കഫ് സിറപ്പ് കഴിച്ച് 11 കുട്ടികൾ മരിച്ചു ... ചുമമരുന്നിന്റെ 3,400 ലേറെ കുപ്പികള് ഇതിനകം വിറ്റുപോയതായും അധികൃതർ ..ഞെട്ടിച്ച് റിപ്പോർട്ട്
ജമ്മു കശ്മീരില് പതിനൊന്ന് കുട്ടികള് ചുമയുടെ മരുന്ന് കഴിച്ചതിനെ തുടര്ന്ന് മരിച്ചു. ജമ്മുവിലെ ഉദംപൂര് ജില്ലയിലെ രാംനഗറിലാണ് സംഭവം. ColdBest-PC എന്ന മരുന്നാണ് മരണ കാരണം എന്നാണ് പ്രാഥമിക റിപ്പോര്ട്ട്. മരിച്ച 11 കുട്ടികളും ഇതേ മരുന്ന് കഴിച്ചിരുന്നു... 3,400 ലേറെ കുപ്പികള് ഇതിനോടകം വിറ്റുപോയിട്ടുണ്ട്
വിറ്റ രസീതുകളുടെ അടിസ്ഥാനത്തില് മരുന്ന് വാങ്ങിയവരെ കണ്ടെത്താനുള്ള ശ്രമം നടക്കുന്നുണ്ട്. ജമ്മു-കശ്മീര്, ഉത്തരാഖണ്ഡ്, ഹിമാചല് പ്രദേശ്, തമിഴ്നാട്, മേഘാലയ, ത്രിപുര എന്നിവിടങ്ങളിലായി 5,500 കുപ്പികള് കഴിഞ്ഞ സെപ്റ്റംബറില് വിപണിയിലെത്തിച്ചിരുന്നു. 1,500 എണ്ണം മാര്ക്കറ്റില് നിന്ന് തിരികെ ലഭിച്ചിട്ടുണ്ട്.
2019 സെപ്റ്റംബര് മുതല് 2020 ജനുവരി വരെ വിറ്റു പോയ കുപ്പികളുടെ കണക്കാണിത്. ഹിമാചല് പ്രദേശ് ആസ്ഥാനമായ ഡിജിറ്റല് വിഷന് ഫാര്മയാണ് കഫ് സിറപ്പ് വിപണിയിലെത്തിച്ചത്. കഫ് സിറപ്പിന്റെ ഒരു കുപ്പിയില് 60 മില്ലി ലിറ്റര് മരുന്നാണുള്ളത്. ഒരു തവണത്തെ ഡോസില് 5-6 മില്ലി മരുന്ന് അകത്ത് ചെല്ലുകയാണെങ്കില് 10-12 ഡോസാകുമ്പോള് രോഗി മരിക്കാനിടയാകുമെന്ന് ഹിമാചല് പ്രദേശ് ഡ്രഗ് കണ്ട്രോളര് നവ്നീത് മാര്വ പറഞ്ഞതായി റിപ്പോർട്ടുണ്ട്
സിറപ്പില് വിഷവസ്തുക്കള് അടങ്ങിയിട്ടുണ്ടെന്ന് കണ്ടെത്തിയതിനെ തുടർന്ന് 8 സംസ്ഥാനങ്ങൾ സിറപ്പിന്റെ വിൽപന നിർത്തിവച്ചിരിക്കുകയാണ് . മരുന്ന് നിര്മാണക്കമ്പനിയുടെ ലൈസന്സ് താല്ക്കാലികമായി റദ്ദാക്കി. സംഭവത്തിൽ വിശദമായ അന്വേഷണം ആരംഭിച്ചിട്ടുണ്ട്
ഡിസംബറിനും ജനുവരിക്കുമിടയില് കോള്ഡ് ബെസ്റ്റ് പിസി എന്ന ചുമസിറപ്പ് കഴിച്ച 17 കുട്ടികളെ അസ്വസ്ഥതകളുണ്ടായതിനെ തുടര്ന്ന് ആശുപത്രിയില് പ്രവേശിപ്പിച്ചിരുന്നു. വൃക്കസ്തംഭനത്തെ തുടര്ന്ന് ഇതില് പതിനൊന്ന് കുട്ടികള് മരിച്ചു. ആറു കുട്ടികൾക്ക് ഗുരുതരമായ രോഗം ബാധിക്കുകയും ചെയ്തു. ഇതോടെ നടത്തിയ അന്വേഷണത്തിലാണ് മരിച്ച 11 കുട്ടികളും ചുമയ്ക്കുള്ള ഈ സിറപ്പ് ഉപയോഗിച്ചതായി കണ്ടെത്തിയത്. ഇതില് കൂടുതല് അന്വേഷണങ്ങള് നടത്തിവരികയാണ്.
പരിശോധനയ്ക്കായി അയച്ച സിറപ്പിന്റെ സാംപിളുകളില് വിഷാംശമായ ഡൈഥിലീന് ഗ്ലൈക്കോളിന്റെ സാന്നിധ്യം കണ്ടെത്തിയതായി സ്ഥിരീകരിച്ചിരുന്നു. എന്നാൽ കുട്ടികളുടെ മരണം ചുമമരുന്ന് കഴിച്ചതിനെ തുടർന്നാണെന്ന ആരോപണം ഡിജിറ്റല് വിഷന് ഫാര്മസ്യൂട്ടിക്കല്സ് നിഷേധിച്ചു
https://www.facebook.com/Malayalivartha