കടുകട്ടിയായ ഇംഗ്ലീഷ് വാക്കുകളിലൂടെ ആളുകളെ വെള്ളം കുടിപ്പിക്കുന്നത് പതിവാണ് കോൺഗ്രസ്സ് എം പി ശശി തരൂരിന്. ഇതിന്റെ പേരിൽ നിരവധി ട്രോളുകളും അദേഹം ഏറ്റുവാങ്ങാറുണ്ട്. എങ്കിലും ഇംഗ്ലീഷ് പരിജ്ഞാനത്തെക്കുറിച്ചുള്ള ചർച്ചകളിൽ മലയാളികള്‍ ആദ്യം ഓര്‍ക്കുക ശശി തരൂരിനെ തന്നെയായിരിക്കും.

എന്നാല്‍ തരൂരിനോട് മത്സരിക്കാന്‍ ഒരാളുണ്ടെന്ന കമെന്റുകളാണ് ഇപ്പോള്‍ സോഷ്യല്‍ മീഡിയയിൽ നിറയുന്നത്. മഹാത്മാഗാന്ധിയെക്കുറിച്ച് ഇംഗ്ലീഷില്‍ സംസാരിക്കുന്ന ഒരു വൃദ്ധയുടെ വീ‍ഡിയോ ആണിപ്പോൾ സമൂഹ മാധ്യമങ്ങളിൽ താരം.ഇതേറ്റെടുത്തുകൊണ്ടാണ് സോഷ്യല്‍ മീഡിയ തരൂരിന് ശക്തയായ എതിരാളി എന്ന് ഇവരെ വിശേഷിപ്പിച്ചിരിക്കുന്നത്. ഭഗ്‍വാനി ദേവി എന്ന വൃദ്ധ ഗാന്ധിയെക്കുറിച്ച് ഇംഗ്ലീഷില്‍ സംസാരിക്കുന്ന വീഡിയോ ആണ് തരംഗമാകുന്നത് . ഇതിന്‍റെ വീഡിയോ ഐപിഎസ് ഓഫീസറായ അരുണ്‍ ബോത്ര ട്വിറ്ററില്‍ പങ്കുവയ്ക്കുകയായിരുന്നു. രാജസ്ഥാനിലെ ജുന്ജുനു സ്വദേശിയാണ് ഇവരെന്ന് ട്വിറ്ററിലെ ചിലര്‍ തിരിച്ചറിയുകയായിരുന്നു . 36 സെക്കന്‍റ് വീഡിയോയില്‍ ഗാന്ധി രാഷ്ട്രപിതാവാണെന്നും ഹിംസയെ എതിര്‍ത്തിരുന്നുവെന്നും അവര്‍ ഇംഗ്ലീഷിൽ പറയുന്നു.