിമുട്ട് സൃഷ്ടിക്കാറുണ്ട്. ഇത്തരമൊരു 'ക്രമസമാധാന പ്രശ്‌നം' മുന്നില്‍കണ്ടാണ് സുരക്ഷാ സംഘത്തില്‍ കുരങ്ങന്മാരെ ഉള്‍പ്പെടുത്തിയത്.

പ്രശ്‌നക്കാരായ കുരങ്ങന്മാരെ ഓടിച്ചുവിടുകയാണ് പരിശീലനം ലഭിച്ച ലാംഗ്വര്‍ കുരങ്ങന്മാരുടെ ചുമതല. ഫെബ്രുവരി 24നാണ് ട്രംപ് താജ്മഹല്‍ സന്ദര്‍ശിക്കുന്നത്.

അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ സന്ദര്‍ശനം അനശ്വരമാക്കാന്‍ വലിയ പ്രവര്‍ത്തനങ്ങളാണ് നടത്തുന്നത്. ഗുജറാത്തില്‍ എത്തുമ്‌ബോള്‍ അത് മഹാസംഭവമാക്കാനുള്ള അവസാനവട്ട തിരക്കാണ് സംസ്ഥാനത്ത്. 24നാണ് ട്രംപ് എത്തുന്നത്. ഒരു രാജ്യതലവനും ഇതുവരെ നല്‍കിയിട്ടില്ലാത്ത രാജകീയ വരവേല്‍പ്പിനാണ് ഗുജറാത്ത് ഒരുങ്ങുന്നത്. വെറും മൂന്നുമണിക്കൂര്‍ മാത്രമാണ് ട്രംപ് നഗരത്തില്‍ ചെലവഴിക്കുന്നത്.

പുതിക്കിപ്പണിത് കണ്ണാടിപോലെയാക്കിയ റോഡുകളുടെ വൃത്തികണ്ടാല്‍ ആരും അന്തംവിട്ടുപോകും. ഒരില വീണാല്‍ അപ്പോള്‍തന്നെ അതെടുത്തുമാറ്റും. രാവിലെയും വൈകുന്നേരവുമുള്ള വൃത്തിയാക്കല്‍ മാത്രമല്ല, എപ്പോഴും വൃത്തിയാക്കിയിരിക്കണമെന്നാണ് ഉദ്യോഗസ്ഥര്‍ക്കുള്ള കര്‍ശന നിര്‍ദ്ദേശം. നിലവിലെ ശുചീകരണ ജീവനക്കാരെ മാറ്റി പ്രത്യേക ആള്‍ക്കാരെ ഇതിനായി നിയോഗിച്ചു. ഇവരുടെ കാര്യം നോക്കാന്‍ വേണ്ടി മാത്രം പ്രത്യേകം ഉദ്യോഗസ്ഥരെയും ചുമതലപ്പെടുത്തി.

ട്രംപും മോദിയുമായുള്ള റോഡ് ഷോയാണ് സുരക്ഷാ ഉദ്യോഗസ്ഥരെ ചങ്കിടിപ്പിക്കുന്നത്. റോഡ് ഷോ കടന്നുപോകുന്ന റോഡിനിരുവശവത്തുമായി അമ്ബതിനായിരം പേരെയാണ് അണിനിരത്തുന്നത്. റോഡ് ഷോയുടെ സുരക്ഷയ്ക്കുമാത്രം 25 ഐ.പി.എസ് ഓഫീസര്‍മാരുടെ മേല്‍നോട്ടത്തില്‍ 25,000 പൊലീസുകാരെയാണ് നിയോഗിച്ചിരിക്കുന്നത്. സ്‌ഫോടകവസ്തുക്കളും വെടിക്കോപ്പുകളും കണ്ടെത്താന്‍ സഹായിക്കുന്ന ഏറ്റവും പുതിയ ഉപകരണങ്ങളും ഇവര്‍ക്ക് നല്‍കും. ഷോ കടന്നുപോകുന്ന റോഡിനിരുവശവുമുള്ള മുക്കും മൂലയും ഇവര്‍ അരിച്ചുപെറുക്കും. ട്രംപ് എത്തുന്നു എന്ന വാര്‍ത്ത പുറത്തുവന്നപ്പോള്‍ത്തന്നെ ഇവര്‍ നിരീക്ഷണം തുടങ്ങിയിരുന്നു. പ്രശ്‌നമാകുമെന്ന് തോന്നിയതെല്ലാം ഒഴിവാക്കി. ചില കെട്ടിടങ്ങള്‍ വരെ നീക്കംചെയ്തുവത്രേ.

ആയുധങ്ങളുടെയും സ്‌ഫോടക വസ്തുക്കളുടെയും സാന്നിദ്ധ്യം തിരിച്ചറിയാന്‍ വിഗദ്ധരായ പൊലീസ് നായ്ക്കളുടെ പത്ത് സംഘങ്ങളെയും റോഡ് ഷോയുടെ സുരക്ഷയ്ക്കായി നിയോഗിച്ചിട്ടുണ്ട്. ആവശ്യമെന്ന് കണ്ടാല്‍ കൂടുതല്‍ സംഘത്തെ നിയോഗിക്കും.ഇവര്‍ക്കുപുറമേ എസ്.പി.ജി, എന്‍.എസ്.ജി കമാന്‍ഡോകളും രഹസ്യാന്വേഷകരും രംഗത്തുണ്ട്. ഒപ്പം ട്രംപിന്റെ സുരക്ഷയ്ക്ക് മേല്‍നോട്ടം വഹിക്കാന്‍ അമേരിക്കയില്‍ നിന്നെത്തുന്ന പ്രത്യേക സംഘവും.

ട്രംപ് അഹമ്മദാബാദിലെത്തുന്നതിന് രണ്ടുദിവസം മുമ്ബുതന്നെ റോഡുകള്‍ അടയ്ക്കുമെന്നാണ് റിപ്പോര്‍ട്ട്. ഇതുമൂലം പൊതുജനങ്ങള്‍ക്ക് ബുദ്ധിമുണ്ടാകാതിരിക്കാനുള്ള ഏര്‍പ്പാടുകളും ചെയ്തിട്ടുണ്ട്. അമേരിക്കയില്‍ നിന്ന് കൊണ്ടുവരുന്ന പ്രത്യേക വാഹനത്തിലായിരിക്കും ട്രംപിന്റെ യാത്ര. എന്തെങ്കിലും കാരണവശാല്‍ റോഡ്‌ഷോ ഉപേക്ഷിക്കുകയാണെങ്കില്‍ ഹെലികോപ്ടര്‍ വഴിയാകും ഹൗഡി മോദിക്ക് സമാനമായ കേം ചോ ട്രംപ് നടക്കുന്ന മൊടേര സ്‌റ്റേഡിയത്തിലേക്ക് പോകുന്നത്.