പത്തു കൊടുംഭീകരരുടെ പട്ടികയിലെ ഒന്നാമന് നായ്കു, പണ്ട് കണക്ക് അധ്യാപകന്
കഴിയുമെങ്കില് പിടികൂടുക, അല്ലെങ്കില് വധിക്കുക എന്ന് സുരക്ഷാ സൈനികര്ക്ക് നിര്ദേശം നല്കി ആഭ്യന്തര മന്ത്രി അമിത് ഷാ തയാറാക്കിയ പത്തു കൊടുംഭീകരരുടെ പട്ടികയിലെ ഒന്നാമനായിരുന്നു ഇന്നലെ സൈനിക ഏറ്റുമുട്ടലില് കൊല്ലപ്പെട്ട 32 വയസുകാരനായ റിയാസ് നായ്കു. ശ്രീനഗറില് സ്കൂളില് കണക്ക് അധ്യാപകനായിരുന്നു 2012-ല് ഭീകരസംഘാംഗമായി. അവന്തിപോറയിലെ ദുര്ബസ് സ്വദേശി. കശ്മീര് താഴ്വരയില് ഹിസ്ബുള് മുജാഹിദീന്റെ ഓപ്പറേഷന്സ് തലവനായി വളര്ന്നതു വളരെപ്പെട്ടെന്നാണ്.
അമിത് ഷാ ആഭ്യന്തര മന്ത്രിയായി ചുമതലയേറ്റതിനു പിന്നാലെ തയാറാക്കിയ പട്ടികയില് ഏറ്റവും അപകടകാരിയായ ഭീകരന് എന്ന നിലയില് എ പ്ലസ് പ്ലസ് ഗ്രേഡ് നല്കി. തലയ്ക്ക് 12 ലക്ഷം രൂപ വിലയിട്ടു. വാസിം അഹമ്മദ് എന്ന ഒസാമ (ലഷ്കറെ തോയ്ബ), മുഹമ്മദ് അഷ്റഫ് ഖാന് എന്ന അഷ്റഫ് മൗലവി (ഹിസ്ബുള്), മെഹ്റാസുദ്ദീന് (ഹിസ്ബുള്), ഡോ. സെയ്ഫുള്ള എന്ന സെയ്ഫുള്ള മീര് (ഹിസ്ബുള്), അര്ഷിദ് ഉല് ഹഖ് (ഹിസ്ബുള്), ഹസീഫ് ഉമര് (ജയ്ഷെ മുഹമ്മദ് കമാന്ഡര്, ഷാഹിദ് ഷെയ്ഖ് (ജയ്ഷ്), ജാവേദ് മട്ടൂ (അല്-ബാദര് കമാന്ഡര്) ഇയാസ് അഹമ്മദ് മാലിക് (ഹിസ്ബുള്) പട്ടികയിലെ മറ്റുള്ളവര് ഇവരായിരുന്നു.
താഴ്വരയില് ഹിസ്ബുള്ളിന്റെ നേതൃത്വം 2016 ജൂലൈയില് ബുര്ഹാന് വാനി വധിക്കപ്പെട്ടതോടെ യാസിന് ഇട്ടൂവിനായിരുന്നു. പിറ്റേവര്ഷം സെപ്റ്റംബറില് ഇട്ടൂ വധിക്കപ്പെട്ടു. അന്സാര് ഘസ്വത്തുള് ഹിന്ദ് എന്ന പേരില് സാക്കിര് മൂസ പ്രത്യേക സംഘമുണ്ടാക്കിയതോടെ നായ്ക്കുവും സബ്സാര് ഭട്ടും ഹിസ്ബുള് മുജാഹിദീന്റെ തലപ്പത്തെത്തി. സാക്കിര് മൂസയെയും സബ്സാര് ഭട്ടിനെയും സൈന്യം കഴിഞ്ഞ വര്ഷം മേയില് വധിച്ചു.
മൂന്നുതവണ ഏറ്റുമുട്ടലിനിടെ രക്ഷപ്പെട്ട ചരിത്രവും നായ്ക്കുവിനുണ്ട്. കൊല്ലപ്പെടുന്ന ഭീകരരുടെ സംസ്കാരച്ചടങ്ങില് ആകാശത്തേക്കു വെടിയുതിര്ത്ത് 'ഗണ് സല്യൂട്ട്' നല്കിയിരുന്ന പഴയ രീതി പുനരാരംഭിച്ചതു നായ്ക്കുവിന്റെ നിര്ദേശാനുസരണമായിരുന്നു. കശ്മീരിലെ ഭീകരര്ക്ക് നാലു വര്ഷമാണ് ശരാശരി ആയുസെന്നും എട്ടു വര്ഷം കിട്ടിയ റിയാസ് നായ്ക്കു ഭാഗ്യവാനാണെന്നുമായിരുന്നു സൈനികര്ക്കിടയിലെ സംസാരം.
രണ്ടു വര്ഷം മുമ്പ് പഞ്ചായത്ത് തെരഞ്ഞെടുപ്പില് മത്സരിക്കാന് പത്രിക നല്കുന്നവരുടെ കണ്ണില് ആസിഡ് ഒഴിക്കണമെന്ന് ഇയാള് ആഹ്വാനം പുറത്തുവിട്ടിരുന്നു. ഇന്ത്യയുടെ ഏജന്റുമാരാകരുതെന്നു പോലീസ് ഉദ്യോഗസ്ഥര്ക്കു താക്കീതു നല്കിക്കൊണ്ട് കഴിഞ്ഞ വെള്ളിയാഴ്ച പുറത്തുവന്ന ശബ്ദസന്ദേശം അവസാനത്തേതായി. ദ് റെസിസ്റ്റന്സ് ഫ്രണ്ട് (ടി.ആര്.എഫ്) എന്ന പേരില് ഒരു വിഭാഗം ഭിന്നിച്ചു മാറിയതോടെ തല്ക്കാലം കശ്മീരില് ഹിസ്ബുള്ളിനു പുതിയ നേതൃത്വം ഉണ്ടാകില്ലെന്നാണു സുരക്ഷാസേനയുടെ വിലയിരുത്തല്.
https://www.facebook.com/Malayalivartha
