രാജ്യത്ത് കോവിഡ് ബാധിതരുടെ എണ്ണം അരലക്ഷത്തിനടുത്ത്. 24 മണിക്കൂറിനിടെ 126 മരണവും 2,958 പുതിയ കേസുകളും റിപ്പോര്‍ട്ട് ചെയ്തു. ഇതോടെ മരണസംഖ്യ 1,694 ആയി. 49,391 പേര്‍ക്ക് രോഗം സ്ഥിരീകരിച്ചു. 85 ബിഎസ്എഫ് ജവാന്മാര്‍ക്ക് കൂടി ഇന്ന് വൈറസ്ബാധ കണ്ടെത്തി. കേന്ദ്ര ആരോഗ്യമന്ത്രാലയത്തിന്റെ കണക്കനുസരിച്ച് 14,182 പേര്‍ രോഗമുക്തരായി.

ഈ ഒരു സാഹചര്യത്തില്‍ കൂടിയാണ് കൊവിഡ് പ്രതിരോധത്തിലെ മുന്നണിപ്പോരാളികള്‍ക്കും കൊവിഡില്‍ ജീവന്‍ നഷ്ടപ്പെട്ടവര്‍ക്കും പ്രധാനമന്ത്രി നരേന്ദ്രമോദി ആദരവ് അര്‍പ്പിക്കും. ബുദ്ധ പൂര്‍ണ്ണിമ ദിനത്തില്‍ രാവിലെ രാജ്യത്തെ അഭിസംബോധന ചെയ്താകും ആദരവറിയിക്കുന്നത്. പ്രധാനമന്ത്രിയുടെ ഓഫീസാണ് ഇക്കാര്യം അറിയിച്ചത്.

രാജ്യത്ത് കൊവിഡ് രോഗികളുടെ എണ്ണത്തില്‍ വന്‍ വര്‍ധനവാണുണ്ടാകുന്നത്. ഈ സാഹചര്യത്തില്‍ കൂടിയാണ് പ്രധാനമന്ത്രി രാജ്യത്തെ അഭിസംബോധനചെയ്യുന്നതെന്നത് ശ്രദ്ധേയമാണ്.ലോക് ഡൗണ്‍ നീട്ടിയ സാഹചര്യത്തില്‍ നിലവിലെ രാജ്യത്തെ സാഹചര്യത്തെ കുറിച്ച് പരാമര്‍ശം നടത്തിയേക്കുമെന്നും സൂചനയുണ്ട്.

മാത്രമല്ല കൊറോണ വൈറസ് മഹാമാരിയെ തുടര്‍ന്ന് രാജ്യത്തെ തൊഴിലില്ലായ്മ നിരക്ക് കുത്തനെ ഉയര്‍ന്നു. ഇന്ത്യയില്‍ പടര്‍ന്നുപിടിച്ച കൊറോണ വൈറസും ഇതിന്റെ വ്യാപനം തടയുന്നതിനായി പ്രഖ്യാപിച്ച ലോക്ക് ഡൗണും കാരണം മാര്‍ച്ച് മുതല്‍ മെയ് മൂന്ന് അവസാന വാരത്തില്‍ രാജ്യത്തെ തൊഴിലില്ലായ്മ നിരക്ക് 27.11 ശതമാനമായാണ് ഉയര്‍ന്നത്. മാര്‍ച്ചില്‍ ലോക്ക് ഡൗണ്‍ പ്രഖ്യാപിക്കുന്നതിന് മുമ്പ് ഏഴ് ശതമാനത്തിനും താഴെയായിരുന്നു രാജ്യത്തെ തൊഴിലില്ലായ്മ നിരക്ക് എന്ന് സെന്റര്‍ ഫോര്‍ മോണിറ്ററിംഗ് ഇന്ത്യന്‍ ഇക്കണോമി (സിഎംഐഇ) വ്യക്തമാക്കി.

രാജ്യത്ത് പൊതുഗതാഗതം ഉടന്‍ പുനഃസ്ഥാപിക്കുമെന്ന് കേന്ദ്രം. പൊതുഗതാഗതം പുനഃസ്ഥാപിക്കുന്നതിനെ കുറിച്ച് കേന്ദ്രം ആലോചിക്കുകയാണെന്നും അതിനായുള്ള മര്‍ഗരേഖ ഉടന്‍ തയ്യാറാക്കുമെന്നും കേന്ദ്രമന്ത്രി നിതിന്‍ ഗഡ്കരി പറഞ്ഞു. സാമൂഹിക അകലം പാലിച്ചും ജനങ്ങളുടെ സുരക്ഷ മുന്‍നിര്‍ത്തിയും പൊതുഗതാഗതം പുനഃസ്ഥാപിക്കുന്നതിനെ കുറിച്ചാണ് കേന്ദ്രം ആലോചിക്കുന്നതെന്നും അതിനെ അടിസ്ഥാനപ്പെടുത്തിയായിരിക്കും മാര്‍ഗനിര്‍ദേശങ്ങള്‍ പുറത്തിറക്കുക എന്നും ഗഡ്കരി വ്യക്തമാക്കി.
ഗുജറാത്തില്‍ ഇന്നലെ മാത്രം 49 പേര്‍ മരിച്ചു ഇതില്‍ 39 അഹമ്മദാബാദിലാണ്. സംസ്ഥാനത്ത് ആകെ മരണം 368 ആയി. 6,245 പേര്‍ക്ക് വൈറസ് ബാധ സ്ഥിരീകരിച്ചു. മരണനിരക്കില്‍ മഹാരാഷ്ട്രയേക്കാള്‍ മുന്‍പിലാണ് ഗുജറാത്ത്. തമിഴ്‌നാട്ടില്‍ കഴിഞ്ഞ രണ്ട് ദിവസവും അഞ്ഞൂറിലധികം പേര്‍ക്ക് രോഗം സ്ഥിരീകരിച്ചെങ്കിലും രോഗമുക്തിനേടിയവരുടെ നിരക്കും വര്‍ധിച്ചു.

രാജസ്ഥാനില്‍ മരണസംഖ്യ 90 ആയി. 35 പേര്‍ക്ക് കൂടി ഇന്ന് രോഗം സ്ഥിരീകരിച്ചതോടെ രോഗബാധിതരുടെയെണ്ണം 3,193 ആയി. ഡല്‍ഹിയില്‍ രോഗികളുടെയെണ്ണം അയ്യായിരം കടന്നു. ബംഗാളില്‍ 112 പേര്‍ക്ക് കൂടി രോഗം സ്ഥിരീകരിച്ചു. കേന്ദ്രസര്‍ക്കാരിന്റെ കണക്കനുസരിച്ച് രാജ്യത്ത് 548 ആരോഗ്യപ്രവര്‍ത്തകര്‍ക്ക് കോവിഡ് ബാധിച്ചു. ഡല്‍ഹിയില്‍ ഡ്യൂട്ടിയിലുണ്ടായിരുന്ന 30 ബിഎസ്എഫ് ജവാന്മാര്‍ക്ക് കൂടി വൈറസ്ബാധ കണ്ടെത്തി. മിസോറാമിലെ ഏക കോവിഡ് രോഗി രോഗമുക്തി നേടി.