ഡൽഹി കലാപ വിഷയത്തിൽ രാഷ്ട്രപതിയുമായി കൂടിക്കാഴ്ച്ച നടത്തി കോൺഗ്രസ് അദ്ധ്യക്ഷ സോണിയ ഗാന്ധിയും പാർട്ടി നേതാക്കളും. മുൻ പ്രധാനമന്ത്രി മൻമോഹൻ സിംഗിനും മറ്റ് പാർട്ടി നേതാക്കൾക്കുമൊപ്പമാണ് സോണിയ ഗാന്ധി രാഷ്ട്രപതിയെ കാണാനെത്തിയത്.

പദവിയോട് നീതി പുലർത്താത്തതിന് കേന്ദ്ര ആഭ്യന്തര മന്ത്രി അമിത് ഷായെ ആ സ്ഥാനത്ത് നിന്നും നീക്കം ചെയ്യണമെന്നും ജനങ്ങളെ സംരക്ഷിക്കണമെന്നും സോണിയ ഗാന്ധി കൂടിക്കാഴ്ചയിൽ ആവശ്യപ്പെട്ടു. ആളുകളുടെ ജീവനും സ്വത്തും സമ്പത്തും സംരക്ഷിക്കുമെന്ന ഉറപ്പിനു വേണ്ടിയാണ് രാഷ്ട്രപതിയെ കാണാനെത്തിയതെന്ന് സോണിയ ഗാന്ധി പറഞ്ഞു.

34 പേർ മരണത്തിന് ഇരയായിട്ടും അടിയന്തര ശ്രദ്ധ ആവശ്യമുള്ള ഈ സമയത്ത് കേന്ദ്ര സംസ്ഥാന സർക്കാരുകൾ കാഴ്ചക്കാരായി നിൽക്കുകയാണെന്നും സോണിയ ഗാന്ധി രാഷ്ട്രപതി രാംനാഥ് കോവിന്ദിനെ ധരിപ്പിച്ചു. ആവശ്യങ്ങൾ പരിഗണിക്കാമെന്ന് രാഷ്ട്രപതി ഉറപ്പ് നൽകിയതായി സന്ദർശന ശേഷം സോണിയ ഗാന്ധി അറിയിച്ചു.

കേന്ദ്രസർക്കാർ പൂർണമായും പരാജയപ്പെട്ടതിന്‍റെ പ്രതിഫലനമാണ് ഡൽഹി കലാപമെന്ന് മുൻ പ്രധാനമന്ത്രി മൻമോഹൻ സിംഗ് പറഞ്ഞു. കഴിഞ്ഞ നാലു ദിവസങ്ങളിലായി ഡൽഹിയിൽ നടന്നു കൊണ്ടിരിക്കുന്ന കാര്യങ്ങൾ രാജ്യത്തിന് നാണക്കേടാണ്. 34 ഓളം പേർ മരിക്കുകയും 200 ഓളം പേർക്ക് പരിക്കേൽക്കുകയും ചെയ്തു. കേന്ദ്രസർക്കാരിന്‍റെ പൂർണ പരാജയത്തിന്‍റെ പ്രതിഫലനമാണ് ഇതെന്നും മൻമോഹൻ സിംഗ് പറഞ്ഞു.

ഭരണഘടനയ്ക്ക് കീഴിൽ ഏറ്റവും വലിയ ഉത്തരവാദിത്തമുള്ളത് രാഷ്ട്രപതിക്കാണെന്നും അദ്ദേഹം സർക്കാരിന്റെ മനസാക്ഷി സൂക്ഷിപ്പുകാരൻ ആണെന്നും അതനുസരിച്ച് സർക്കാരിന്റെ ഭരണഘടനാ ചുമതലകളെ കുറിച്ച് ഓർമിപ്പിക്കേണ്ടത് രാഷ്ട്രപതിയാണെന്നും കോൺഗ്രസ് നൽകിയ കത്തിൽ ആവശ്യപ്പെട്ടു.