രാജ്യത്തെ കോവിഡ് -19 സ്ഥിരീകരിച്ചവരുടെ എണ്ണം 18,895 ആയി. ചൊവ്വാഴ്ച മാത്രം 1,336 പേര്‍ക്കാണ് രോഗം സ്ഥിരീകരിച്ചിരിക്കുന്നത്. 15,122 പേരാണ് നിലവില്‍ ചികിത്സയിലുള്ളത്. 3,260 പേര്‍ രോഗമുക്തരായി. 17.48 ശതമാനമാണ് രാജ്യത്ത് രോഗം ഭേദമാകുന്നതിന്റെ നിരക്ക്. 603 പേരാണ് ഇതുവരെ രോഗബാധയെ തുടര്‍ന്ന് മരണപ്പെട്ടത്. രാജ്യത്ത് കൊറോണ വൈറസ് ബാധ ഏറ്റവും അധികമുള്ളത് മഹാരാഷ്ട്രയിലാണ്. 5,218 ആള്‍ക്കാരിലാണ് ഇതുവരെ രോഗബാധ സ്ഥിരീകരിച്ചത്. ഡല്‍ഹി (2156), ഗുജറാത്ത് (2,066) എന്നീ സംസ്ഥാനങ്ങളാണ് രോഗബാധ ഏറ്റവും അധികമുള്ള മറ്റ് രണ്ട് സംസ്ഥാനങ്ങള്‍. ഏറ്റവുമധികം മരണവും റിപ്പോര്‍ട്ട് ചെയ്തിരിക്കുന്നത് മഹാരാഷ്ട്രയിലാണ്. 232 പേരാണ് സംസ്ഥാനത്ത് ഇതുവരെ മരിച്ചത്.

ഇന്ന് രാജ്യത്തെ മിക്ക സംസ്ഥാനങ്ങളിലും കേന്ദ്രഭരണ പ്രദേശങ്ങളിലും പുതിയതായി കോവിഡ്-19 സ്ഥിരീകരിച്ചിട്ടുണ്ട്. മഹാരാഷ്ട്രയില്‍ കാട്ടുതീ പടരുന്നതുപോലെയാണ് പുതിയ കേസുകള്‍ റിപ്പോര്‍ട്ട് ചെയ്യപ്പെടുന്നത്. സംസ്ഥാനത്ത് കൊറോണ ഹോട്ട് സ്‌പോട്ടായി മാറിയിരിക്കുകയാണ് മുംബൈ.